Diporofeto tša Jesu
1Ge a etšwa mo Ntlongkgethwa, e mongwe wa barutiwa ba gagwe a re: Moruti, o ko bone mabje a makaakaa a, le moagelo wa ona.
2Jesu a fetola a re: A o a e bona meago ye e mekaakaa? Ga go lefsika fa le le tlogo leswa le le godimo ga le lengwe le sa šuthišwa.
3Ya re ge a dutše thabeng ya mehlware a lebane le Ntlokgethwa, Petro le Jakobo le Johane le Andrea ba mmotšiša thopeng ba re: 4Re botše; di tlo direga neng? Se re tlo go bona ka sona, ge di tlo tloga di tšwelela, ke eng?
5Jesu a fetola a re: Itoteng gore le se tlo forwa ke motho. 6Gobane ba bantši ba tlo tla ka leina laka ba re: Ke nna Kriste, mme ba tlo fora ba bantši. 7E re mohla le kwago dintwa le mekgoši, le se ke la tšhoga. Tšeo ke tše di swanetšego go direga; fela, e tlo ba e se bjona bofelo. 8Gobane setšhaba se tlo tsogela setšhaba; mmušo o tlo tsogela mmušo; go tlo ba le ditšišinyego kua le kua, le ditlala, le tše di tšhošago.
9Mme lena le itote; gobane ba tlo le bega dikgorong le diphuthegong, ba le otla, la emišwa pele ga babuši le dikgoši ka baka laka; ya tlo ba bohlatse go bona. 10Gomme Ebangedi e swanetše go kwatšwa pele ditšabeng ka moka. 11Mohla ba yago go le sekiša, le se ke la phoraphora la re: Re yo reng? Le tlo bolela ka mo le tlo go newa ka lona lebaka leo. Gobane ga se lena ba le bolelago; ke Moya o mokgethwa. 12Ngwanabo motho o tlo bega ngwanabo a mmolaiša; ke tšona tše tatago motho a tlo go di dira ngwana wa gagwe; bana ba tlo tsogela batswadi ba bona ba ba bolaiša. 13Le tlo ba ba ba hloiwago ke bohle ka baka la leina laka. E a tlo go tiišetša go fihla bofelong, ke yena a tlo go phološwa.
14Ge le tlo bona makgapa a tšhwalananyo a a boletšwego ke moporofeta Daniele a eme mo go sa swanelago (e a balago a di phafogele), mohla woo ba ba lego nageng ya Juda ba tšhabele dithabeng. 15E a nametšego seokamo sa ntlo, a se ke a fologa a yo tšea selo ntlong ya gagwe. 16E a lego mašemong, a se ke a boela gae a re ke yo tšea kobo. 17Ba madimabe mehleng yeo e tlo ba baima le ba amušago. 18Gomme le rapele gore motšhabo wa lena e se be wa lebaka la marega. 19Gobane mehla yeo e tlo ba ya masetlapelo a a sešogo a bonwa go tloga mathomong a tlholo ye e hlodilwego ke Modimo, le go fihla lehono, a a ka se kego a ba gona le ka mohla o mongwe. 20Gomme ge Morena a ka be a sa fokotše mehla yeo, go ka se phologe motho fela, matšatši ao o a fokotša ka baka la ba bakgethwa ba a ba kgethilego.
21Mehleng yeo, ge motho a tlo re: Bonang Kriste šoo, goba a re: Bonang šoolaa, se dumeleng. 22Gobane go tlo tsoga boKriste ba maaka le baporofeta ba maaka; ba tlo tšweletša mehlolo le matete, e le gore ge go kgonega ba fore le bona ba bakgethwa. 23Gomme lena le itote; le tsebe gobane ke le boditše di sešo tša ba gona.
24E tlo re ge go fetile masetlapelo ao, ke mo go tlo go fifala letšatši, le kgwedi ya tlo lesa go etša. 25Le dinaledi di tlo wa di etšwa legodimong; le matla a magodimong a tlo šišinyega. 26Ke mo ba tlo go bona Morwamotho a etla ka maru, ka matla le ka letago le legolo. 27Mme o tlo roma barongwa ba gagwe ba bokanya bakgethwa ba gagwe, ba tlišwa ba etšwa thoko tšohle tša lefase mo go rumago legodimo.
28Ithuteng go swantšha ka mogo. Ge thabe ya wona e eba e tala e hloga matlakala, le e tsebe gore lehlabula le batametše. 29Le realo gee, mohla le bona go direga tšeo, le tsebe ge di le kgaufsi, di tlile mojakong. 30Ruri, ke a le botša; di tlo tšwelela, moloko wo o sešo wa fela. 31Legodimo le lefase di tlo feta; gomme dipolelo tša ka di ka se ke tša feta.
32Ge e le letšatši leo le nako ya tšona, ga go e a di tsebago, le Barongwa ba legodimong, le yena Morwa, ga ba di tsebe. Go tseba Tate a mmoši. 33Fahlogang, le phakgame le rapele, gobane lebaka la tšona ga le le tsebe. 34Go bjalo ka motho e a etago a tlogela ngwako wa gagwe a neile bahlanka ba gagwe matla, bohle a ba laetše mediro ya bona, a laetše moletamojako a re a phakgame. 35Phakgamang, gobane lebaka la go boa ga Mong wa ngwako ga le le tsebe; goba o tlo tla ka mantšibua, goba mašegogare, goba ge kgogo e lla, goba ka masa. 36Gore le se tlo tšhoga a tlile a le hwetša le robetše. 37Gomme tše ke le botšago tšona ke botša bohle, ke re: Phakgamang!
