DIEMA 19

₁Modiidi molokaletsela o phala motho wa ditshele wa setlatla.

₂Ge o sa itlhaloganye, go go botse; go tlanakela ke go senya.

₃Motho o senyetšwa tsela ke bošilo bjagwe, a nape a tsota Morena.

₄Lehumo le rapa bagwera; mmotlana, le ba gabo ba a mo lahla.

₅Hlatse ya maaka ga e efoge kotlo; mmatamasese a ka se phonyokge.

₆Ba bantši ba šika le bagolo; e a sa timego ba gwerana nae bohle.

₇Modiidi, bana babo bohle ba a mmeka; le bagwera bagwe ba a mo šunya; ge a tlela tše ba mmoditšego tšona, o hwetša ba se gona.

₈Mohumatšapelong o itsheditše; molotolatlhaloganyo o tlo bona tše di botse.

₉Hlatse ya maaka ga e efoge kotlo; mmatamasese o tlo senyega.

₁₀Mašoto a rona setlatla; gagolo go ka rona ge molata a buša marena.

₁₁Molemogi ga a na sebefedi; bokwala bja gagwe ke ge a sa latiše phošo.

₁₂Sekgoro sa kgoši se etša go bopa ga tau; botho bja yona bo etša monola.

₁₃Ngwana yo setlatla ke masetlapelo a tatagwe; manganga a mosadi ke matlobotlobo a sa kgaotšego.

₁₄Motse le thoto ke bohwa botšwagotatagomotho; mosadi wa tlhalefo o tšwa go Morena.

₁₅Bobodu bo robatša boroko bjo bogolo; pelo e tšwafago e tlo hwa ka tlala.

₁₆Mokwataelo o a itota; monyatšatselatšagwe o tlo hwa.

₁₇Tlhallabadiidi o adima Morena; mme Yena o tlo mmušetša tše a di neilego bala.

₁₈Sola ngwanago go sa holofetša; o se tlo ba wa mo galefela wa mmolaya.

₁₉Wa sebefedi o tlo otlwa; ge o ka namola, e ba go hlohloletša.

₂₀Kwaa keletšo, o eletšege; o hlalefele tša ka moso.

₂₁Pelo ya motho e loga maano a mantši; go phethega se Morena a se beilego.

₂₂Motho o nkgahla ka botho; ke mo le mmotlana a tlo go phala monna wa go fora.

₂₃Go šia Morena go iša bophelong, motho a ja a lala a sa tlelwe ke bošula.

₂₄Sebodu se iša seatla mogopong, se se sa se iša molomong.

₂₅Wa lonya mo otle, setlatla se hlalefe; moeletšegi ge a solwa ke mo a tlo go tseba.

₂₆Ngwana molešahlong wa tšhegamiša, o goboša rragwe, o leleka mmagwe.

₂₇Ngwanaka! Lesa go theetša thuto ya go aroga mafoko a tsebo.

₂₈Hlatsesehlola e šunya molao; mogolo wa babe o metša bokgopo.

₂₉Ba lonya ba beetšwe kotlo, kgati e beetšwe mekokotlo ya mašilo.