DIEMA 23

₁Ge o le dijong le mmuši, o dule o tseba yo o lebanego nae. ₂O itshware ge e ka ba o swerwe ke tlala. ₃O se ke wa kganyago dijo tše monate tša motho eo; e ka ba sejo sa go fora.

₄O se ke wa itapišetša lehumo; lesa go hlalefela lona. ₅E tlo re ge o sa le tsepeletše, la široga; la phorolla diphego boka lenong, la hlatlogela sebakeng.

₆O se ke wa ja bogobe bja yo mahlomaso; se kganyoge dijo tšagwe tše monate. ₇Gobane mo pelong o loga maano; ge a re: Jaa! Nwaa! Pelo ya gagwe ga e eme nago. ₈Thatana ye o e llego, o tlo buša o e hlatša; polelo tša gago tše botse o di tšitlantše.

₉Lešilo se le botše taba; le nyatša bohlale bja mantšu a gago.

₁₀O se ke wa šuthiša mellwane ya kgale; o se selele bolemong bja dišuana. ₁₁Gobane Mong wa bona ke yo maatla; Yena o tlo ba lwela a lwa nago.

₁₂Tliša pelo ya gago mo go lego thuto; iša tsebe ya gago mo go bolelwago tsebo.

₁₃Mošemanyana o se mo hlokiše tsholo; ge o mo tia ka kgati, a ka se hwe. ₁₄Ge o mo tia ka kgati, o mo efoša molete.

₁₅Ngwanaka! Ge pelo yago e hlalefa, le nna pelo yaka e tlo thaba. ₁₆Le tswalo laka le tlo hlalala, ge melomo yago e bolela tša go loka.

₁₇Pelo ya gago e se ke ya tsebafela ba go dira dira dibe; o dule o šia Morena ka mehla. ₁₈Ka kgonthe tše di tlago di se gona; kholofelo yago e ka se ke ya ba lefela.

₁₉Wena ngwanaka! Kwaa, o hlalefe; hlahla pelo ya gago tseleng. ₂₀O se ke wa tlwaelana le dihori tša sebela, ba go nyatšiša mebele ya bona. ₂₁Gobane monwi le sejato ba tlo diila; mme serokoroko se tlo tšwara mankgeretla.

₂₂Kwaa tatago, yena motswadi wa gago; mme mmago ge a kgekotše, o se ke wa mo nyatša.

₂₃Rua therešo, o se ke wa e rekiša; rua bohlale, le thuto, le tlhaologanyo.

₂₄Tatagomoloki o tlo hlalala ka gogolo; yo bohlale o thabelwa ke motswadi wagwe.

₂₅A go thabe tatago le mmago, go hlalale wa gago motswadi.

₂₆Ngwanaka! Nneele pelo yago; mme mahlo ago a a kgahlwe ke ditsela tšaka. ₂₇Gobane mosadiseotswa ke legaga le legolo; mosadi wa nonyana ke molete wa moreo. ₂₈O lalela batho boka mahlakodi, o atiša ba dihlola mo bathong.

₂₉Yo madimabe ke mang? -- Mahlomola a go mang? -- Dikgang di go mang? -- Manyami a go mang? -- Dintho tša lefela di go mang? -- Mahlomahwibidu a go mang? -- ₃₀Ke tša bao ba tsetsago mabjalweng, ba go yo leka setswaka sa sebela. ₃₁Se bone sebela bokwala, le lehulo go tlokoma senwelong, le go kwala ga monate mogolong. ₃₂Ka morago se go loma boka noga, se go tshwela hloko bja petla. ₃₃Mahlo a gago a bona dilo tše di sego gona; pelo ya gago e bua dilo tše di raranego. ₃₄Wa itshema e ke o robetše tlase bodibeng, wa buša wa kwa e ke o letše ntlheng ya sehlare. ₃₅Wa re; ba nteile, ke se kwe bohloko; ba nkgitlaka ke sa tsebe selo; wa re: Ke tlo fahloga neng ka boela ke se tsoma?