LEFITIKO 25

₁Morena o boletše le Moshe a le mo thabeng ya Sinai a re: ₂Bolela le Baisiraele o ba laele o re: Ge le fihla nageng ye ke tlogo le fa yona, gona le naga e lale, e be le Sabatha ya Morena. ₃O fetše nywaga e selelago o lema tšhemo ya gago, o thena morara o kgobela dienywa tša wona. ₄Fela, ngwaga wa go šupa e tlo ba Sabatha ya go khutša ga naga, Sabatha ya Morena. O se ke wa lema tšhemo ya gago; o se ke wa thena morara wa gago. ₅O se ke wa buna maidi, o se ke wa kgobela dienywa tša morara o sa thenwago; naga e be le ngwaga wa Sabatha. ₆Dienywa tša Sabatha ya naga a e be dijo tša lena, tša gago, le tša molata wa gago wa monna le ge e le wa mosadi, le tša mothwalwa wa gago, le tša modiiledi e a dutšego go wena. ₇Ka moka tše di medišwago ke naga e be dijo tša dikgomo tša gago, le tša diphoofolo tše di lego mo nageng ya geno.

₈Bjale o bale nywaga e šupago ya Sabatha, e be nywaga e šupago e balwago gašupa, ya ba nywaga e masome a mane a metšo e senyane. ₉Ke mo o tlogo letša phalafala ya megobo ka la lesome la kgwedi ya go šupa; ka tšatši la poelanyo o letše phalafala nageng ya geno ka moka. ₁₀E be go kgetha ngwaga wa masome a mahlano. Naga le bohle ba ba dutšego go yona, le ba hlabele mokgoši wa khunologo. A e be ngwaga wa lena wa mogobo, wa gore ka moka le boele magaeng a lena, mang le mang a boele molokong wabo. ₁₁Ngwaga wo wa masome a mahlano e be ngwaga wa lena wa mogobo; le se ke la lema; le se ke la kgobela maidi a wona; mme le se ke la ripa dienywa tša morara o sa thenwago. ₁₂Ka gobane ke ngwaga wa mogobo; le o dire o mokgethwa; gomme le je tše o di tšweletšago.

₁₃Ka ngwaga wo motho a boele legaeng la gagwe. ₁₄Ke gore ge le rekišetšana le ge le rekelana, go se ke gwa ba le e a pateletšago ngwanabo. ₁₅Ge le rekelana le lekanye theko ka nywaga, ka go bala ye e fetilego go tloga ngwageng wa megobo, le ka go bala nywaga ya dipuno tše di sa šetšego. ₁₆Ge go sa šetše nywaga e mentši, o mo godišetše theko; ge go šetse e sego mekae, gona o mo fokoletše; ka gobane o rekiša ka go bala dipuno. ₁₇Ke gore motho a se ke a pateletša wa gabo; a boife Modimo, ka gobane ke nna Morena Modimo, wa lena.

₁₈Le dire se se bolelwago ke melao ya ka; le hlokomele ditaelo tša ka, le latele tšona; ke mo le tlogo dula nageng yeo le iketlile. ₁₉Gomme naga e tlo mediša dikenywa tša yona, la di ja la kgora; la dula go yona le iketlile.

₂₀Gomme ge mohlomongwe le ka re: ka ngwaga wa go šupa re tlo jang etšwe re sa bjale selo, re sa bune selo! ₂₁Le tlo hwetša ke romile tšhegofatšo ya ka ka ngwaga wa go selela, o tšweleditše dikenywa tše di lekanego nywaga e meraro. ₂₂E tlo re ge le lema ka ngwaga wa seswai la ba le eja dikenywa tša ngwagolola, go fihla ge go butšwa tša ngwaga woo.

₂₃Naga e se ke ya rekišwa ya thwe e ile; ka gobane naga ke ya ka; mme lena le baeng ba ka; le diiletše go nna.

₂₄Ke ka baka leo le swanetšego go bea leba ka la thekololo mo nageng ya geno. ₂₅Ge ngwaneno a diila, a ba a rekiša mphapa wa naga ya gagwe, gona go tle morekolodi wa gagwe wa moloko wa gabo, a rekolle se se rekišitšwego ke ngwanabo. ₂₆Ge motho a se na morekolodi, fela a ba a ruile ka mediro ya gagwe, a ba a hwetša sa go ithekollela, ₂₇gona go balwe nywaga go tloga mola a rekiša, gomme a ntšhe tše di lebanego nywaga ye e sa šetšego, mme a boele legaeng la gagwe. ₂₈Ge a hlokile tše di lekanego go rekolla, gona mphapa wo o rekišitšwego o swarwe ke moreki, go be go tle ngwaga wa megobo, mme wa hunologa; ya ba gona a boelago legaeng la gagwe.

