DIEMA 1

₁Diema tša Salomo morwa wa Dafida kgoši ya Isiraele.

₂Ke tša go tseba bohlale le thuto, tša go hlatha dipolelo tša tlhaologanyo, ₃go amogelwe thuto le tlhalefo le bothakga le molao le tše bolo, ₄mohlokatsebo a fiwe maano, sogana le fiwe tsebo le kelelo. ₅Yo bohlale o tlo di kwa, a atelwa ke mahlale; le wa maitse a huma dikeletšo, ₆a hlaloganya puo ya diema le merero, le mmolelelo wa bahlale, le diphiri tša bona.

₇Go boifa Morena ke gona go thoma tsebo. Bohlale le thuto di nyatšwa ke mašilo.

₈Ngwanaka! Theetša tayo ya tatago; o se nyatše thuto ya mmago. ₉Tšonatšeo e tlo ba seala se se rategago mo hlogong ya gago, le pheta molaleng wa gago.

₁₀Ngwanaka! Ge badiradibe ba go gokeletša, o gane. ₁₁Ge ba re: E riye, re lalele madi, re fo khukhunetša motho a se na molato, ₁₂ba phelago re ba metše bjalo ka lebitla, ba go loka a ba etše ba go theogela mabitleng, ₁₃re yo hwetša thoto yohle ya matsaka, mme nywako ya rena e tla tlala dithebola, ₁₄ba re: Kwana le rena, re hlakanele khwama setee ka moka.

₁₅Ngwanaka! Se sware ka tsela ya bona; iletša leoto la gago mebila ya bona. ₁₆Gobane maoto a bona a kitimela bobe; ba kganyela go yo thula madi. ₁₇Go thea molaba, nonyana tšohle di go bona, e tla ba lefela. ₁₈Mme bona ba lakaka madi a gabobona, ba tsoma maphelo a gabo. ₁₉Ke tšona ditsela tša bohle ballaleru; le tlo ba la amoga beng ba lona bophelo.

₂₀Bohlale bo gowa bo le kua ntle; bo hlaboša lentšu kwa mapatlelong. ₂₁Bo goeletša bo le gare ga mabotho; bo kwatša polelo ya bjona mo kgorong ya motse.

₂₂Bo re: Hee lena mašilo, le tlo kgaotša neng go rata tša bošilo? Hee lena bakweri, le tlo lesa neng go kgahlwa ke dikwero? Hee lena ditlatla, le tlo lesa neng go nyatša tsebo? ₂₃Gomang, le theeletše tsholo tša ka. A nke ke le botše tše di mpabago pelong, ke le anegele taba ya ka. ₂₄Ka gobane ke biditše, mme la gana; ka na ka emiša letsogo la ka, ka hloka wa go šetša. ₂₅Le nyaditše dikeletšo tša ka tšohle, la gana ge ke le sola. ₂₆Mme nna ke tla sega ge le wetšwe ke mathata, ka le kwera ge le tletšwe ke tše di tšhošago. ₂₇Ke tlo sega tšhogo e le wetše boka sesesedi, mme mathata a le tlela wa ledimo, mohla le welwago ke dikotsi le tlalelo. ₂₈Gona ba tlo mpitša, ke se sa araba. Ke mo ba tlogo go ntsomage, ba se sa nkhwetša; ₂₉ka gobane ba hloile tsebo, go boifa Morena ba sa ka ba go rata; ₃₀ba ganne dikeletšo tša ka; ba nyaditše tsholo tšaka tšohle. ₃₁Bjale ba ja kenyo tša mekgwa ya bona, ba khora merero ya bona. ₃₂Ditlatla di ipolaiša go hlanoga, mašilo a senyega ka go se kgathale. ₃₃Ge e le eo a kwago nna, o tlo dula a iketla, o ikagela a sa šie kotsi.