Go tia matla le go thaba Moreneng; Paulo o leboga Bafilipi ge ba mmabaletše
1Ke gona, bana bešo, lena baratwa ba ke ba hlologetšwego, ba le lego lethabo la ka le mphapahlogo wa ka, emang le tie Moreneng ka mokgwa woo, lena baratwa ba ka.
2Ke eletša Ebodia, le Sintike ke a no eletša, ke re ba kwane Moreneng. 3Ee, le wena o lego modiriši wa ka wa makgonthe, ke go kgopela gore basadi bao o ba boelanye; ke bona ba bego ba ema le nna ba nthuša modirong wa Ebangedi, ba na le Klemensi le ba bangwe badiriši ba ka, bao maina a bona a lego pukung ya bophelo.
4Thabang Moreneng ka mehla! Ke boela ke re: Thabang!
5Boleta bja lena a bo tsebje bathong bohle. Morena o kgauswi. 6Le se ke la belaela selo. Mo go kago ba le tše le di nyakago, le di tliše pele ga Modimo ka kgopelo le ka thapelo e nago le tebogo. 7Gomme khutšo ya Modimo, ye e fetago tlhaologanyo yohle, a e boloke dipelo tša lena le kgopolo tša lena go Kriste Jesu.
8Banabešo! Ke fetša ka go re: Išang megopolo le tše e lego therešo, le tše e lego bokwala, le tše e lego toko, le tše e lego pelothereši, le tše di yago ka lerato, tša tumo e botse, tše e lego bolo, tše di kago ratiwa, e be tšona le di naganago. 9Le dire tše le di rutilwego la di amogela, la kwa tšona; tše le bonego nna ke di dira, dirang tšona; gomme Modimo wa khutšo o tlo ba le lena.
10Ke thabile gagolo Moreneng ge le phafogetše gape go nkgopola, le ge le sa ka la lesa go nkgopola; eupša le hlokile sebaka. 11Ge ke realo ga se gore ke bega tšhego; nna ke ithutile go kgolwa ke tše ke nago le tšona. 12Bobotlana ke a bo tseba; le motlalo ke a o tseba. Ke tlwaetše tšohle, ka ba go hora le go kwa tlala; e ka ba go tlalelwa ke dilo, e ka ba go di hloka. 13Ke kgona tšohle ka eo a mphago maatla, yena Kriste.
14Gomme le dirile gabotse ge le nthwadiša ditlaišego tša ka. 15Le lena Bafilipi le a tseba, gore mola mathomong a modiro wa Ebangedi, ge ke tloga moo Matsedonia, go be go se phuthego e nngwe e bego e balelana le nna matseno le matšo a dineo, ge e se lena. 16Gobane mola ke le motseng wa Thesalonika, ga se gatee, ke gabedi le nthomela tše ke bego ke di hloka. 17Ge ke realo ga se gore ke inyakela dineo; se ke se nyakago ke seenywa se se tlo go tlatša palo ya tše di tšwago go lena. 18Ke di amogetše tšohle, mme ke hwetša e le tše ntši, di ntlaletše ge tše di tšwago go lena ke di amogela go Epaforodito, e le seorelo se monate, e le sebego se se rategago, se se kgahlago Modimo. 19Gomme Modimo wa ka o tlo tlatša mo lena le kago hloka, ka ge e le yena mohumi wa letago ka Kriste Jesu. 20Yena Modimo Tata wešo a a retwe go iša mehleng ya neng le neng. Amene.
21Dumedišang bakgethwa ka moka ba Kriste Jesu. Bana bešo ba ke nago nabo ba a le dumediša. 22Bakgethwa bohle ba a le dumediša, gagolo ba ngwako wa Kesara.
23Kgaugelo ya mong wa rena Jesu Kriste a e be le lena ka moka. Amene.
