Balemi ba babe; phetolano ka šeleng ya motšhelo le tsogo ya bahu, le Molao o mogolo; mohlologadi wa modiitšana
1A thoma go bolela le bona ka diswahtšho, a re: Motho e mongwe o be a lemile tšhemo ya merara, a e agelela ka legora, a e batela lebato, a e hlomela sethala, a tsebo e gafela balemi; yena a swara leeto. 2Ka lebaka la gona a roma mohlanka a re a yo tšea tše dingwe tša dienywa tša tšhemo go balemi. 3Balemi ba mo swara, ba mo itia, ba mo gomiša a le fela. 4Mong wa tšhemo a buša a roma mohlanka e mongwe, a tla go balemi. Yena ba mo thuma ka mafsika, ba mo gobatša hlogo, ba mo gomiša a gobošitšwe. 5A buša a roma e mongwe gape; yenaeo ba mmolaya. Le ba ba bangwe ba bantši ba ba dira ka mokgwa woo; ba bangwe ba ba itia, ba bangwe ba ba bolaya. 6Bjale mong wa tšhemo o be a sa na le morwa wa gagwe o tee yo a bego a mo rata; a fetša ka go roma yenaeo, a re: Ba tlo šia morwa waka. 7Balemi bao ba botšana ba re: Mojabohwa šoo! Tlang re mmolayeng; bohwa bo lewe ke rena. 8Ba mo swara ba mmolaya, ba mo lahlela ka ntle ga tšhemo.
9Bjale mong wa tšhemo o tlo dirang? -- O tlo tla a fediša balemi bao; tšhemo a e nea ba bangwe. 10A ga la bala lengwalo le le rego: Lefsika le baagi ba le nyaditšego, le bile la motheo wa sekhutlo? 11Tše bjalo ge di dirego di tšwa go Morena; re bona e le matete.
12Bjale ba rata go mo swara; fela, ba boifa setšhaba. Gobane ba be ba lemogile ge a šupile bona ka seswantšho seo. Ba mo lesa ba tloga.
13Ba roma ba bangwe ba bafarisei ba ya go Yena ba na le ba gaHerode, ba tla gore ba mo tanye ka polelo. 14Ba tla ba re: Moruti, re tseba ge o le wa go rereša; ga o hlaole motho; ga o bebe motho selo; o ruta tsela ya Modimo ka go rereša. A go re loketše ge re ntšhetša Kesara lekgetho, goba ga go a re lokela? A re ntšhe, goba re lese go ntšha?
15Jesu a bona boikaketši bja bona, a re; Le ntekelang? Tlišang šeleng ke e bone.
16Ba e tliša. Jesu a re: Ke sa mang seswantšho se, le leina le?
Ba re: Ke tša Kesara.
17Ke mo Jesu a fetotšego a re: Gona ntšhetšang Kesara tše e lego tša Kesara: Modimo le mo ntšhetše tše e lego tša Modimo.
-- Gomme ba mo kgotsa.
18Le basadutsei ba tla go Yena. Ke bao ba rego bahu ga ba tsoge. Ba mmotšiša ba re: 19Moruti, Moše o re ngwaletše molao a re: Ge motho e ehwa, a šadiša mosadi a se na ngwana, monnagwe a tšee mosadi eo a tsošetše mogolwane peu. 20Bjale go be go le barwa ba motho o tee, e le ba ba šupago. Wa pele a tšea mosadi, a hwa a se na ngwana. 21Wa bobedi a mo tšea; le yena a hwa a se na ngwana. Le go wa bararo gwa ba bjalo. 22Bohle ba ba šupago ba mo tšea, ba hwa ba se na bana. Le yena mosadi a ba a hwa. 23Bjale mohla bahu ba tsogago, mosadi eo e tlo ba wa ofe, ge ba mo tšere ba šupile.
