DILLO TŠA JEREMIA 3

₁Ge e le nna, ke monna wa go bona mahlomola, ka kgati ya mohla o galefile. ₂O nkgogile wa ntshepetša leswiswing, e sego seetšeng. ₃Ke nna yo atla sagwe se bego se mpolela mehla yohle.

₄A gwametša nama ya ka le letlalo la ka, a nthoba mašapo. ₅A nthakelela ka mefolo le ditlaišego, ₆A ntudiša maswiswing boka bahu ba bogologolo.

₇A nkagelela ka merako, ka se kgone go tšwa, a nthweša thobo ya ditlemo, ₈A nyatša dithapelo tša ka, le ge ke goelela ke hlaba mokgoši, ₉A thiba tsela ya ka ka maswika, a ntlhokiša le tselana.

₁₀Tše a ntirilego tšona ke tša phirimokhukhuni, ke tša taumolaledi; ₁₁A senya tsela tša ka, a nthuntha a ntira letlawa; ₁₂A nganga bora bjagwe, a ntira wa maleba ka mesebe,

₁₃Mme bana bao ba bora a ntlhaba dipshio ka bjona; ₁₄Ka ba wa go segwa ke bohle ba setšhaba sešo, ka hlwa ke le koša ya bona. ₁₅O ntešitše tše di galakago, a nnoša lengana.

₁₆O phuriša meno a ka magakabje, a nkatelela moloreng. ₁₇O raketše moya wa ka kgole le khutšo, a ntebatša tše dibotse. ₁₈Ka ba ka re: Ke fedile maatla a lehutšo la go letela Morena.

₁₉A ko se lebale mahlomola a ka, le go lahlega ga ka, le lengana le, le bohloko bjo. ₂₀Pelo ya ka e hlwa e gopola tšona e kokobetše ka teng ga ka. ₂₁Ke tlo di elahloko, ka holofela ke lebane natšo.

₂₂Ke ka botho bja Morena ge re sa ka ra felela ruri, le ka go se fele ga dikgaugelo tšagwe. ₂₃Kgaugelo tša gago di tsoga e le tše mpsha mehla yohle, o le wa potego kgolo. ₂₄Pelo ya ka e re: Nna wa ka ke Morena! Ke ka baka leo ke sa holofetše yena.

₂₅Morena o setša ba ba mmotilego, le pelo ye e mo nyakago. ₂₆Ke mo go botse ge motho a hutša a ikhomoletše, a ba a hlakodišwa ke Morena. ₂₇Ke mo go botse, monna ge a rwala joko e sa le e mofsa.

₂₈A a dule a nnoši a ikhomolele; o rwešitšwe ke yena. ₂₉A a iše molomo wagwe leroleng; mohlomong seholofelwa se sa le gona. ₃₀E a mo tiago a mo sekegele thama, a hore dihlong.

₃₁Gobane mong wa rena ga a hlale go ya go ile. ₃₂Le ge a hlokofatša, o a gaugela; tša botho bja gagwe ke tše dintši. ₃₃Gobane ge a otla bana ba batho, ge a ba hlokofatša, ga a dire di mo kgahla.

₃₄Ge go gatakwa batlengwa ka moka ba naga. ₃₅Ge taba ya monna e senywa kahlolong ba le pele ga Yogodimodimo, ₃₆Ge motho a patwa kgorong, mong a bohle a ga a di bone?

₃₇Ke mang a ka rego: Go na le se se tlogo direga, ge yena mong wa bohle a sa ka a re se be gona? ₃₈Tše mpe le tše botse, a ga di tšwe molomong wa Yogodimodimo? ₃₉Batho ba reng ba tsota maphelo? Monna a a tsote dibe tšagwe.

₄₀A re šetšeng ditsela tša rena; a re di latišeng; re boele go Morena. ₄₁Dipelo tsa rena, le diatla tša rena, re di emišetše go Modimo kua magodimong. ₄₂Go sentše rena re ganne go kwa, mme wa se re lebalele.

₄₃Wa ba wa itlhama ka kgalefo, mme wa re hlomara, wa bolaya, wa se setše, ₄₄Wa khuta ka leru; thapelo e se go fihlele; ₄₅Wa re dira maudi le ditšhila gare ga ditšhaba;

₄₆Mme manaba ohle a rena a re ahlamela a re sega. ₄₇Sa rena ke tšhogo le poifo, tšhwalalano le mašegerepe. ₄₈Mahlo a ka a tšhologa noka tša meetse ka thobego ya ngwanana wa setšhaba sešo.

₄₉Mahlo a ka ga a kgaotše go tšwa meetse; ga a khutše. ₅₀Morena kua magodimong o tlo ba a okamela a di bona. ₅₁Ihlo la ka le mpabiša pelo ka bohle banana ba motse wa gešo.

₅₂Ba go fo ntlhoya ba hlwa ba nthaka boka nonyana. ₅₃Phelo bja ka ba bo kateletše moleteng; ba nkgatla ka maswika. ₅₄Ke farafarwa hlogo ke matlobotlobo, ka ba ka re ke fedile.

₅₅Ke le tlasetlase moleteng ka bitša leina la gago, Morena. ₅₆Wa kwa lentšu la ka, wa se ithibe tsebe mola ke fegelwa, ge ke goelela. ₅₇Wa mpatamela mohla woo ke go bitša, wa re: Se boife!

₅₈Wene mong a ka wa ntwela, wa namolela phelo bja ka. ₅₉Morena, o di bone ge ke pateletšwa; hle nkahlolele taba ya ka. ₆₀O di bone tšohle ge ba ntira ka sehlogo, le tšohle tše ba ntakanego tšona.

₆₁Morena, o ba kwele ge ba nthoga, le tšohle tše ba ntakanego tšona, ₆₂Le melomo ya ba ntsogelago maatla, ba dutše ba ntheile mehla yohle. ₆₃O ko ba bone, ge ba dula, ge ba tsoga, koša ya bona ke nna.

₆₄Morena, o tlo ba lefetša ka tše lekanego tiro tša bona. ₆₅O tlo ba thatafiša pelo, wa ba hlolela kotsi. ₆₆O tlo ba hlomara o befetšwe, ba se hlwe ba eba gona mono tlase ga leratadima la Morena.