Diema tša Bileama. Naledi ya Jakobo
1Bileama ge a bona gobane Morena o rata ge Baisiraele ba šegofatšwa, a se ke a hlwa a dira tša maphalo bjalo ka peleng; a fo lebiša sefahlogo sa gagwe lešokeng; 2a lebelela, a bona Baisiraele ba dutše mešašeng ka meloko ya bona, mme a tlelwa ke moya wa Modimo; 3a hlaba seema sa gagwe a re:
Go bolela Bileama morwa wa Beoro.
Go bolela monna wa go budulolwa mahlo.
4Go bolela mokwi wa polelo tša Modimo,
mmoni wa dipono tša Ramaatla,
mmudulolwamahlo ge a lotšha.
5E botse bjang mekutwana ya gago,
hee Jakobo!
Meago ya gago, Isiraele, ga se ka botse!
6Ke mehlaka e eya, ke mašemo dinokeng,
ke dihlare tša go šengwa ke Morena,
merokwana hleng ga meetse.
7Meeta ya bona e falala meetse;
Ba lemile mo meetse a atago.
Kgoši ya bona e feta Agaga;
Mmušo wa bona o akaretše.
8Modimo o ba ntšhitše Egipita;
dinaka tša bona di etša tša nare.
Ba tlo di fetša, dilete tša go lwa le bona;
ba tlo di roba marapo;
ba tlo di betša ka mesebe.
9Ba patlame, ba bothile wa ditau,
wa tau tša tshadi, -- di tsošwa ke mang? --
Wa go go atla o tlo atlwa;
wa go go roga o tlo rogwa.
10Ya ba gona Balaka a tukilego bogale; a phaphatha diatla, a bolela le Bileama, a re: Se ke go bileditšego sona ke go roga manaba a ka; gomme šedi, ke gararo bjale o ba šegofatša. 11Bjale napa o boele ga geno. Ke be ke re ke tlo go leboga ka tše kgolo; fela, šedi, Morena o go hlokišitše seleboga.
12Bileama a fetola a re: A ga nka ka botša batseta ba gago ba o ba romilego ba tla go nna, ka re: 13Le ge Balaka a ka mpha silifera le gauta e kago tlatša ngwako wa gagwe, taelo ya Morena nka se ke ka kgona go e feta ka thoko ke dira tše botse goba tše mpe ka boithatelo bja pelo ya ka. Ga nka ka re: Ke tlo bolela se Morena a mpotšago sona?
14Bjale gomme ke boela go ba gešo; tlaa ge, ke go utollele se setšhaba se se tlogo dira setšhaba sa gago mehleng e tlago.
15A hlaba seema sa gagwe a re:
Go bolela Bileama morwa wa Beoro.
Go bolela monna mmudulolwamahlo.
16Go bolela mokwi wa polelo tša Modimo,
moitse wa mahlale a Modimodimo,
mmoni wa dipono tša Ramaatla,
mmudulolwamahlo ge a lotšha.
17Ke a mmona; fela, ga se bjale.
Ke a mmoga; fela gakgauswi.
Naledi e tšwa go Jakobo;
molamo wa bogoši o tsoga go Isiraele.
O tlo pšhatla thoko tša Moaba;
o tlo fetša bana ba meferefere bohle.
18La Edomo e tlo ba la gagwe;
la Seire le tlo dulwa ke manaba a lona;
mme Isiraele o tlo tsoša maatla.
19Go Jakobo go tlo hlaga wa go tlo buša,
a fetša batšhabi metseng.
20A leba thoko ya Baamaleke,
a hlaba seema sa gagwe a re:
Amaleke ke wa pele wa ditšhaba.
Tše di tlogo mo tlela ke tšhenyego.
21A leba thoko ya Bakeni, a hlaba
seema sa gagwe a re:
Moago wa gago le ge o tiile,
le ge o agile sehlaga lentsweng,
22le ge go le bjalo, Kaine, sa gago ke
go fišwa.
E tlo ba neng ge o tlo thubja ke Asuri?
23A buša a hlaba seema sa gagwe a re:
Joo, go tlo phela mang mohla
Morena a dirago tšeo!
24Thoko ya Bakhithima go hlaga ditshediši;
di hlohla Baasuri; di hlohla Bahebere.
Fela, le bona, boyo ke tshenyego.
25Gomme Bileama a tsoga a wela tsela, a boela gae. Balaka le yena a tloga ka tsela ya gagwe.
