Moloko wa Arone, Modiro wa Balefi; palo ya bona; thokollo ya bona
1Ba leloko la Arone le Moshe, ba ba bego ba le gona mehleng yela Morena a boletšego le Moshe thabeng ya Sinai, šeba: 2E lego maina a bana ba Arone šea: Wa pele ke Nadaba; a hlatlangwa ke Abihu, le Eleasara, le Ithamara. 3Ke ona maina a barwa ba Arone ba baperisita ba ba tloditšwego ba gafelwa modiro wa baperisita. 4Nadaba le Abihu bona ba hwile pele ga Morena mola ba tlišitše mollo o šele pele ga Morena kua lešokeng la Sinai. Bona ba be ba se na bana. Eleasara le Ithamara ba dirile modiro wa baperisita ba lebeletšwe ke Arone tatabo.
5Morena o boletše le Moshe a re: 6Batametša ba leloko la Lefi o ba gafele Arone moperisita gore ba mo diriše. 7Ba hlokomele tša madišo a gagwe, le tša madišo a phuthego ka moka mo pele ga Ngwako wa Kgwerano, gore ba dire mediro ya Ntlong yeo. 8Ba hlokomele le thoto ka moka ya Ngwako wa Kgwerano, le tša madišo a Baisiraele, gore ba dire mediro ya Ntlong yeo. 9Balefi o ba gafele Arone le barwa ba gagwe. Ba hlaotšwe go Baisiraele, mme ba gafetšwe yena sa ruri. 10Arone le barwa ba gagwe o ba hlaole gore ba hlokomele boperisita bja bona; gomme o šele e a kago batamela a bolawe. 11Morena o boletše le Moshe a re: 12nna ke tšere Balefi mo go Baisiraele bakeng sa maitšibulo ka moka a a belegwago mo go Baisiraele. Balefi ke ba ka. 13Ka gobane maitšibulo ka moka ke a ka. Mohla wola ge ke bolaya maitšibulo ka moka a Baegipita, ke ikgethetše maitšibulo ka moka a Isiraele, a batho le a dikgomo, gore e be a ka, nna Morena. 14Morena o boletše le Moshe lešokeng la Sinai a re: 15Bala Balefi ka lešika la bona le ka leloko la bona. O bale ba batona ka moka ba ba feditšego kgwedi e tee le go fetiša. 16Gomme Moshe a ba bala ka mo Morena a mmoditšego, ka mo a laetšwego ka gona. 17Barwa ba Lefi ka maina a bona e be e le Gerisone, le Kahathe, le Merari. 18Maina a barwa ba Gerisone, mašika a bona, ke Lebini le Simei. 19Barwa ba Kahathe, mašika a bona, ke Amorama, le Jitsehara, le Heburone, le Usiele. 20Barwa ba Merari, mašika a bona, ke Mahali le Musi. Ke yona meloko ya Balefi ka mašika a bona.
21Ke gore Balebini le Basimei ke ba leloko la Gerisone. Ke bona ba leloko la Gerisone. 22Ba ba badilwego ba bona, ge go iwa ka palo ya ba batona ka moka, go thoma ka masea a kgwedi e tee go iša go ba bagolo, ba ba badilwego ke ba dikete tše di šupago, le makgolo a mahlano. 23Ba mašika a Gerisone a ba hlome mešaša ka nthago ga Ntlokgethwa ka thoko ya bodikela. 24Letona la ba leloko la Gerisone ke Eliasafa morwa wa Laele. 25Ge e le ka Ngwakong wa Kgwerano modiro wa Bagerisone ke go hlokomela Ntlokgethwa, le dirulelo tša yona, le lešira la mojako wa Ngwako wa Kgwerano, 26le mašela ka moka a go šira lapa, le lešira la sefero sa lapa le le dikanetšago Ngwako le aletare thoko tšohle, le dithapo ka moka tša go dira fao.
27Go Kahathe go tšwile ba lešika la Amorama, le la Jitsehara, le la Heburone, le la Usiele. Ke yona meloko ya Bakahathe. 28Palo ya ba batona ka moka, go thoma ka masea a kgwedi go iša go ba bagolo, e be e le ba dikete tše seswai le makgolo a selelago, ba go hlokomela madišo a sekgethwa. 29Bakahathe ka mašika a bona ba hlome mešaša ya bona Ntlongkgethwa ka lehlakoreng la thoko ya borwa. 30Letona la Bakahathe ke Elisafane morwa wa Usiele. 31Ke bona ba go hlokomela polokelo, le sethalana, le sehlomapone, le dialetare, le dibjana tše kgethwa tša go dira ka tšona, le lešira, le mediro ya gona.
