LUKA 4

₁Jesu a tloga nokeng ya Jorodane a tletše Moya o mokgethwa, a išwa šokeng ke Moya. ₂A fetša matšatši a masome a mane a lekwa ke Diabolo. A a fetša a sa je selo; ya re ge matšatši ao a fela, a swarwa ke tlala.

₃Diabolo a tla a re: Ge o le Morwa Modimo, bolela le lebje le le fetoge bogobe.

₄Jesu a fetola a re: Go ngwadilwe gore motho ga a phele ka bogobe fela; o phela ka mantšu ohle a a tšwago molomong wa Modimo.

₅Diabolo a mo iša thabeng e telele, a mmontšha mebušo ka moka ya lefase ka sekganyana sa lebaka. ₆A bolela a re: Bogoši bjo ka moka le borena bja bjona ke tlo fa wena; ka gobane bo gafetšwe nna; ke bo nea yo nkago rata go mo mea. ₇Bjale ge o ka lotšha nna, ka moka e tlo ba tša gago.

₈Jesu a re: Ntlogele Sathane; go ngwadilwe gwa thwe: O khunamele Morena Modimo wa gago, o direle yena a nnoši.

₉Diabolo a mo iša Jerusalema, a mmea sehlweng sa Ntlokgethwa, a bolela a re: Ge o le Morwa Modimo, ikušetše kua fase o le fa. ₁₀Gobane go ngwadilwe gwa thwe: O tlo go laelela barongwa ba gagwe gore ba go diše, ₁₁Ba go kuke ka matsogo, gore leoto la gago le se kgopje ke lebje.

₁₂Jesu a fetola a re: Go itšwe: Morena Modimo wa gago o se ke wa mo leka.

₁₃Ya re ge Diabolo a feditše go mo leka ka tšeo ka moka, a mo gomela, gwa fela lebaka a mo lesitše.

₁₄Jesu a boela Galila, a tla a na le matla a Moya; tumo ya gagwe ya tšwela thoko tšohle. ₁₅A ruta diphuthegong tša gona a retwa ke bohle.

₁₆A tla motseng wa Natsaretha mo a goletšego gona. Ka letšatši la Sabatha a ya phuthegong ka mo a lemetšego ka gona; a ema gore a bale. ₁₇Ba mo nea puku ya Jesaya moporofeta, a e phaya a hwetša mo go ngwadilwego mantšu a: ₁₈Moya wa Morena o na le nna, ka gobane o mpeetše go begela babotlana taba tše dibotse, o nthomile go alafa ba dipelo tše robegilego, ₁₉ba ba thopilwego ke ba goelele khunologo, ba difofu ke re ba buše ba bone, ba ba dubaganego ke re ba ikele ba golotšwe, ke bege ngwaga wa kgahlego wa Morena.

₂₀A re a menne puku a e nea mohlanka; yena a dula, mahlo a bohle ba phuthegong a mo tsepeletše. ₂₁A thoma go bolela le bona a re: Lehono, ge tše di ngwadilwego fa di kwala ditsebeng tša lena, ke gore di tšweletše.

₂₂Bohle ba mo dumela, ba kgotsa mantšu a bose a tšwago molomong wa gagwe, ba re: A ga se yena morwa Josefa?

₂₃Jesu a re: E fela le tlo mpotša seema se se rego: Moreku ithekole. Le tlo re: Tše re di kwilego ba re di dirilwe Kaperenaume, dira tše kao le mono motseng wa geno. ₂₄A re: Ruri, ke a le botša, moporofeta ga a ke a thabelwa motseng wa gabo.

₂₅Ruri, ke a le botša, mehleng yela ya Eliya go be go na le bahlologadi ba bantši mo go Baisiraele, mola legodimo le tswaletšwe ka nywaga a meraro le dikgwedi tše di selelago, gwa ba tlala e kgolo nageng ka moka. ₂₆Gomme Eliya ga a ka a rongwa go e mongwe wa bona, ge e se kwa Sarepata nageng ya Sidone go mosadi yola wa mohlologadi. ₂₇Le ba lephera e be e le ba bantši mo go Baisiraele mehleng ya Elisa moporofeta; gomme ga go le o tee wa bona e a fodišitšwego, ge e se Naemane wa Siria.

₂₈Ge ba ekwa a realo, ba tlala bogale bohle ba moo phuthegong. ₂₉Ba tsoga ba mo kgorometša ba mo ntšha motseng, ba mo iša legageng la thaba yeo motse wa bona o agilwego godimo ya yona, ba re ba mo fekemetše ka gona. ₃₀Gomme yena a tšwa ka gare ga bona a ikela.

₃₁A theogela motseng wa Kaperenaume wa Galilea, a fela a ba ruta ka matšatši a Sabatha. ₃₂Ba tlabja ke thuto ya gagwe, ka gobane o be a bolela e le Yomaatla. ₃₃Gona moo phuthegong go be go na le motho e a nago le moya o mobe wa ditšhila, e a bego a goa ka lentšu le legolo a re: ₃₄Lesa! O na le taba mang le rena, wena Jesu wa Natsaretha? A o tlile go re fediša? Ke a go tseba; o Mokgethwa wa Modimo.

₃₅Jesu a mo kgalema a re: Homola! Tšwaa go motho eo! Gomme moya o mobe wa mo lahlela gare ga batho, wa tšwa go yena, wa se mo dire selo.

₃₆Bohle ba swarwa ke tšhogo, ba botšana ba re; Ke thuto mang ye? Meoya ya ditšhila o e laela ka matla le ka bogale, ya napa ya tšwa. ₃₇Gomme tumo ya gagwe ya enela, ya tšwelela gohle mathokong a naga yeo.

₃₈A tsoga moo phuthegong, a tšwa a ya ga Simone. Ke ge mogwegadi wa Simone a swerwe gagolo ke letadi; ba mo kgopelela go Jesu. ₃₉Jesu a tla a mo okamela, a kgalema bolwetši bjoo bja letadi, mme bja mo tlogela. Molwetši a tsoga ka pela a ba apeela.

₄₀Ya re letšatši ge le dikela, gwa tla bohle ba ba nago le balwetši ba bona ba mahloko a mehutahuta, ba ba tliša go Jesu; Yena a ba bea diatla e mongwe le e mongwe, a ba fodiša. ₄₁Le meoya e mebe ya tšwa go ba bantši e goeletša e re: Ke wena Kriste Morwa wa Modimo!

Yena a e kgalema a e iletša go mmolela, ge e mo tseba ge a le Kriste.

₄₂Ge go esa a tšwa a ya šokeng; mašaba a mo nyaka, a ba a mo hwetša; ba mo phegelela ba re a se ke a tloga go bona. ₄₃Yena a bolela le bona a re: Le metse e mengwe ke swanetše go e botša ditaba tše botse tša mmušo wa Modimo, ke sona se ke rometšwego sona.

₄₄Gomme a fela a ruta diphuthegong tša Galilea.