DIEMA 17

₁Molatšanyana molewagoleleago, o phala dinama di tletše ntlo le kgang.

₂Morwamolešahlong o tlo bušwa ke molata yo bohlale, e a tlo go mo abela bohwa le bana babo.

₃Meubeng go lekwa tshipitshehla; mollong go lekwa tshipikhwibidu; Molekapelo ke Morena.

₄Mosenyi o kwa melomo e kgopo; moaketši o kwa leme la ditshele.

₅Bakwerammotlana ba goboša Mmopi wagwe; mothabelatkotsi a ka se hloke kotlo.

₆Seala bogolong ke ditlogolwana; pheta tša bana ke botatabo.

₇Lentšu la senna le ronana le lešilo; la maaka le ronana le morwa wa kgoši.

₈Mpho, mong wa yona o re ke talama; o re e nkgoniša tšohle tše ke di nepago.

₉Mmoelanyi o nyaka leratano; moepollataba o šitanya le bagwera ba bohloko.

₁₀Wa tlhaologanyo o kwa kgalemelo; mola tlatla se paletše kgati tše lekgolo.

₁₁Senganga se tsoša mereba; se tlo tlelwa ke motseta wa sehlogo.

₁₂A nke ke se gahlane le setlatla botlatleng bja sona; go kaone ke gahlana le sebata seamogwabana.

₁₃Molefetšabolokabobe, bobe ka lapeng la gagwe ga bo tloge.

₁₄Borumolang ke go thulela meetse nthoba; tšhaba, ntwa e sešo ya befa.

₁₅Molwelasesenyi le motšwamoloki, Morena o ba nyenya bohle.

₁₆Theko e reng atleng sa lešilo? Le re ke reka bohlale, le se ne mogopolo.

₁₇Mogwera ke moratwa wa ka mehla; ke ngwanešo e a ntswaletšwego wa mohla wa tlalelo.

₁₈Motho wa go hloka mogopolo ke phanadiatla, a itlema ka tša yo a sa tsebjego.

₁₉Morataphapang o rata karogo; motlotlometšalemati o itlholela go welwa.

₂₀Pelokgopo, tše bolo ga e di hwetše; leme la sehwirihwiri le wela bošuleng.

₂₁Motswalasetlatla o rwele bothata; tatagolešilo ga a na go thaba.

₂₂Pelo e thabilego ke sehlarehlare; majapelo a otiša mmele.

₂₃Yo kgopo o tšea tsogolekobong; o senya tsela ya moahlolelo.

₂₄Yo tlhaologanyo o itebanya le bohlale; lešilo, mahlo a lona a kua morumong wa lefase.

₂₅Ngwana wa setlatla, monyamišatatagwe, motswadi wa gagwe o babja ke pelo.

₂₆Go lefiša le yo bolo go befile, gagolo ge go otlwa ba bagolo.

₂₇Matseba ga se mmolabodi; molemogi o pelokeledi.

₂₈Le lešilo le ka sengwa yo bohlale, ge le homola; ge le sa ahlame, ba ka re le a tseba.