DIEMA 10

₁Diema tša Salomo. Ngwana yo bohlale o kgahla tatagwe; mme ngwana wa lešilo o nyamiša mmagwe.

₂Thuokgopo ga e tswale; toko e efoša lehu.

₃Morena ga a latše moloki le tlala; o hlaswa bojato bja babe.

₄Go diila moitšimeletši; lehumo ke la tsogo la seroto.

₅Ngwana maano mokgobadijolehlabula; serokoroko sa punong se leša dihlong.

₆Ditšhegofatšo ke tša hlogo ya moloki; melomo ya babe e uta bošoro.

₇Ina la moloki e šala e le la ditšhegofatšo; la e mobe le a bola.

₈Wa pelo e bohlale o dumela tayo; wa melomo ya bošilo o tlo ušwa.

₉Wa tselathwii o swere ya go iketla; wa tselakgopo ba tlo mo hwetša.

₁₀Wa go kobonya ka mahlo o a nyamiša; wa melomo ya bošilo o tlo ušwa.

₁₁Molomo wa moloki ke mothopo wa bophelo; melomo ya babe e uta bošoro.

₁₂Lehloyo le tsoša phapang. Lerato le bipa dikarogo tšohle.

₁₃Molomo wa mohlaloganyi o hwetšwa o ne bohlale; mokokotlo wa setlatla, o tlo hwetšwa o nne kgati ya wona.

₁₄Ba bohlale ke bahumatsebo; molomo wa lešilo, tšhego e kgaufsi.

₁₅Thoto ya mohumi ke sebo sa gagwe; tšhego ya badiidi ke bosenyegelo.

₁₆Thuo ya moloki e a mo phediša; khumo ya e mobe e iša sebeng.

₁₇Mootolathuto o swere tsela ya bophelo; palabalai o a timela.

₁₈Melomo ya maaka e uta lehloyo; mokwalakwatšatshele ke yena lešilo.

₁₉Boati bja phoko ga bo hloke diphapogo; matsebe o swara molomo.

₂₀Leleme la moloki ke lehumohumo; pelo ya e mobe ke lefela.

₂₁Melomo ya moloki e lapološa ba bantši; mašilo a hwa ka go hloka mogopolo.

₂₂Khumišo ke ditšhegofatšo tša Morena; ga e tlale ka go itapiša.

₂₃Lešilo le senya le sega; monna wa tlhaologanyo sa gagwe ke bohlale.

₂₄Yo mobe o welwa ke tše a bego a di šia; moloki o newa se a bego a se belaela.

₂₅Ledimo ge le fetile, le e mobe o ile; moloki o thekgilwe, o dula a le gona.

₂₆Tše tata le di dirago meno, tše muši o di dirago mahlo, ke tše sebodu se di dirago ba ba mo romago.

₂₇Go boifa Morena go phediša galele; nywaga ya babe e a kgaotšwa.

₂₈Kholofelo ya baloki ke lethabo; tše ba babe ba di botilego di a loba.

₂₉Tsela tša Morena di khutiša ba lokago; di lahla ba go dira bobe.

₃₀Moloki ga a šuthe neng le neng; ba babe ga ba dule, naga ga e be ya bona.

₃₁Molomo wa yo bolo o hloga bohlale; leleme la ditshele le tla loba.

₃₂Melomo ya yo bolo e tseba tše di thabišago, ya babe ke ya ditshele.