24Jesu a fetola a re: Afa ga la timela ka go se tsebe mangwalo le matla a Modimo? 25Mohla ba tsogago bahung ba ka se ke ba tšea le ge e le go tšeišwa; ba tlo ba ba bjalo ka Barongwa ba magodimong. 26Gomme ge le mpotšiša tša bahu ge ba tlo tsoga, a ga lešo la bala pukung ya Moše tabeng yela ya sethokgwa sa metlwa, mo Modimo a boletšego le yena a re: Ke nna Modimo wa Aborahama, Modimo wa Isaka, Modimo wa Jakobo. 27Bjale Modimo ga se Modimo wa bahu; ke Modimo wa ba ba phelago. Le timetse gagolo.
28Gwa batamela e mongwe wa bamangwalo, e a kwilego ge ba fetolana, a bone ge Jesu a ba fetotše gabotse; a mmotšiša a re: Molao o mogolo go melao ka moka ke ofe?
29Jesu a fetola a re: Molao o mogolo go melao ka moka šo: Theetša, Isiraele! Morena Modimo wa gago ke yena Morena a nnoši. 30Morena Modimo wa gago o mo rate ka pelo ya gago ka moka, le ka moya wa gago ka moka, le ka tlhaologanyo ya gago ka moka, le ka matla a gago ka moka. Ke wona molao o mogolo. 31Wa bobedi o lekana le wona; o re: Wa geno o mo rate ka mokgwa wo o ithatago ka wona. Ga go na molao o mongwe o fetago yeo.
32Moruti wa mangwalo a fetola a re: Ke gona, Moruti. O rerešitše ge o re: Modimo ke o tee fela, ga go na e mongwe ka ntle ga gagwe. 33Gomme go mo rata ka pelo ka moka, le ka tlhaologanyo ka moka, le ka moya ka moka, le ka matla ka moka, le go rata wa geno ka mokgwa wo o ithatago ka wona, go phala dihlabelo le didimo ka moka.
34Jesu ge a bona a fetotše ka tlhaologanyo, a bolela le yena a re: Ga o kgole le mmušo wa Modimo.
-- Gwa se hlwe go eba le e mongwe e a tlemilego pelo a tla a fetolana nae.
35Mohla a ruta Ntlongkgethwa, a botšiša a re: Bamangwalo ba bolela bjang ge ba re: Kriste ke Morwa wa Dafida? 36Gobane Dafida ka nnoši a le Moyeng-mokgethwa o boletše a re: Morena o boditše Mong waka a re: Dula ka letsogong laka le letona, ke be ke dire manaba a gago bogato bja nao tša gago. 37Bjale Dafida ge a re: Mong waka, a era yena, a ka ba morwa wa gagwe bjang?
-- Gomme lešaba le lentši la batho la kgahlwa ke go mo theetša ge a ruta. 38Thutong ya gagwe a bolela a re: Le phafogeleng bamangwalo ba ba kgahlwago ke go itshepelela ba apere diaparo tše telele, ba nyaka ditumedišo mapatlelong, 39ba ba kganyogago ditulo tša pele diphuthegong, le dibaka tša pele menyanyeng. 40Ba ja malapa a bahlologadi ba ba fora ka dithapelo tše telele. Ke bona ba obago molato o fetišago.
41Gomme Jesu a ya a dula a lebane le polokelo ya mahumo a Ntlokgethwa, a bona ka mo lešaba le tšhelago ditšhelete polokelong. Bahumi ba bantši ba tšhela gagolo. 42Gwa tla mosadi wa mohlologadi wa modiitšana, a tšhela ditšheletjana tše pedi di bopago peni e tee. 43Jesu a bitša barutiwa ba gagwe, a bolela a re: Ruri, ke a le botša, mosadi eo wa mohlologadi wa modiitšana o tšhetše gagolo go fetiša bohle ba ba tšhetšego fa polokelong. 44Gobane bao bohle ba ntšhitše go tše di ba tlaletšego; ge e le yena o ntšhitše bohumaneging bja gagwe, a tšhela tšohle tše a bego a na natšo, e le tšohle tše a bego a tlo phela ka tšona.