₂₉Ge motho a ka rekiša ngwako wa mo motseng wa sebo, a ka o rekolla go fihla go feleng ga ngwaga woo wa go rekelana; ke lona lebaka la thekollo. ₃₀Ge a fetilwe ke ngwaga woo, a sešo a o rekolla, gona ngwako woo e tlo ba wa moreki go iša ditlogolong tša gagwe; o ka se ke wa tšwa le ka ngwaga wa megobo. ₃₁Fela, ge e ka ba nywako ya mo metsaneng ye e se nago merako, yona a e dirwe ka mokgwa wa mašemo; e ka rekololwa, mme e hunologa ka ngwaga wa megobo. ₃₂Ge e le metse ya Balefi, le nywako ya metseng ya bona, yona yeo e ka rekollwa neng le neng ka ge e le ya Balefi. ₃₃Ge Molefi a sa rekolle ngwako, gona thekišo ya ngwako e tlo fela ka ngwaga wa megobo, ge e le ngwako wa mo motseng wa Balefi; ka gobane nywako ya metseng yeo ke magae a Balefi mo nageng ya Baisiraele. ₃₄Ge e le naga ya mafulo ye e bapetšego le metse ya bona, yona ga e rekišwe, ka gobane ke ya bona neng le neng.

₃₅Ge ngwaneno a ka diila a na le wena, gomme seatla sa gagwe sa fokola, o mo hlatlole bjalo ka moeng le modiidi. ₃₆Se o mo adimago sona o se ke wa re: se tswale, goba wa re: se boe le kokeletšo. O boife Modimo wa gago, ngwaneno a phele a na le wena. ₃₇O se ke wa mo adima tšhelete ka go nyaka katišo; le ga o mo nea dijo, o se ke wa mo ntšhiša go fetiša tekanyo. ₃₈Ke nna Morena Modimo wa lena. Ke le ntšhitše nageng ya Egipita, gore ke le nee naga ya Kanana, gore ke be Modimo wa lena.

₃₉Ge ngwaneno a ka diila, gomme a ithekiša mme wena wa mo reka, gona o se ke wa mo diriša mediro bjalo ka letlapša. ₄₀A a dule go wena bjalo ka mohlanka e a thwetšwego ka letšatši, le bjalo ka modiiledi, a go direle go be go tle ngwaga wa megobo. ₄₁E be mo a tlogo tšwa go wena a na le bana ba gagwe, a boela molokong wa gabo, gae ga gagwe. ₄₂Ka gobane batho ba ke balata ba ka ba ke ba ntšhitšego nageng ya Egipita; ba se ke ba rekišwa wa letlapša. ₄₃O se ke wa mmuša ka thata; o boife Modimo wa gago. ₄₄Ge e le molata wa gago wa monna le ge e le wa mosadi, ba o ratago go ba nabo, e be ba ba tšwago dileteng tše di agilego kua ntle ga mellwane ya lena. Go bona o ka ithekela molata wa monna le wa mosadi. ₄₅Le gona le ka ba reka go baeng ba ba diiletšego go lena, le rue bahlanka mo go bona, le melokong ya bona ye e tswetšwego mo nageng ya lena; leo ke leruo la lena. ₄₆Ba tlo šala e le ba bana ba lena, e le bohwa; ba tlo fela ba ba direla ka mehla; fela, bana ba bolena ba Baisiraele, go se ke gwa ba le e a bušago ngwanabo ka thata.

₄₇Ge moeng le ge e le modiiledi a ka huma ka mediro ya gagwe a le mo nageng ya geno, mme ngwaneno a diilela go yena, a ba a a ithekiša, a rekwa ke moeng e a dutšego mo nageng ya geno, goba a rekwa ke wa leloko la moeng, ₄₈gona go be le thekollo ge a šetše a ithekišitše; a rekollwe ke e mongwe wa bana babo. ₄₉Rangwanagwe, le ge e le ngwana wa rangwanagwe a mo rekolle; goba e mongwe wa moloko wa gagwe e lego wa gabo, a mo rekolle. Ge a ka kgona, a ithekolle ka noši. ₅₀Morekollwa a balelane le morekolodi wa gagwe, ba thome ka ngwaga woo wa thekollo, ba fihliše ngwageng wa megobo, gomme tšhelete ya thekollo ya gagwe e lekanywe ka palo ya nywaga yeo. O tlo dula mo go yena ka mokgwa wa mothwalwa ge a balelwa matšatši. ₅₁Ge nywaga e sa le e mentši, le tšhelete ya thekollo ya gagwe e tlo ba e ntši. ₅₂Ge nywaga go fihla ngwageng wa megobo e se mekae, a mmalele ka go lekanya fao; a mmušetše tšhelete ya thekollo ya gagwe ka go lekanya ka nywaga yeo ya gagwe. ₅₃A dule mo go yena bjalo ka e a thwetšwego ka ngwaga, gomme a se ke a bonwa a mmuša ka thata. ₅₄Ge a sa rekollwe ka mokgwa woo, gona o tlo hunologa ka ngwaga wa megobo, yena le bana ba gagwe. ₅₅Ka gobane Baisiraele ke balata ba ka, ke bona balata ba ka, ba ke ba ntšhitšego nageng ya Egipita, nna Morena Modimo wa lena.