LUKA 19

₁A tsena a tšwa ka gare ga motse wa Jeriko. ₂Gona moo go be go na le monna e mongwe, leina la gagwe ke Sakeo; e be e le yena letona la ba lekgetho, le gona e le mohumi. ₃Yena yo o be a phegelela go bona Jesu, a re: Ke ofe? Fela, a širetšwa ke lešaba, gobane e be e le motho e mokopana. ₄A kganyelela kua pele, a namela sehlare sa mogo, gore a tle a mmone, gobane Jesu o be a tlo feta ka gona fao. ₅Jesu ge a fihla moo, a iša mahlo godimo, a mmona, a re: Sakeo, akgofa o fologe; gobane lehono ke swanetše go dula ngwakong wa gago.

₆Ke mo Sakeo, a akgofilego a fologa, a mo iša ga gagwe a thabile. ₇Gomme bohle ba ba di bonego ba tsota ba re: O gorogetše ga monna wa modiradibe.

₈Sakeo yena a ema, a bolela le Morena a re: Morena, o ko bone; maruo a ka ke a arolela bahloki ka bogare gomme ge ke forile motho, ke mo lefela gane.

₉Jesu a bolela le Sakeo a re: Lehono ngwako wo o tletšwe ke phološo, gobane le yena ke ngwana wa Aborahama. ₁₀Gobane Morwamotho o tlile go nyaka le go phološa se se timetšego.

₁₁Ya re ba sa theeditše, a iša pele ka go bolela ka seswantšho, gobane ba be ba le kgauswi le motse wa Jerusalema, mme ba be ba re Mmušo wa Modimo o tlo tloga o bonala bjale. ₁₂A re: Motho e mongwe wa kgoši a na a ya nageng ya kgole, gore a itšeele bogoši, a boe. ₁₃A bitša bahlanka ba gagwe ba lesome, a ba nea diponto tše lesome, a re: Dirang ka tšona; ke tlo boa. ₁₄Fela, batho ba motse wa gagwe ba be ba mo hloile. Ba roma batseta mehlaleng ya gagwe, ba re: Ga re rate go bušwa ke yena.

₁₅Mohla a boago a tšere bogoši, a laela a re bahlanka bao a ba neilego ditšhelete ba bitšwe, gore a tsebe se ba se dirilego ka tšona. ₁₆Gwa fihla wa pele a re: Morena, ponto ya gago e tswetše tše lesome. ₁₇Kgoši ya re: Ke mo go botše! O mohlanka yo bolo, ka gobane o mpotegetše ka tše nyane. O tlo buša metse e lesome. ₁₈Wa bobedi a tla a re: Morena, ponto ya gago e tswetše tše tlhano. ₁₉Kgoši ya re: Le wena o tlo buša metse e mehlano.

₂₀Gwa tla e mongwe a re: Morena, ponto ya gago še. Ke be ke e bolokile e phuthetšwe ka lešela. ₂₁Gobane ke be ke go boifa, ka ge o le monna yo šoro. O tšea mo o sa kago wa bea; o buna mo o sa kago wa bjala. ₂₂Kgoši ya re: O mohlanka e mobe. Ke tlo ahlola ke eya le molomo wa gago. O tsebile ge ke le motho yo šoro, ke tšeago mo ke sa kago ka bea, ke bunago mo ke sa kago ka bjala. ₂₃Ge go le bjalo, o šitišitšwe ke eng go iša tšhelete ya ka go baadimi? Gona go boeng gaka nka be ke e latile le kokeletšo ya yona.

₂₄Kgoši ya laela ba ba emego moo, ya re: Mo amogeng ponto yeo, le e nee yola wa diponto tše lesome. ₂₅Bona ba re: Morena! Hleng o na tše lesome! ₂₆Nna ke re, e a nago natšo o tlo fiwa; e a se nago natšo o tlo amogiwa le se a nago le sona. ₂₇Gomme manaba a ka a go re: Ga re rate go bušwa ke wena, a tlišeng fa le a bolaye pele ga ka.

₂₈Jesu ge a feditše go bolela, a ba eta pele ge ba rotogela Jerusalema. ₂₉Eitše ge ba batamela Betefage le Bethania mo thabeng ye ba rego ke ya Mehlware, a roma ba babedi ba barutiwa ba gagwe. ₃₀A re: Yang motsaneng wo re lebanego nawo; e tlo re ge le tsena, le tlo hwetša pokolwana e kgokilwe, e sešogo ya namelwa ke motho; Le e hunolle le tle nayo. ₃₁Gomme ge motho a ka le botšiša a re: Le e hunollelang? Le tlo re: Morena o a e hloka.

₃₂Ba ba romilwego ba ya, ba hwetša go le bjalo ka ge a ba boditše. ₃₃Ge ba sa hunolla pokolwana yeo, beng ba yona ba tla ba re: Le e hunollelang?

₃₄Bona ba re: Morena o a e hloka. ₃₅Ba e tliša go Jesu, ba bea dikobo tša bona godimo ga yona, ba tsebo mo nametša. ₃₆Ge ba eya, batho ba ala dikobo tša bona tseleng.

₃₇Ge ba etla motheogeng wa thaba ya Mehlware, bontši ka moka bja barutiwa ba thoma go tumiša Modimo, ba hlaboša mantšu ba thabile, ba mo reta ka mehlolo ka moka ye ba e bonego. ₃₈Ba re: A go retwe Kgoši e tlago ka leina la Morena; legodimong go be le khutšo; magodimodimong go ye tumišo.

₃₉Bafarisei ba bangwe ba le gare ga lešaba, ba tla ba re: Moruti, kgalema barutiwa ba gago.

₄₀Jesu a fetola a re: Ke a le botša, ge bao ba ka homola, go tlo goa maswika.

₄₁Ya re ge a batamela mme a bona motse, a o llela, ₄₂a re: O ka be o re ka lona tšatši le la gago wa lemoga tše di go išago khutšong; fela, bjale di utagetše mahlo a gago. ₄₃Gobane o tlo tlelwa ke matšatši ao manaba a gago a tlogo epa lengope a go dikologa a go rakelela, a go tlaletše thoko tšohle. ₄₄Ba tlo go digela fase le bana ba gago ba go wene; ba ka se ke ba tlogela leswika le sa hlatlagane le lengwe; ka gobane o sa ka wa lemoga lebaka le o etetšwego ka lona.

₄₅Ge a tsena Ntlongkgethwa a thoma go leleka ba ba bego ba bapatša ba reka mo go yona. ₄₆A bolela le bona a re: Go ngwadilwe gwa thwe: Ngwako wa ka ke ngwako wa thapelo; mme lena le o dirile legolo la bahlakodi.

₄₇A fela a ruta Ntlongkgethwa ka mehla, mola baperisita ba bagolo le bamangwalo ba phegelela go ka mmolaya, ba na le bagolo ba setšhaba. ₄₈Fela, ba se ke ba kgona selo, gobane batho ka moka ba be ba mo gomaretše, ba mo theetša.