NEHEMIA 13

₁Mehleng yeo go be go balwa puku ya Moshe setšhaba se theeditše; gwa hwetšwa mo go ngwadilwego gwa thwe: Baamoni le Bamoaba ba se ke ba tla phuthegong ya Modimo le ka mohla o mongwe, ₂ka ge ba sa ka ba gahlanetša Baisiraele ka bogobe le ka meetse, ba ba ba thwala Bileama gore a ba hlolele kotsi; mme mahlolakotsi ao, Modimo wa rena a a fetola a ba ditšhegofatšo. ₃Ya re ge ba ekwa molao woo, ba hlaola ba e lego ba mohuta o šele ka moka.

₄Mehleng yeo ke ge Eliyasiba, moperisita yo e bego e le yena molaki wa diphapoši tša ngwakong wa Modimo wa rena, a šetše a tswalane le Tobia, ₅a mo diretše phapoši e kgolo, ba beile dibego tša dijo ntshe, le dinoko, le dibjana, le tša karolo ya lesome ya mabele le ya mananose a morara le mohlware, tše di bego di laeletšwe Balefi le baopedi le baletakgoro, e le dibego tša baperisita. ₆Ge go dirwa tše bjalo, ke ge nna ke se moo Jerusalema, gobane ka ngwaga wa masome a mararo a metšo e mebedi wa pušo ya Arithasasitha kgoši ya Babele, nna ke be ke ile mošate. Ya re ge go fetile matšatši a sego nene, ka kgopela tsela go kgoši. ₇Ka boela Jerusalema, ka bona bobe bjo bo dirilwego ke Eliyasiba ge a ekelela Tobia, bja ge a mo diretše phapoši lapeng la Ngwako wa Modimo. ₈Bobe bjoo bja ntsheleka gagolo, ka tšea dilo tšeo ka moka tša Tobia ka di lahlela ntle. ₉Ka laela ka re ba thakgafatše phapoši yeo, ka tsebo bea dibjana tša Ngwako wa Modimo mo go yona, le dibego tša dijo le diorelo.

₁₀Ka kwa ge ba re: Balefi ga ba ešo ba ntšhetšwa dikabelo tša bona, le gore Balefi le baopedi, ba e lego ba modiro wa Ntlongkgethwa, ba bile ba tlogile ba ile mašemong. ₁₁Ke mo ke omantšego ba bagolo, ka re: Ngwako wa Modimo o tlogetšwe ka baka lang? Ka bitša Balefi bala ka ba bea modirong wa bona. ₁₂Ya ba gona Bajuda ka moka ba tlišago dikarolo tša lesome tša mabele le tša mananose a morara le tša makhura, tša bolokwa nywakong ya polokelo. ₁₃Ka bea Selemia moperisita, le Tsadoko mongwadi, le Pedaya e mongwe wa Balefi, ya ba balebeledi ba polokelo; ba tlatšwa ka Hanani morwa wa Sakuri, morwa wa Mathanya, gobane ba hweditšwe e le bona babotegi; ya ba bona ba go abela bana ba bobona.

₁₄Modimo wa ka! Hle nkgopole ka baka la tšona tše; mme mediro ya ka ya lerato ye ke e diretšego Ngwako wa Modimo wa ka le bahlanka ba wona, o se ke wa e lebala.

₁₅Mehleng yeo ka bona ba bangwe ba Bajuda ba fotela morara dinkgong ka la Sabatha, ba bangwe ba rwala mabele ba belešitše dipokolo, ba rwala dienywa tša morara le tša mogo le merwalo e mengwe ya mehutahuta, ba e tliša Jerusalema ka la Sabatha; ka ba kgala ka tšatši leo ba bapatša dijo tšeo. ₁₆Le Batiro ba ba bego ba agile mo, ba tliša dihlapi le dilo tše dingwe, ba di bapatša go Bajuda ka la Sabatha motseng wa Jerusalema. ₁₇Ka omanya bagolo ba Bajuda ka re: Ke ditaba mang tše mpe tše le di dirago, tše le gobošago la Sabatha ka tšona? ₁₈A ga se tšona tše di bego di dirwa ke botatawešo, mme Modimo wa rena a ba a re tlišetša bošula bjo ka moka ka baka la tšona? Le tlo hlolela Isiraele dikotlo tše di fetišago, ge le goboša Sabatha.

₁₉Ya re ge meriti ya merako ya Jerusalema e gonoga, Sabatha e sešo ya thoma, ka laela gore dikgoro di tswalelwe; ka re di se ke tša bulwa ge e sa le Sabatha; ka bea ba bangwe ba bahlanka ba ka dikgorong, gore ka la Sabatha go se ke gwa tlišwa selo fa motseng. ₂₀Mme babapatši le barekiši ba dilo tša mehutahuta ba lala ntle, ba se ke ba tsena motseng wa Jerusalema; ba dira bjalo gatee gabedi. ₂₁Ka ba kgala ka re: Le reng le robala le batagane le morako? Ge le ka boeletša, ke tlo le swara ka diatla. Ya ba gona ba lesitšego go tla ka Sabatha. ₂₂Ka bolela le Balefi ka re: Ithakgafatšeng le lete dikgoro, gore letšatši la Sabatha le kgethwe!

Modimo wa ka! Hle nkgopole ka tše ke di dirilego, o ntire ka kgaugelo ka bogolo bja mabobo a gago!

₂₃Mehleng yeo ka bona Bajuda ba bangwe ba ba tšerego basadi ba Baasidodo le ba Baamoni le ba Bamoaba. ₂₄Mme bana ba bona ge ba bolela ba gobanya le Seasidodo, go se e tsebago go bolela Sejuda, ba bolela sehlakano sa mebolelo. ₂₅Ka ba omanya, ka ba roga, ka ba ka itia ba bangwe, ka ba udubatša meriri, ka ba eniša ka Modimo, ka re: Le se ke la ba tšeiša barwedi ba lena; mme le se ke la tšeiša barwa ba lena barwedi ba bona; le lena le se ke la itšeela bona. ₂₆Ka re: A ga se sona se Salomo kgoši ya Isiraele a sentšego ka sona, mola go se kgoši e nngwe ya ditšhaba e bego e lekana nae; mola a ratwa ke Modimo; mme Modimo a mmeile kgoši ya Isiraele ka moka; gomme le yena a ba a dirišwa dibe ke basadi ba šele. ₂₇A fa le re re ka fo homola re kwile ge le dira bobe bjo bogolo bjoo, ge le hlanogela Modimo ka go tšea basadi ba mohuta o šele?

₂₈E mongwe wa barwa ba Joyada morwa wa Eliyasiba moperisita e mogolo, e be e le mokgonyane wa Sanebalathi wa Horoni; yena yo ka mo raka.

₂₉Modimo wa ka! O se ke wa ba lebala, gobane ba tšhilafaditše boperisita le kgwerano ya baperisita le Balefi.

₃₀Ke dirile ka mokgwa woo ge ke ba ntšha tšhila ya ba ntle, ka tiiša bolebeledi bja baperisita le Balefi, e mongwe le e mongwe a tseba modiro wa gagwe, ₃₁ka tiiša le gore dibego tša dikgong di tlišwe ka mabaka a gona, le tša maitšibulo.

Modimo wa ka, o se ntebale, o ntire tše bolo.