LUKA 22

₁Gwa tla monyanya wa dinkgwa tše di se nago komelo, wo ba rego ke wa Paseka. ₂Baperisita ba bagolo le bamangwalo ba na ba nagana ka mo ba kago mmolaya ka gona; gobane ba be ba boifa setšhaba.

₃Gomme Sathane a tsena Judase, e a reetšwego la Isikariothe, e bego e le wa palo ya ba lesome le metšo e mebedi. ₄Yena yo a tloga a ya go baperisita ba bagolo le go ditona, a lakana nabo ka mo a tlogo mo gafela diatleng tša bona. ₅Ba thaba, ba dumelelana ba re ba tlo mo nea tšhelete. ₆Yena a itlema a re o tlo bona sebaka se botse sa go mo gafela diatleng tša bona go se na batho ba bantši.

₇Gwa tla letšatši la dinkgwa di se nago komelo, la go hlaba kwana ya Paseka. ₈Jesu a roma Petro le Johane, a re: Yang le re lokišetše Paseka, re tle re je.

₉Ba re: O rata ge re ka e lokiša kae?

₁₀Jesu a re: E tlo re ge le tsena motseng, le tlo gahlana le motho e a rwelego moeta wa meetse. Le mo latele, le ye ngwakong wo a tsenago go wona. ₁₁Le bolele le mong wa ngwako woo le re: Moruti o re: Ngwako o kae wo nkago jela Paseka go wona le barutiwa ba ka? ₁₂O tlo le laetša ngwako o mogolo wa godimo, wo o adilwego magogwa. Le lokiše gona fao.

₁₃Barutiwa bao ba ya ba hwetša go le bjalo ka ge a ba boditše, mme ba lokiša Paseka.

₁₄Ge lebaka le tlile a dula dijong le baapostola ba lesome le metšo e mebedi. ₁₅A bolela le bona a re: Ke hlologetšwe gagologolo go ja Paseka ye le lena ke sešo ka hlokofatšwa. ₁₆Gobane ke a le botša, nka se hlwe ke e ja, ge e se ge e phethegile mmušong wa Modimo.

₁₇A tšea senwelo, a leboga, a re: Se tšeeng, le nwe, le šielane. ₁₈Gobane ke a le botša, nka se hlwe ke enwa seenywa se sa morara, go be go fihle mmušo wa Modimo.

₁₉A tšea senkgwa, a leboga, a ngwatha, a ba nea sona, a re: Ke mmele wa ka o newago ka baka la lena. Dirang bjalo gore e be go nkgopola. ₂₀Ka mokgwa o bjalo a tšea le senwelo ka morago ga selalelo, a re: Senwelo se ke kgwerano e mpsha mading a ka a a tšhollwago ka baka la lena.

₂₁Fela, tsebang, seatla sa e a nkekago se hleng ga ka fa majelong. ₂₂Ge e le Morwamotho o ikela ka mo go laetšwego; fela, yo madimabe ke motho eo a tlogo mo eka.

₂₃Ba thoma go botšišana seng, ba re e ka ba mang mo go bona, e a tlogo dira seo.

₂₄Gwa tsoga kgang mo gare ga bona, ya go re e a swanetšwego ke go ba yo mogolo go bona ke mang. ₂₅Jesu a bolela le bona a re: Dikgoši tša ditšhaba di a di buša; le ba ba di bušago ka tše thata, ba retwa ba thwe Sethakga. ₂₆Go lena go se ke gwa ba bjalo. E mogolo mo go lena a a ke e monyenyane; e a bušago a a ke mohlankedi. ₂₇Gobane e mogolo ke ofe? A ke eo a dutšego dijong? Goba ke eo a mo hlankelago? A ga se eo a dutšego dijong? Gomme nna gare ga lena nka ke mohlanka wa lena.

₂₈Fela, ba ba kgotleletšego le nna melekong ya ka ke bolena. ₂₉Gomme ke le bea mmušo, bjalo ka ge Tate a mpeile mmušo. ₃₀Gore mmušong wa ka le je le nwe majelong a ka, le tle le dule ditulong tša bogoši, le ahlolele meloko e lesome le metšo e mebedi ya Isiraele.

₃₁Gomme Morena a re: Simone! Simone! O tsebe gore Sathane o le kganyogile, gore a le fefere bjalo ka mabele. ₃₂Fela, ke go rapeletše, gore tumelo ya gago e se ke ya fela; gomme wena, e tlo re ge o sokologile o tiiše bana beno.

₃₃Simone a fetola a re: Morena, nna ke itokišitše, gore le ge e le kgolegong, le ge e le lehung, ke ye nago.

₃₄Jesu a re: Ke a go botša, wena Petro, mogogonope lehono o tlo ba o sešo wa lla o šetse o latotše gararo wa re ga o ntsebe.

₃₅A bolela le bona a re: Mohla wola ke le roma le se na sekhwama, le se na mokotla, le se na dieta, a le kile la hloka selo?

Bona ba re: Le gatee!

