NUMERI 27

₁Gwa batamela barwedi ba Tselofagadi morwa wa Hefere motlogolo wa Gileada morwa wa Magiri motlogolo wa Manase; ke ba mašika a Manase morwa wa Josefa. Maina a barwedi ba gagwe e be e le Mahla, le Noa, le Hogola, le Milika, le Thiritsa. ₂Bona ba tlile pele ga Moše le Eleasara moperisita, le pele ga bagolo ba phuthego ka moka mojakong wa Ngwako wa Kgwerano, ba re: ₃Tatawešo o hwile re sa le lešokeng; gomme e be e se e mongwe wa lešaba lela la Kora le le tsogetšego Morena. O hwile ka dibe tša gagwe; gomme o be a se na barwa. ₄Bjale leina la tatawešo le ka fo hwa bjang mo lešikeng la gagwe ka ge a sa ka a ba le morwa? Re nee madulo a a re swanetšego mo go bana ba botatawešo.

₅Moshe a iša taba yeo go Morena. ₆Morena a fetola a botša Moshe a re: ₇Barwedi ba Tselofagadi ba a rereša; ba arolele naga ye e ba swanetšego mo go bana babotatabo; gomme naga ye e bego e swanetše go ba ya botatabo e be ya bona. ₈Gomme Baisiraele o ba botše o re: Ge monna a ka hwa a se na morwa, le neeleng morwedi wa gagwe bohwa bja gagwe. ₉Ge a se na morwedi, ke mo le tlogo neela banababo bohwa bja gagwe. ₁₀Ge a se na banababo, gona le nee bana babotatagwe bohwa bja gagwe. ₁₁Ge tatagwe a se na banababo, gona le neele e mongwe wa moloko wa gabo bohwa bja gagwe, e a ka bago kgauswi le yena; bo tšewe ke yena yeo. A e be molao o tiilego mo go Baisiraele, ka mo Morena a laetšego Moshe.

₁₂Morena o boletše le Moshe a re: Rotogela mo thabeng ya Abarimi o bone naga ye ke e neetšego Baisiraele. ₁₃E tlo re ge o e bone, ke mo le wena o tlogo gorošwa go ba geno bjalo ka Arone mogolwago. ₁₄Ke ka gobane kua lešokeng la Sini, mola phuthego e dira ka kgang, ga la ka la dira se ke le boditšego sona, la lesa go ntira e mokgethwa ka taba yela ya meetse, batho ba lebeletše. Ke tša meetse ala a Meriba a kua Kadese lešokeng le Sini.

₁₅Moshe a bolela le Morena a re: ₁₆A ke Morena, Modimo wa meoya ya batho bohle a bee monna wa go buša phuthego ye, ₁₇e a kago ba eta pele ge ba tšwa le ge ba tsena, e a tlogo ba ntšha mme a ba goroša, gore phuthego ya Morena e se ke ya ba bjalo ka dinku tše di se nago modiši.

₁₈Morena a botša Moshe a re: Tšea Joshua morwa wa Nuni; ke monna yo moya o lego go yena, o mmee seatla sa gago. ₁₉O mmee pele ga Eleasara le pele ga phuthego ka moka, gomme o mo laye ba le gona. ₂₀O mo arolele borena bja gago, gore phuthego ka moka ya Baisiraele e mo kwe. ₂₁A a fele a ema pele ga Eleasara moperisita, gore a mo nyakele phetolo go Morena ka mokgwa wa Seetša le Toko, gore ba tšwe ba boditšwe ke yena, ba boe ba boditšwe ke yena; Baisiraele ka moka ba be le yena, phuthego ka moka. ₂₂Gomme Moshe a dira ka mo Morena a mo laetšego ka gona, a tšea Joshua a mo emiša pele ga Eleasara moperisita le pele ga phuthego ka moka. ₂₃A mmea diatla a mo laya bjalo ka ge Morena a boletše ka Moshe.