NAHUME 2

₁Bonang dithabeng maoto a motseta wa ditaba tše dibotse, segoeledi sa mola. -- Wena Juda, bina menyanya ya gago, ka gobane wa lonya a ka se hlwe a feta ka ga geno; o feletše ruri.

₂Gobane Morena o tsoša letago la ga Jakobo, le letago la Isiraele; ka gobane bahlakodi ba hlakotše ba senya merara ya gagwe. ₃Maphušule o go tšwela dira, wena Ninife. Hlapetša sebo sa gago; dula o lebile tsela. Itleme matheka o tsoše maatla ka moka. ₄Dikotse tša bagale bagwe di hubetše. Banna ba dioka ba apere bohubedu: ditshipi tša dikoloi di pekenya boka mollo ge di hlahlamologa; mme marumo a a rethwa. ₅Mekgoba e duma mešito ya dikoloi; di dikologa le dikgoro; di phadima bjalo ka dikgabo; di fapakana boka dikgadima. ₆O gopola banna bagwe ba dinatla; ba kgopša ge ba eya; ba hlaganela go boela merakong ya motse ba pheka meswiko. ₇Go tlo napa go bulwa kgoro tša noka, moago wa bogoši wa tlo gogolwa. ₈O a tšolwa; o a thopša; ba matolo a mohumagadi ba tsetsela boka maebana, ba itshetla phega. ₉Motse wa Ninife, mpharafarwa a meetse wa mehleng! Ba a tšhaba. -- Emang! -- Go hlokwa a pekago. ₁₀Thopang mahumo a tshipitshehla le khubedu! Matlotlo ga a fele, merwalo ya dilwana tša matsaka a mehutahuta! ₁₁O gogotšwe, go se šale selo, ge e se mašegerepe; dipelo di feregile, matolo a tiana; matheka ka moka a koka; difahlogo ka moka ke pilo fela. ₁₂Le ile kae letšaba la ditau? Bo ile kae boselo bja ditau le madumaedi, mo go bego go sepela tautona, le tautshadi e na le tawana, di sa šie selo? ₁₃Ke ra tau yeo e bego e selela bana, e bego e gogela sa tlala marapo.

₁₄Ke nna e, ke lwago nago! -- O realo Morena wa mašaba, -- Ke tlo tšhuma dikoloi tšago ya ba seši; mme ditau tšago tša madumaedi di tlo lewa ke lerumo, gwa fela megoga ya gago mo lefaseng; gwa se hlwe go kwala lentšu la batseta ba gago.