LEFITIKO 26

₁Le se ke la itirela medimo; le se ke la ba la bea seswantšho se se betlilwego ka kwata, le ge e le thololo ya leswika, mme la di khunamela; ka gobane Modimo wa lena ke nna Morena. ₂Disabatha tša ka le di hlokomele; le boife sekgethwa sa ka. Ke nna Morena. ₃Ge le latela melao ya ka, mme la hlokomela ditaelo tša ka, la dira se se bolelwago ke yona, ₄gona ke tlo le fa dipula ka lebaka la tšona; naga e tlo le medišetša tše le tlogo di buna, le dihlare tša le nea dienywa tša tšona. ₅Le tlo hlwa le fola, la ba la fula dienywa tša morara; la hlwa le fula, la ba la lema. Mme le tlo ja bogobe bja lena la kgora, la dula nageng ya geno le iketlile.

₆Lefase la geno ke tlo le fa khutšo; le tlo robala boroko, go se e a le tšhošago. Dibata tše šoro ke tlo di fediša; mme lerumo le ka se ke la tsena mo nageng ya geno. ₇Manaba a lena le tlo a lelekiša; a tlo fela ka lerumo le lebane nao. ₈Ba bahlano ba geno ba tlo raka ba lekgolo; ba lekgolo ba geno ba tlo raka ba dikete tše lesome; manaba a lena a tlo fela ka lerumo le lebane nao. ₉Ke tlo dula ke le šetša, ke le atišetša thari, ka le dira ba bantši; mme kgwerano ya ka le lena ke tlo e tiiša. ₁₀Le tlo ba le sa ja tša ngwagola, la ba la di tloša tša šuthela tše mpsha. ₁₁Ke tlo aga ngwako wa ka makgatheng a lena; mme pelo ya ka e ka se ke ya le nyatša. ₁₂Ke tlo sepela le lena, ka ba Modimo wa lena, mme lena le le setšhaba sa ka. ₁₃Ke nna Morena Modimo wa lena; ke le ntšhitše nageng ya Egipita, gore le se hlwe le eba matlapša. Ke robagantše joko ya lena, mme ka le sepediša le inamologile.

₁₄Fela, ge le sa kwe se ke se bolelago, le sa dire se se bolelwago ke ditaelo tša ka ka moka, ₁₅ge le lahla melao ya ka, mme dipelo tša lena tša nyatša mekgwa ya ka, la lesa go dira tše ke le laetšego tšohle, le senya kgwerano ye ke e dirilego le lena, ₁₆gona tše nna ke tlogo le dira šedi: -- Ke tlo le tlela ka tše di tšhošago, ka bolwetši bja sehuba, ka letadi legohlometšamahlo leidibatšamoya. Le tlo lemela lefela; ba ba tlo go ja ke manaba a lena. ₁₇Ke tlo le hlaba ka mahlo, la tlo rakwa ke manaba a lena, la tlo bušwa ke ba ba le hloyago, le tlo tšhaba etšwe le sa hlomarelwe ke motho.

₁₈Mme e tlo re ka tše bjalo le sa eletšege, ke tlo boela ke le otla ka dira gašupa ka baka la dibe tša lena. ₁₉Ke tlo robaganya boikgogomošo bja maatla a lena, ka bapa leratadima la lena la etša tshipi, lefase la lena la etša mphiri; ₂₀maatla a lena a felela lefela, mme naga ya lena e se le ntšhetše puno, le dihlare tša naga di se bee dienywa tša tšona.

₂₁Gomme e tlo re ge le sa ya le nganga, le gana go kwa nna, ke tlo boela ke le otla ka dira gašupa, ka mo go lekanego dibe tša lena. ₂₂Ke tlo roma dibata tša naga tša ja bana ba lena, tša fetša dikgomo tša lena; tša le fokotša, mebila ya lena ya wela kgwahlana.

₂₃Gomme e tlo re le ka tše bjalo le sa eletšege, le nganga le sa ya, ₂₄gona le nna ke tlo tloga ke ngangile, le nna ka le otla ka dira gašupa ka baka la dibe tša lena. ₂₅Ke tlo roma lerumo la le tsena, ya ba go lefetša ge le sentše kgwerano ya ka. Ge le tšhabela dibong tša lena, ke tlo roma dinkhu tša le tsena, la gafelwa matsogong a manaba a lena. ₂₆Mohla ke tlogo thokga thito ya bogobe, basadi ba lesome ba tlo apeela sebešong setee, ba le solela bogobe ka kelo ya boima, mme la ja le sa khore.

