NEHEMIA 7

₁Ge morako o šetše o agilwe, ka thwela mamati, gwa ba gwa bewa bahlapetši le baopedi ba Balefi. ₂Nna ka laela Hanani ngwanešo, le Hananya molaodi wa sebo sa Jerusalema, gobane e be e le monna e a botegago, e a boifago Modimo go fetiša ba bantši, ₃ka ba rera ka re: Dikgoro tša Jerusalema di se ke tša bulwa ge go sešo gwa ruthela; mme e tswalelwe bahlapetši ba sa eme ntshe; le di tswalele le tiiše; mme baleti e be ba ba agilego Jerusalema; e mongwe le e mongwe a be le tišo ya gagwe mo go lebanego ngwako wa gagwe.

₄Bjale motse wa Jerusalema o be o namile thoko tšohle, e le o mogolo, mme batho ba gona ba be ba se nene; mme nywako yona e be e sešo ya agiwa. ₅Modimo wa ka a nkeletša gore ke bothe ba bagolo ba setšhaba le bakgoma, gore ke ba ngwale ka go ya ka meloko ya bona; ka hwetša lengwalo le meloko ya ba ba tlilego mola pele; ka hwetša ba ngwadilwe ka go re:

₆Batho ba selete se, ba ba rotogilego ba etšwa kgolegong ya bothopša, bao Nebukadinetsara kgoši ya Babele a bego a ba thopile, mme ba boela Jerusalema le Juda, ba boela metseng ya bona ka moka. ₇Ba tlile le Serubabele, le Jeshua, le Nehimia, le Asaria, le Raamia, le Nahamani, le Moredokai, le Bilisani, le Misiperethe, le Bigifai, le Nehuma, le Baana, Palo ya banna ba setšhaba sa Isiraele še:

₈Ba ga Pareose ke ba dikete tše pedi le lekgolo le nago le masome a šupago a metšo e mebedi. ₉Ba ga Sefatya ke ba makgolo a mararo a nago le masome a šupago a metšo e mebedi. ₁₀Ba ga Arahe ke ba makgolo a selelago a nago le masome a mahlano a metšo e mebedi. ₁₁Ba ga Phalathe-Moaba ba ga Jeshua le ba ga Joaba ke ba dikete tše pedi le makgolo a seswai a nago le lesome la metšo e seswai. ₁₂Ba ga Elama ke ba sekete se nago le makgolo a mabedi a nago le masome a mahlano a metšo e mene. ₁₃Ba ga Sathu ke ba makgolo a seswai a nago le masome a mane a metšo e mehlano. ₁₄Ba ga Sakai ke ba makgolo a šupago a nago le masome a selelago. ₁₅Ba ga Binui ke ba makgolo a selelago a nago le masome a mane a metšo e seswai. ₁₆Ba ga Bebai ke ba makgolo a selelago a nago le masome a mabedi a metšo e seswai. ₁₇Ba ga Asigadi ke ba dikete tše pedi le makgolo a mararo a nago le masome a mabedi a metšo e mebedi. ₁₈Ba ga Adonikama ke ba makgolo a selelago a nago le masome a selelago a metšo e šupago. ₁₉Ba ga Bigifai ke ba dikete tše pedi di nago le masome a selelago a metšo e šupago. ₂₀Ba ga Adina ke ba makgolo a selelago a nago le masome a mahlano a metšo e mehlano. ₂₁Ba ga Atere ba Hiskia ke ba masome a senyane a metšo e seswai. ₂₂Ba ga Hasuma ke ba makgolo a mararo a nago le masome a mabedi a metšo e seswai. ₂₃Ba ga Betsai ke ba makgolo a mararo a nago le masome a mabedi a metšo e mene. ₂₄Ba ga Harifa ke ba lekgolo le nago le lesome la metšo e mebedi. ₂₅Ba Gibeoni ke ba masome a senyane a metšo e mehlano. ₂₆Banna ba Betlehema le Netofa ke ba lekgolo le masome a seswai a metšo e seswai. ₂₇Banna ba Anathothe ke ba lekgolo le nago le masome a mabedi a metšo e seswai. ₂₈Banna ba Bethe-Asimafethe ke ba masome a mane a metšo e mebedi. ₂₉Banna ba Kireathe-Jearima le ba Kafira le Beerothe ke ba makgolo a šupago a nago le masome a mane a metšo e meraro. ₃₀Banna ba Rama le Gaba ke ba makgolo a selelago a nago le masome a mabedi a motšo o tee. ₃₁Banna ba Mikimase ke ba lekgolo le nago le masome a mabedi a metšo e mebedi. ₃₂Banna ba Bethele le Ai ke ba lekgolo le nago le masome a mabedi a metšo e meraro. ₃₃Banna ba Nebo e mongwe ke ba masome a fetšago seatla a metšo e mebedi. ₃₄Ba ga Elama e mongwe ke ba sekete le makgolo a mabedi a nago le masome a mahlano a metšo e mene. ₃₅Ba ga Harima ke ba makgolo a mararo a nago le masome a mabedi. ₃₆Ba Jeriko ke ba makgolo a mararo a nago le masome a mane a metšo e mehlano. ₃₇Ba ga Lodi le Hadidi le Ono ke ba makgolo a šupago a nago le masome a mabedi a motšo o tee. ₃₈Ba ga Senaa ke ba dikete tše tharo le makgolo a senyane a nago le masome a mararo. ₃₉Baperisita šeba: Ba ga Jedaya ba leloko la Jeshua ke ba makgolo a senyane a nago le masome a šupago a metšo e meraro. ₄₀Ba ga Imere ke ba sekete se nago le masome a mahlano a metšo e mebedi. ₄₁Ba ga Pashuri ke ba sekete le makgolo a mabedi a nago le masome a mane a metšo e šupago. ₄₂Ba ga Harima ke ba sekete se nago le lesome la metšo e šupago. ₄₃Balefi šeba: Ba ga Jeshua ba Kadimiele le ba ga Hodoa ke ba masome a šupago a metšo e mene. ₄₄Baopedi ba ga Asafa ke ba lekgolo le nago le masome a mane a metšo e seswai. ₄₅Baletakgoro ba ga Salume le ba ga Atere le ba ga Telamone le ba ga Akuba le ba ga Hatita le ba ga Sobai ke ba lekgolo le tee le nago le masome a mararo a metšo e seswai. ₄₆Bahlanka ba Ntlokgethwa ke ba ga Tsiha, le ba ga Hasufa, le ba ga Tabaothe, ₄₇le ba ga Kerose, le ba ga Sia, le ba ga Phadoni, ₄₈le ba ga Lebana, le ba ga Hagaba, le ba ga Salamai, ₄₉le ba ga Hanane, le ba ga Gidele, le ba ga Gahari, ₅₀le ba ga Reaya, le ba ga Retsini, la ba ga Nekoda, ₅₁le ba ga Gasama, le ba ga Usa, le ba ga Pasea, ₅₂le ba ga Besai, le Bameuni, le Banefusi, ₅₃le ba ga Bakabuki, le ba ga Hakufa, le ba ga Harahuri, ₅₄le ba ga Basilithe, le ba ga Mehida, le ba ga Harisa, ₅₅le ba ga Barakosi, le ba ga Sisera, le ba ga Thama, ₅₆le ba ga Netsia, le ba ga Hatifa. ₅₇Ba bahlanka ba Salomo šeba: Ke ba ga Sotai, le ba ga Soferethe, le ba ga Pherida, ₅₈le ba ga Jaala, le ba ga Darikoni, le ba ga Gidele, ₅₉le ba ga Sefatya, le ba ga Hatili, le ba ga Pokerethe-Hatsebaima, le ba ga Amoni.