₃₆Yena a re: Gomme lehono, e a nago le sekhwama, a se sware, le e a nago le mokotla; e a se nago lerumo, a a bapatše kobo a reke lona. ₃₇Gobane ke a le botša, go nna go swanetše go phethega le taba yela e ngwadilwego ya re: O badilwe le badiradibe; gobane tše di ngwadilwego di era nna, di na le phethego ya tšona.

₃₈Bona ba re: Morena, šedi ditšhoša tše pedi.

Yena a re: Go hwetše.

₃₉A tšwa a ya thabeng ya mehlware, mo a bego a lemetše go ya gona; barutiwa ba gagwe ba mo latela. ₄₀Ge a fihla felo fao, a bolela a re: Rapelang gore le se tsene melekong.

₄₁A ubuga go bona, a ya go kago fihla leswika ge le betšwa, a khunama ka matolo a rapela. ₄₂A re: Tata! Ge o ka rata, šuthiša senwelo se se mphete. Fela, go se dirwe thato ya ka, go dirwe ya gago. ₄₃Gwa bonala morongwa wa legodimong a tlile go yena a mo nea maatla. ₄₄A rapela a tlaletšwe wa motho e a hwago; dikudumela tša gagwe tša ba bjalo ka marotholodi a madi a rothelago fase.

₄₅A tsoga moo thapelong, a tla go barutiwa ba gagwe, a ba hwetša ba robetše ka go nyama. ₄₆A bolela le bona a re: Le robaletšeng? Tsogang le rapele, gore le se tsene melekong.

₄₇A sa bolela, ba bona go fihlile lešaba la batho; yola a bitšwago Judase, e mongwe wa ba lesome la metšo e mebedi, a ba etile pele, a batamela Jesu, a mo atla. ₄₈Jesu a mmotšiša a re: Judase, a o eka Morwamotho ka go mo atla?

₄₉Barutiwa ge ba bona ba mo dikanetša, ba lemoga se se dirwago, ba re: Morena, a re ka rema ka ditšhoša? ₅₀Ke ge e mongwe wa bona a rema mohlanka wa moperisita e mogolo, a mo ripa tsebe ya le letona.

₅₁Jesu a re: Lesang: Le se ke la boeletša. A swara tsebe ya mohlanka eo, a mo fodiša.

₅₂Gomme Jesu a bolela le baperisita ba bagolo le ditona tša Ntlokgethwa le ba bagolo, ba ba tlilego go mo swara, a re: Le tšwile ka marumo le ka melamo, eke le tlile go swara mohlakodi. ₅₃Mola ke na le lena Ntlongkgethwa ka mehla, ga la ka la nkiša matsogo. Fela, le ke lona lebaka la lena le maatla a leswiswi.

₅₄Ge ba mo swere, ba tloga nae ba mo iša ngwakong wa moperisita e mogolo. Petro a latela a le kgole. ₅₅Ya re ge ba goditše mollo gare ga lapa, ba dutše sehlopha, Petro a tla a dula le bona. ₅₆Mosetsana e mongwe a mmona a dutše mollong, a mo lebeleša a re: Le yo o be a na le yena.

₅₇Petro a latola a re: Mosadi, nna ga ke mo tsebe.

₅₈Ka moragwanyana e mongwe a mmona a re: Le wena o wa bona.

Petro a re: Monna, ga go bjalo.

₅₉Gwa feta lebaka le e ka bago la nako e tee; ke ge e mongwe a tiišetša a re: Ruri, le yena yo o be a na nae; le gona ke wa Galilea.

₆₀Petro a re: Monna! Nna ga ke tsebe se o se bolelago.

-- Ge a realo mogogonope wa lla. ₆₁Morena a retologa, a lebelela Petro. Ke mo Petro a elelwago tše Morena a mmoditšego tšona, ge a re: Mogogonope ge o sešo wa lla, o tlo ba o latotše gararo wa re ga o ntsebe. ₆₂A tšwela ntle a lla gabohloko.

₆₃Banna bao ba go swara Jesu, ba mo kwera, ba mo itia; ₆₄Ba mo khupetša mahlo, ba mo setla sefahlogo, ba mmotšiša ba re: Porofeta, ke mang a go setlilego? ₆₅Ba mo goboša ka tše dingwe tše ntši tše ba di boletšego.

₆₆Ge go esa, ba bagolo ba setšhaba le baperisita ba bagolo le bamangwalo, ba bokana ba mo iša lekgotleng la bona. ₆₇Ba re: Re botše ge o le Kriste.

A fetola a re: Ge nka le botša, le ka se ke la dumela. ₆₈Ge ke le botšiša, ga le fetole. ₆₉Go tloga bjale Morwamotho o tlo dula ka letsogong le letona la maatla a Modimo.

₇₀Bohle ba re: A o re o Morwa wa Modimo?

Jesu a fetola a re: Le boletše, gobane ke nna.

₇₁Bona ba re: Re sa nyaka bohlatse bjang? Re di kwile ka nnoši di etšwa molomong wa gagwe.