NUMERI 15

₁Morena o boletša le Moshe a re: ₂Bolela le Baisiraele o re: Ge le tsene mo nageng ye ke tlogo le nea yona ya ba magae a lena, ₃mme la rata go tliša tša mello ya Morena, e lego dihlabelo, le didimo, le tša phethakeno, le tša go ithapa, le ge e le tša menyanya ya lena, e le go direla Morena tša monko o bose ka dikgomo le ka dinku, ₄gona e a tlišago sebego sa gagwe go Morena, a tliše le neo ya dijo, e lego ntlatla ya bupi bjo bo nago le lefiswana la makhura. ₅A tliše le sebego sa beine ka lefiswana gotee le sehlabelo le ge e le sedimo sa kwanyana e tee. ₆Gomme ge e le kgapana, sebego sa dijo a tliše bupi ka serotwana le makhura ka pitšana. ₇Le beine ya sebego a tliše ka pitšana, e be tša monko o bose go Morena. ₈Ge o tliša powana ya sehlabelo le ge e le ya sedimo, e le ya go phetha keno, le ge e le seleboga sa Morena, ₉ge e le powana, gona sebego sa dijo o tliše seroto se se tletšego bupi le moetana wa makhura. ₁₀Beine ya sebego o tliše ka moetana, e be tša mello ya Morena tša monko o bose.

₁₁Go dirwe ka mokgwa woo ge e le kgomo e tee, le ge e le kgapana e tee, le ge e le kwanyana e tee, le ge e le putšanyana e tee. ₁₂Dibego le di lebanye le tše le di hlabago. Le dire ka mokgwa woo, le ye ka palo ya tše le di tlišago. ₁₃Bohle ba gae le ba dire ka mokgwa woo ge ba tliša mello ya Morena, tša monko o bose. ₁₄Le modiiledi e a nago le lena, le ge e le wa moloko wa geno, ge a rata go tliša tša mello ya Morena, tša monko o bose, a dire ka mo lena le dirago ka gona. ₁₅Le be le mokgwa o tee wa ba phuthego, le wa moeng e a dutšego go lena; e be molao wa ka mehla mo melokong ya lena, molao wa go re: Modiiledi a be bjalo ka lena pele ga Morena. ₁₆E be molao o tee, le mokgwa o tee go lena le go motho e a diiletšego go lena.

₁₇Morena o boletše le Moshe a re: ₁₈Bolela le Baisiraele o ba botše o re: Ge le tsene mo nageng ye nna ke le išago go yona, ₁₉mohla le jago bogobe bja naga yeo, le ntšhetšeng Morena neo. ₂₀Le nthše neo, senkgwa sa bupi bja mabele a mafsa. Le ntšhe neo ye bjalo ka ge go ntšhiwa neo ya seboa. ₂₁Le ntšhetšeng Morena neo ya bupi bja mabele a mafsa go iša ditlogolong tša lena.

₂₂E re ge le ka tšhoga le sentše le sa ka la phetha melao yohle ye Morena a e boditšego Moshe, ₂₃tšohle tše Morena a le laetšego tšona ka Moshe, go tloga letšatšing le Morena a di boletšego ka lona, go iša pele ditlogolong, ₂₄e re ge sebe se direlwe ka go thelela, phuthego e sa tsebe, gona phuthego ka moka e tliše powana ya sehlabelo sa monko o bose go Morena gotee le sebego sa yona sa dino ka mo go swanetšego; e tliše le phoko ya seloba. ₂₅Moperisita a direle phuthego ka moka ya Baisiraele poelanyo; gomme ba tlo lebalelwa gobane e be e se ka boomo, le ka gobane ba tlišeditše Morena sebego sa mello ya Morena, le seloba sa Morena ka baka la go timela ga bona. ₂₆Phuthego ka moka ya Baisiraele e tlo lebalelwa, le ge e le motho e a diiletšego go bona, ka gobane setšhaba ka moka se tšhogile se sentše.

₂₇Ge go sentše motho o tee a sa dira ka boomo, a tliše sethojana sa pudi sa ngwaga o tee, e be seloba sa gagwe. ₂₈Motho e a sentšego a sa dira ka boomo, moperisita a mo direle poelanyo ka baka la sebe se a rumotšego Morena ka sona ka go thelelwa; a mo direle poelanyo a lebalelwe. ₂₉E ka ba motho wa gae wa Moisiraele, e ka ba motho e a diiletšego mo go lena, ge ba direle sebe ka go thelelwa, le dire ka molao o tee.

₃₀Fela, motho e a senyago ka boomo, e ka ba wa gae, e ka ba modiiledi, o goboša Morena, a kgaolwe setšhabeng sa gabo; ₃₁ka gobane o nyaditše tše di boletšwego ke Morena, o sentše molao wa gagwe; motho e mobjalo a a kgaolwe sa ruri, a rwale molato wa gagwe.

₃₂E kile ya re ge Baisiraele ba le lešokeng, ba hwetša monna e mongwe a rwalela dikgong ka letšatši la Sabatha. ₃₃Ba ba mmonego a rwalela dikgong, ba mo tliša go Moshe le go Arone le go phuthego ka moka. ₃₄Ba mo iša kgolegong, ka gobane go be go sešo gwa ba le kahlolo ya gore a ka dirwa eng. ₃₅Gomme Morena a botša Moshe a re: Monna eo a bolaelwe ruri; phuthego ka moka e mo thume ka mabje kua ntle ga mešaša. ₃₆Phuthego ka moka ya napa ya mo iša kua ntle ga mešaša ya mo thuma ka mabje; a hwa bjalo ka ge Morena a laetše Moshe.

₃₇Morena o boletše le Moshe a re: ₃₈Bolela le Baisiraele o ba botše o re, ba dire matobolo mo dintlheng tša diaparo tša bona; le ditlogolo tša bona di dire bjalo. Mo letobolong ba tlemelle lenti la purapura e tala. ₃₉Le apare matobolo ao, gore ge le a bona le gopole melao ya Morena yohle, la dira ka mo e boletšego ka gona, gore le se arogele go tše di kgahlišago dipelo tša lena le mahlo a lena, tše di kago le iša bootsweng. ₄₀Le se ke la lebala, gee, go dira ka melao ya ka ka moka; le be bakgethwa ba Modimo wa lena. ₄₁Modimo wa lena ke nna Morena. E a le ntšhitšego nageng ya Egipita, gore a be Modimo wa lena, ke nna Morena Modimo wa lena.