MIKA 1

₁Lentšu la Morena le le tletšego Mika wa Moresethe mehleng ya Jothama le Ahasi le Hiskia dikgoši tša Juda, le tše a di bonego di ela Samaria le Jerusalema. ₂Hee lena ditšhaba, kwang ka moka ga lena! Hee wena lefase, le tšohle tše di lego mo go lona, theetšang! Hlatse ye le lebanego nayo ke Morena Mong a bohle a le mo Ntlong e kgethwa yagwe. ₃Tsebang gobane Morena o tlo tšwa felo ga gagwe, o tlo fologa a gata dirwaolo tša lefase. ₄Ge a gata, dithaba di tlo tologa, meedi e tlo fatoga, gwa tlo etša mola moti o le mollong, meetse ge a tšhologela leribeng.

₅Tše ka moka di tla ka phapogo ya Jakobo, le ka dibe tša moloko wa Isiraele. Diphapogo tša Jakobo e sa le tše dife, ge e se tša Samaria? Mme meboto ya medimo ya Juda e kae, ge e se Jerusalema? ₆Gomme Samaria ke go dira mokgobo wa maswika megoleng, ke go dira malemo a merara; maswika a gona, ke tlo a kgatlela lengopeng; ke tlo go epolla le metheo. ₇Swantšho tšohle tša medimo ya gona di tlo pšhatliwa; theko tšohle tša maotswa a gona tša fišwa ka mollo, pheko tšohle tša gona ke tlo di dira sethobolo; ka gobane e be e le theko tša bootswa; mme di tlo buša di eba theko tša bootswa.

₈Ke tšona tše di ntedišago ka gogolo; ke sepela nao di le fela, ke apotše kobo, ke hlaboša sello wa phukubje, ke tsetsela boka mpšhe, ₉Ka gobane dintho tšagwe ga di fole; di bile di fetetše Juda, di fihlile dikgorong tša setšhaba sa ka, le Jerusalema.

₁₀Le se ke la botša ba Gathe, le lese le go lla; ba Bethe-Afara le bopologe leroleng. ₁₁Hee lena ba Safira, tlogang moo le hlobotše wa dihlong; ba Tsamana ga ba tšwele ntle; dillo tša Bethe-Etsele di ba hlokiša modula. ₁₂Ba Marothe ba ba boifa go ka tlogwa ke tše botse, ka gobane kgoro tša Jerusalema di wetšwe ke bošula bo etšwa go Morena. ₁₃Lena ba Lakisi bofang dikoloi tša dipitsi tša lebelo; sebe sa ngwanana wa Tsione se thomegile moo; mo go lena go hweditšwe diphapogo tša Isiraele. ₁₄E be e le tšona, ge le iša dimpho Moresethe-Gathi; dintlo tša Akasiba di fora magoši a Isiraele.

₁₅Lena ba Maresa ke le tlišetša mong e mongwe; letago la Isiraele le tlo fihla Adulama. ₁₆Dutulwa o ntšhwe diubu, o llele bana bago ba baratwa; lefatla lago a le etše la lenong, gobane ba thopilwe ba go šia.