32Letona la matona a Balefi ke Eleasara morwa wa Arone moperisita; ke yena molebeledi wa ba ba hlokomelago madišo sekgethweng.
33Go Merari go tšwile leloko la Mahali, le la Musi; ke yona meloko ya ba Merari. 34Ba ba badilwego mo go bona, ge go iwa ka palo ya ba batona ka moka, go thoma ka masea a kgwedi go iša go ba bagolo, ke ba dikete tše di selelago le makgolo a mabedi. 35Letona la ba moloko wa ba Merari ke Tsuriele morwa wa Abihaili. Ba hloma mešaša ya bona lehlakoreng la Ntlokgethwa ka thoko ya lebowa. 36Modiro wo ba Merari ba o gafetšwego ke go hlokomela mamati a legwakgwa la Ntlokgethwa, le dipalelo tša lona, le dikokwane tša yona, le maotwana a tšona, le thoto ka moka ya yona, le tša mediro ya gona, 37le dikokwane ka moka tša go dikanetša lapa le maoto a tšona, le dimapolo tša tšona, le dithapo tša tšona.
38Ba go hloma mešaša pele ga Ntlokgethwa, ka thoko ya bohlabela, mo go lebago Ngwako wa Kgwerano, ka thoko ya bohlabatšatši, ke Moshe le Arone le barwa ba gagwe. Ke bona ba go hlokomela madišo a sekgethweng, madišo a Baisiraele. O šele e a kago batamela a bolawe. 39Ka moka ba ba badilwego ba Balefi, ba ba badilwego ke Moshe le Arone ka taelo ya Morena mme gwa iwa ka mašika a bona, gwa balwa ba batona ka moka, gwa thongwa ka masea a kgwedi e tee gwa išwa go ba bagolo, e be e le dikete tše masome a mabedi a metšo e mebedi.
40Morena a bolela le Moshe a re: Bala ba maitšibulo ka moka a ba batona ka moka mo go Baisiraele, 41O thome ka masea a kgwedi e tee o iše go ba bagolo, gomme o ntšhe palo ya maina a bona. 42Gomme nna Morena o nkgethele Balefi sebakeng sa maitšibulo ka moka a Baisiraele, le dikgomo tša Balefi sebakeng sa maitšibulo a dikgomo tša Baisiraele. 43Gomme maitšibulo ka moka a ba batona, go ya ka palo ya maina, go tloga ka masea a kgwedi e tee go iša go ba bagolo, ba ba badilwego mo go bona e be e le dikete tše masome a mabedi a metšo e mebedi, le makgolo a mabedi a nago le masome a šupago le metšo e meraro.
44Bjalo Morena a bolela le Moshe a re: 45Balefi ba tšee sebakeng sa maitšibulo ka moka a Baisiraele, le dikgomo tša Balefi sebakeng sa dikgomo tša bona; ka gobane Balefi ke ba ka, nna Morena. 46O tšee le thekololo ya bao ba makgolo a mabedi a masome a šupago a nago le metšo e meraro, ba ba fetago palo ya Balefi, ba e lego maitšibulo a Baisiraele. 47O tšee sekele tše tlhano bakeng sa motho o tee; o tšee ka sekele ya sekgethwa e nago le gera tše masome a mabedi. 48Tšhelete yeo ya go lopolla ba ba fetago palo ya bona o e nee Arone le barwa ba gagwe. 49Gomme Moshe a tšea tšhelete ya go lopolla bao ba ba fetago palo ya ba ba lopolotšwego ke Balefi. 50Tšhelete yeo, e lego sekele tše sekete le makgolo a mararo a nago le masome a selelago a metšo e mehlano, o di tšere go maitšibulo a Baisiraele ka sekele ya sekgethwa. 51Tšhelete ye ya ba ba hunolotšwego Moshe o e neile Arone le barwa ba gagwe ka mo Morena a mo laetšego ka gona.
