MATEO 8

₁Ya re ge a fologile thabeng, a latelwa ke mašaba a mantši a batho. ₂Gwa napa gwa rotoga motho wa lephera, a tla a mo khunamela a re: Morena, ge o ka rata, o ka kgona go mphodiša!

₃Jesu a ntšha seatla, a mo kgwatha, a re: Ke rata fao! Fola! Mme lephera la gagwe la napa la fola. ₄Jesu a bolela nae a re: Bona! O se ke wa botša motho. Sepela o yo ipontšha go moperisita, o iše neo e laetšwego ke Moše gore e be bohlatse go bona.

₅Eitše ge Jesu a tsena Kaperenaume, gwa tla tona ya lekgolo ya mo kgopela ya re: ₆Morena, mohlanka wa ka o letše ka ngwakong; o rephile ditho; di mmolaya ka mokgwa o šoro.

₇Jesu a re: Ke tlo tla ka mo fodiša.

₈Tona ya fetola ya re: Morena, ga ka swanela ge o ka tsena ka tlase ga tlhaka ya ntlo ya ka; o nko bolele lentšu fela, mohlanka wa ka a fole. ₉Hleng le nna, ke le motho a bušwago, ke na le bahlabani ba ke ba bušago, ke roma yo ka re: Sepela, mme a sepela; ke bitša e mongwe ka re: Tlaa, mme a tla; ke laela mohlanka wa ka ka re: Dira se, a dira.

₁₀Jesu ge a ekwa a kgotsa, a bolela le ba mo latelago a re: Ruri, ke a le botša, le go Isiraele ga ke ešo ka hwetša tumelo e kaakaa! ₁₁Mme ke a le botša, bohlabela le bodikela go tlo tšwa ba bantši ba tla ba dula dijong le Aborahama le Isaka le Jakobo mmušong wa magodimong, ₁₂Mme barwa ba mmušo ba tlo ntšhetšwa ntle lefsifsing la ntlentle. Gona moo go tlo ba le dillo le ditsikitlano tša meno. ₁₃Ge e le tona yeo, Jesu a bolela le yona a re: Sepela, o diregelwe ka mo o dumetšego ka gona.

Mme mohlanka wa yona a fola ka yona nako yeo.

₁₄Eitše ge Jesu a tsena ngwakong wa Petro, a hwetša mogwegadi wa Petro a letše a babja ke letadi. ₁₅A mo swara ka seatla, mme letadi la mo tloga, a tsoga a ba apeela.

₁₆Ya re e šetše e le mantšibua, ba tliša ba bantši ba ba nago le meoya e mebe; mme Jesu a leleka meoya yeo e mebe ka go bolela le yona, a fodiša bohle ba ba babjago. ₁₇Ya ba gona go phethega se se boletšwego ke moporofeta Jesaya ge a itše: Ke yena a rwelego malwetši a rena, a ipeleša mahloko a rena.

₁₈Jesu ge a bona a bokanetšwe ke mašaba a mantši, a re: A re seleleng mošola. ₁₉Ke mo e mongwe wa bamangwalo a tlilego go yena a re: Moruti, ke tlo go latela mo gohle mo o yago.

₂₀Jesu a fetola a re: Diphukubje di na le melete, le dinonyana tša sebakeng di na le dihlaga; ge e le Morwamotho ga a na mo a kago samiša hlogo.

₂₁E mongwe wa barutiwa ba gagwe a tla a re: Ntumelele, ke thome go yo boloka tate.

₂₂Jesu a fetola a re: Latela nna, o lese bahu ba boloke bahu ba bona.

₂₃Ya re ge a tsena leselawatleng, a latelwa ke barutiwa ba gagwe. ₂₄Gwa napa gwa tsoga ledimo le letona, leselawatle la ribegelwa ke maphoto, yena a ithobaletše. ₂₅Barutiwa ba batamela ba mo tsoša ba re: Morena, phološa; re a lahlega!

₂₆Yena a re: Le boifang lena bahlayatumelo! A tsoga, a kgalema phefo le lewatle; gwa napa gwa ruthela ruri.

₂₇Batho ba tlabega ba re: Ke mothomang yena e, ge ledimo le lewatle le tšona di mo kwa?

₂₈Ya re ge a fihlile mošola nageng ya Bagadara, a gahlana le banna ba babedi ba meoya a mebe ba etšwa mabitleng, ba galefile ka kudu, go se motho e a kago beta pelo a feta ka tsela yeo. ₂₉Banna bao ba goa ba re: Re na le tabamang le Wena? Wena Jesu Morwa-Modimo! A o tlile mono go re tlaiša e sešo ya ba lebaka?

₃₀Gomme gona moo go be go na le mohlape wa dikolobe tše ntši, o fula ka kgojana. ₃₁Meoya e mebe ya mo kgopela ya re: Ge o re leleka, re rome re yo tsena mohlapeng wa dikolobe.

₃₂Jesu a re: Yang! Gomme ya tšwa ya ya mohlapeng wa dikolobe. Mme mohlape ka moka šoolee, o iphekemetša ka legaga, wa wela lewatleng, wa hwela meetseng.

₃₃Badiši ba tšhaba, ba fihla motseng ba bolela tšohle, le tše di dirilwego bao ba meoya e mebe. ₃₄Bohle ka motse ba tswa ba gahlanetša Jesu; gomme ge ba mmone, ba mo rapela ba re a fete, a tloge mo mellwaneng ya bona.