₂₇Ge le ka tšona le sa eletšege, le sa ya le ngangana le nna, ₂₈gona le nna ke tlo dula ke nganga ke le galefetše, ka le otla gašupa ka baka la dibe tša lena. ₂₉Le tlo ba la ja nama ya barwa ba lena, le nama ya barwedi ba lena; le tlo ja yona. ₃₀Ke mo ke tlogo senya meboto ya medimo ya lena, le dikokwane tša yona. Ditoto tša lena ke tlo di lahlela ditotong tša medimo ya lena; gomme pelo ya ka e tlo ba e le nyenya. ₃₁Metse ya lena ke tlo e šwalalanya; dintlokgethwa tša lena ke tlo di dira matlawa; nka se hlwe ke dupa diorelo tša lena. ₃₂Ke tlo thosanya naga wa go tlaba manaba a lena a a tlogo dula go yona. ₃₃Gomme lena ke tlo le gašanyetša ditšhabeng, ka le šala nthago ke khwamotše tšhoša, naga ya lena ya šala e le ya lešoka, metse ya lena e le marope. ₃₄Ke mo naga e tlogo kgona go thabela disabatha tša yona mehla yohle, e le lehanata, lena le falaletše nageng ya manaba a lena. Ke gona naga e tlogo khutša, ya thabela disabatha tša yona. ₃₅E tlo khutša e le lehanata; ka gobane lena le tlo ba le e hlokišitše go khutša ka disabatha mehleng le dutše go yona.

₃₆Ge e le mašalela a lena a kua dinageng tša manaba a bona, ke tlo a tsenya boi dipelong. Ba tlo tšhoga mokgwahla wa letlakala le le hlohloregago, ba tšhaba ba re ke lerumo, ba a we, etšwe go se e a ba hlomerego. ₃₇Ba tlo kgorometšana ba ušana, e ke ba ušwa ke lerumo, le ge go se mohlomaredi. Le ka se eme la lebana le manaba a lena. ₃₈Le tlo senyegela gona kua ditšhabeng, mme la lewa ke naga ya manaba a lena. ₃₉Mašalela a lena a tlo notlega gona kua nageng ya manaba a lena ka baka la makgopo a bona; a tlo notlega bjalo ka botatabo ka baka la makgopo a bona.

₄₀Ke mo ba tlogo bobola bokgopo bja bona, le bokgopo bja botatabo, le dikarogo tša mola ba ntlhanogela, tša mola ba sa tšama ba ngangana le nna, ₄₁le nna ka tšama ke ngangana le bona. Ge mohlomongwe moo dipelo tša bona tše lonya di ka ikokobetša, tša itshola ka baka la molato wa bona, ₄₂ke mo nna ke tlogo gopola kgwerano ye ke e dirilego le Jakobo, ye ke e dirilego le Isaka, ye ke e dirilego le Aborahama. Le yona naga ke tlo e gopola. ₄₃Yona naga e tlo ba e tlogetšwe gore e kgone go thabela disabatha tša yona e le lešope ka baka la bona. Mme bona ba tlo ba ba itshola ka baka la bokgopo bja bona, bja ge ba nyaditše ditaelo tša ka, mme dipelo tša bona tša hlaswa melao, ya ka. ₄₄Fela, ge go le bjalo, le ge ba tlo ba nageng ya manaba a bona, nka se ke ka ba nyatša, nka se ke ka ba hlaswa ka ba fedišetša ruri. Nka se ke ka senya kgwerano ye ke e dirilego le bona; ka gobane ke nna Morena Modimo wa bona.

₄₅E tlo ba e le ka baka la bona ge ke gopola kgwerano ye ke e dirilego le ba bogologolo, mola ke ba ntšha nageng ya Egipita, ba ditšhaba ba di bona; ka dira gore ke be Modimo wa bona, nna Morena.

₄₆Ke yona melao le ditaelo le dithuto tše Morena a di beilego ka Moshe thabeng ya Sinai gore e be kwano ya gagwe le Baisiraele.