₆₀Bahlanka ka moka ba Ntlokgethwa le ba bahlanka ba Salomo ke ba makgolo a mararo a nago le masome a senyane a metšo e mebedi.

₆₁Ba ba bego ba tšwa Thelemela le Theleharesa le Keruba le Adoni le Imere, le bona ba rotoga, fela ba šitwa go laodiša tlhago ya bona le mohuta wa bona ge e le Baisiraele. ₆₂Ba ga Delaya le ba ga Hakotse le ba ga Nekoda e be e le ba makgolo a selelago a nago le masome a mane a metšo e mebedi.

₆₃Ba e bego e le baperisita ke ba ga Habya le ba ga Hakotse le ba ga Barasilai, e a bego a tšere e mongwe wa barwedi ba ga Barasilai Mogileada mme a bitšwa ka lebitšo la bona. ₆₄Bona ba na ba tsoma mangwalo a matswalo a bona, ba a hloka mme ba ntšhiwa boperisiteng. ₆₅Molakanaga a ba botša a re: Le se ke la ja tša sekgethwakgethwa go be go tšwelele moperisita e a nago le seetša le toko.

₆₆Phuthego ka moka ga yona e be e le ba dikete še masome a mabedi le makgolo a mararo a nago le masome a selelago, ₆₇go sa balwe balata ba bona ba banna le ba basadi; bona e be e le ba dikete tše di šupago le makgolo a mararo le masome a mararo a metšo e šupago; le gona go be go na le baopedi ba banna le ba basadi ba makgolo a mabedi a nago le masome a mane a metšo e mehlano. ₆₈Dipitsi e be e le makgolo a šupago a nago le masome a mararo a metšo e selelago; dimeila e be e le tše makgolo a mabedi le masome a mane a metšo e fetšago seatla. ₆₉Dikamela e be e le tše makgolo a mane a nago le masome a mararo a metšo e mehlano; dipokolo e be e le tše dikete tše di selelago le makgolo a šupago a nago le masome a mabedi.

₇₀Gomme ba bangwe ba e lego bagolo ba meloko ba ntšhetša modiro dineo; moaganaga a tšhela diponto tše sekete polokelong, a ntšha meruswi e masome a mahlano, le diaparo tša baperisita tše makgolo a mahlano le masome a mararo. ₇₁Ba bangwe bagolo ba meloko ba tšhela diponto tše dikete tše masome a mabedi polokelong ya modiro, ba ntšha le silifera e ka bago ya diponto tše dikete tše lesome la metšo e meraro. ₇₂Ba bangwe ba setšhaba ba ntšha diponto tše dikete tše masome a mabedi, le silifera e ka bago ya diponto tše dikete tše lesome la metšo e mebedi, le diaparo tša baperisita tše masome a selelago a metšo e šupago.

₇₃Ge e le baperisita, le Balefi, le baletakgoro, le baopedi, le ba bangwe ba setšhaba, le bahlanka ba Ntlhokgethwa, le Baisiraele ka moka, ba be ba dula metseng ya gabo bona.