MALEAKI 2

₁Bjale lena baperisita, taelo e le lebanego še: ₂Ge le sa theetše, le sa ele hloko gore ina la ka le godišwe, -- o realo Morena wa mašaba, -- gona ke tlo le lahlela la mahlolakotsi; ditšhegofatšo tša lena ke tlo di phekgola, mme tša ba mahlolakotsi. Ke šetše ke dirile tšeo, ka ge le se ne mogopolo. ₃Tsebang gobane ke rogile peu ya lena; difahlogo tša lena ke di gaša tšhila, tšhila tša menyanya ya lena, gore le gogolwe le na natšo. ₄Ke mo le tlogo tseba ge ke le rometše tayo ye, gore kgwerano ya ka le Lefi e dule e le gona. -- O realo Morena wa mašaba. --

₅Yona kgwerano yeo ke e tlemilego le yena, e be e le ya bophelo le molao. Ke mo file tšona gore a boife; mme a mpoifa a šia ina la ka. ₆Molomong wa gagwe go be go le thuto ya therešo; molomong wa gagwe go be go sa hwetše la go fora; o be a sepela le nna a iketlile, a swere tsela ya go loka, mme a gomiša ba bantši bokgopong. ₇Gobane molomo wa moperisita ke wa go lota tsebo; thuto batho ba e nyaka molomong wa gagwe, gobane ke yena motseta wa Morena wa mašaba.

₈Fela, lena le lahlile tsela, le kgopišitše ba bantši ka ya lena thuto, la senya kgwerano ya Lefi. -- O realo Morena wa mašaba. -- ₉Le nna bjale ke le dira ba go nyatšwa le ba go gerulwa ke setšhaba ka moka; ka gobane le sa ka la šetša tsela tša ka, mme la ruta batho le ba beba difahlogo.

₁₀A tatawešo wa rena bohle, a ga se o tee? A ga ra bopša ke Modimo o tee? Bjale ke ka baka lang ge le hlanogelana, motho a lahla ngwanabo, ra senya kgwerano ya botatawešo? ₁₁Juda a hlanoga, bohlola bja dirwa ke Isiraele le Jerusalema; Juda a goboša Ntlokgethwa ya Morena, ye a bego a e rata. O tšere ngwanana wa modimo o šele. ₁₂Monna wa go dira tšeo, Morena o tlo mo hlokiša wa go mo dumediša le go mo araba, le wa go mo išetša sebego go Morena wa mašaba.

₁₃Se sengwe se le se dirago sese: Le apeša aletare ya Morena ka megokgo le ka dillo le ka diphegelo, Morena a se hlwe a kgona go bona dipego tša lena le go amogela di kgahlago di etšwa atleng tša lena? ₁₄Bjale le re: Molato ke eng? Molato šo: Ke ka gobane Morena e le hlatse ya mola o kwana le mosadi wago le sa le ba bafsa, mme wa napa wa mo lahla, mola e le wa moloko weno, e le mosadi wago ka dikeno. ₁₅Ga go sa le yo mongwe le o tee, e a kago dira tšeo ge a sa šaletšwe ke kgopolo; mme yo semene yo o kgopela peu go Modimo! Itoteng kgopolo! Mme wena o se hlale mosadi e o mo tšerego le sa le bafsa. ₁₆Gobane Morena Modimo wa Isiraele o re: Tlhalo ke e hloile; ke hloile yo a senyago kobo yagwe ka bošoro. -- O realo Morena wa mašaba. -- Ke gona itoteng kgopolo, le lese go hlala.

₁₇Morena le mo lapišitše ka polelo tša lena. Bjale le re: Re mo lapišitše kang? -- Ka go re: Le modirabobe mang le mang, le re Morena o bona e le yo bolo; le re o a mo thabela; le re: Hleng Modimo mosekišamotho re sa mmone!