LEFITIKO 4

₁Morena o boletše le Moshe a re: ₂Botša Baisiraele o re: Ge motho a sentše, a sa dira ka boomo, a dira se se ileditšwego ke Morena, a sela o mongwe wa melao, ₃ge go sentše moperisitamotlotšwa, a obela setšhaba molato, yena a tlišetše Morena powana ya leselela e se nago bosodi; a e tliše ka baka la sebe se a se dirilego, e be seloba. ₄A e tliše mojako wa Ngwako wa Kgwerano pele ga Morena, a e bee seatla hlogong, a tsebo e hlaba pele ga Morena. ₅Yena moperisitamotlotšwa a ge madi a yona, a a tliše mo Ngwakong wa Kgwerano. ₆A ine monwana wa gagwe mo mading ao, a fokele pele ga Morena; a dire gašupa a lebane le lešira la sekgethwa. ₇Ka madi a fetše dinaka tša aletare ya diorelo tša monko o bose, e lego pele ga Morena mo Ngwakong wa Kgwerano; mme ka moka ga ona a a tšhollele fase ga aletare ya dihlabelo e lego mojako wa ngwako wa Kgwerano. ₈Makhura ka moka a powana yeo ya seloba a a ntšhe mo go yona, e lego lebipi, le makhura ka moka a mala, ₉le dipshio ka dipedi le makhura a tšona le a moseko, le sebetšana, -- a di tloše go a dipshio, ₁₀go dirwe ka mokgwa wa powana ya sedimo sa seleboga, mme moperisita a di tšhume mo aletareng ya dihlabelo. ₁₁Ge e le letlalo la powana, le dinama tša yona ka moka, le hlogo ya yona, le mehlahu ya yona, le mala a yona, le mošwang wa yona, ₁₂powana ka moka a e ntšhetše ntle ga mešaša felo mo go sego ditšhila sethobolong sa molora, mme a e fiše ka mollo godimo ga dikgong. E fišwe gona moo sethobolong sa molora.

₁₃Ge go sentše phuthego ka moka ya Isiraele, e sa ka ya dira ka boomo, phuthego e se tsebe molato woo, mme ba dirile se se ileditšwego ke Morena, se se sa dirwego, ba oba molato, ₁₄mohla go tsebagala sebe se ba se dirilego, phuthego e tliše powana ya leselela e be seloba; ba e tliše pele ga Ngwako wa Kgwerano. ₁₅Gomme bagolo ba phuthego ba bee diatla hlogong ya powana yeo ba le pele ga Morena, me e hlabje pele ga Morena. ₁₆Mme moperisitamotlotšwa a ge madi a powana yeo, a a tliše Ngwakong wa Kgwerano. ₁₇A ine monwana wa gagwe mo mading ao, a fokele pele ga Morena ga šupa a lebane le lešira. ₁₈A fetše dinaka tša aletare e lego pele ga Ngwako wa Kgwerano ka madi ao; mme a a šalago a a tšhollele fase aletareng ya dihlabelo mojako wa Ngwako wa Kgwerano. ₁₉Makhura ka moka a a tšee a a tšhume aletareng. ₂₀Powana ye a e dire ka mokgwa wa powana ya seloba, ka mokgwa woo. Ke mo moperisita a tlogo dira poelanyo, mme ba lebalelwa. ₂₁Powana ka moka a e ntšhetše ka ntle ga mešaša, a e tšhume ka mokgwa wa yela ya pele. Ke sona seloba sa phuthego.

₂₂Ge go sentše wa kgošana, a dirile se se ileditšwego ke Morena Modimo wa gagwe, a sa dira ka boomo, a dirile se se sa dirwego, a oba molato, ₂₃ge a ka botšwa sebe sa gagwe se a sentšego ka sona, gona a tliše phokwana e se nago bosodi, e be sebego sa gagwe. ₂₄A bee seatla sa gagwe hlogong ya phokwana, yeo, a e hlabe gona moo go hlabjago dihlabelo pele ga Morena. Ke seloba. ₂₅Moperisita a tsebo kgwatha madi a seloba seo a fetša dinaka tša aletare ya dihlabelo ka ona; madi a šetšego a a tšhollele fase aletareng ya dihlabelo. ₂₆Makhura ka moka a a tšhume ka mokgwa wa sedimo sa seleboga. Ke mo moperisita a tlo go mo direla poelanyo ka baka la sebe sa gagwe, mme a lebalelwa.

₂₇Ge go sentše motho fela, a dira se se ileditšwego ke Morena, a sa dira ka boomo, a dirile se se sa dirwego, a oba molato, ₂₈ge a botšwa sebe sa gagwe se a se dirilego, a a tliše putšane ya tshadi e se nago bosodi, e be sebego sa gagwe ka baka la sebe sa gagwe se a se dirilego; ₂₉a bee seatla sa gagwe mo hlogong ya seloba sa gagwe, mme a se hlabe mo go hlabjago dihlabelo. ₃₀Moperisita a kgwathe madi a yona ka monwana wa gagwe, a fetše dinaka tša aletare ya dihlabelo ka ona; madi a yona a a šetšego ka moka a a tšhollele fase aletareng. ₃₁Makhura a yona ka moka moperisita a a tšee ka mokgwa wo a tšerego makhura a sedimo sa tebogo ka wona, a a tšhume aletareng, e be monko o bose wa Morena. Ke mo moperisita a tlogo mo direla poelanyo, mme a lebalelwa.

₃₂Ge a ka re ke tliša nku ya sebego sa seloba, gona a tliše ya tshadi ye e se nago bosodi. ₃₃A bee seatla mo hlogong ya seloba sa gagwe, mme a e hlabe mo go hlabjago dihlabelo. ₃₄Moperisita a kgwathe madi a seloba seo ka monwana wa gagwe, mme a fetše dinaka tša aletare ya dihlabelo ka ona; madi a yona a a šetšego ka moka a a tšhollele fase aletareng. ₃₅Makhura a yona ka moka a a nthše ka mokgwa wa a nku ya sedimo sa seleboga, mme a a tšhume mo aletareng, mo mellong ya Morena. Ke mo moperisita a tlogo mo direla poelanyo ka baka la sebe sa gagwe se a se dirilego, mme a lebalelwa.