NEHEMIA 1

₁Ditaba tša Nehemia morwa wa Hakalia.

Ka kgwedi ya Kisilefe ya ngwaga wa masome a mabedi ke le motseng wa mošate wa Susani, ₂gwa tla Hanani ngwanaborena a na le banna ba bangwe, ba etšwa Juda; ka ba botšiša ditaba tša Bajuda ba ba phologilego, le tša mašalela a boilego bothopša, le tša Jerusalema. ₃Ba mpotša ba re: Ba mašalela ba ba boilego bothopša kua nageng yela ba phela ka bohloko bjo bogolo le ka go nyatšega. Merako ya Jerusalema e phušogile le dikgoro tša gona di fišitšwe ka mollo.

₄Ka re go kwa ditaba tšeo, ka dula fase ka lla ke hlomogile pelo ka fetša matšatši, ka ikona dijo ka rapela pele ga Modimo wa legodimo; ₅ka re: Morena Modimo wa legodimo! Wena Modimo e mogolo e o tšhabegago! Ba ba go ratago mme ba kgomarela melao ya gago, o ba botegela kgweranong, o fela o ba gaugela. ₆A tsebe ya gago e theetše, mahlo a gago a a lebelele, o kwe thapelo ya nna mohlanka wa gago ye ke e beago pele ga gago lehono mosegare le bošego ka baka la Baisiraele bahlanka ba gago, ge ke bobola dibe tša Baisiraele tše re sentšego ka tšona; le nna le ba gešo re sentše. ₇Re dirile tše mpe; ga ra ka ra gomarela melao ya gago le ditaelo le ditshwanelo tše o di laetšego Moshe mohlanka wa gago. ₈Hle gopola Lentšu lela le o le laetšego Moshe mohlanka wa gago, la ge o itše: Mohla le hlanogago ke tlo le gašanyetša ditšhabeng; ₉mme wa re: Fela, ge le tlo boela go nna, la hlokomela ditaelo tša ka la dira ka tšona, gona balelekwa ba lena ke tlo ba kgobela le ge ba gašanyeditšwe magomong a legodimo; ke tlo ba botha ntshe ka ba iša felo mo ke ikgethetšego gona ka bea leina la ka ntshe.

₁₀Wa realo ka ge e le bahlanka ba gago ba o ba phološitšego ka maatla a gago a magolo, le ka letsogo la gago le le tiilego.

₁₁Morena, hle tsebe ya gago e theetše thapelo ya nna mohlanka wa gago, le thapelo tša bahlanka ba gago ba ba ratago go boifa leina la gago. Lehono o ke o kgoniše mohlanka wa gago, ke hwetše monna eo a ntira ka kgaugelo.

Ka gobane ke be ke le motšheledi wa kgoši.