Maswika a Giligala
1Ya re ge setšhaba ka moka se feletše go sela noka ya Jorodane, Morena a botša Joshua a re: 2Ikgetheleng banna ba lesome le metšo e mebedi; leloko le lengwe le le lengwe le ntšhe o tee. 3Le ba laeleng le re: Kukang maswika a lesome le metšo e mebedi a felo moo maoto a baperisita a bego a eme gona a itsetsepetše mo gare ga noka ya Jorodane, le seleng nao, le a tseme marobalong a lena mo le tlogo lala bošego bjono.
4Joshua a bitša banna bao ba lesome le metšo e mebedi ba a ba beilego ba etšwa go Baisiraele, o tee o tee wa leloko. 5Joshua a ba roma a re: Selang le ete polokelo ya Morena Modimo wa lena pele, le tsene mo nokeng ya Jorodane; e mongwe le e mongwe a tšee leswika a le šikare, ka palo ya meloko ya Baisiraele, 6gore e be a seka fa ga geno; e tle e re ka moso ge bana ba lena ba botšiša ba re: Maswika a ke a go le eletšang? 7Le ba botše tša meetse a Jorodane a a kilego a kgaolwa ge go fihla polokelo ya kgwerano ya Morena mohla e setšego noka ya Jorodane. Meetse a Jorodane a kile a kgaolwa; gomme maswika a ke seeletši sa ka mehla le mehla sa Baisiraele.
8Baisiraele ba napa ba dira ka mo Joshua a ba laetšego ka gona, ba rwala maswika a lesome le metšo e mebedi a mo nokeng ya Jorodane, ka mo Morena a boditšego Joshua ka gona; ba lebanya palo ya meloko ya Baisiraele; ba sela le maswika ao, ba a iša marobalong, ba a bea ntshe. 9Maswika a mangwe a lesome le metšo e mebedi Joshua o a hlophile mo gare ga noka ya Jorodane felo mo maoto a baperisita ba ba bego ba rwele polokelo ya kgwerano ba bego ba gatile gona. Ona ao le bjale a sa le gona. 10Ge e le baperisita ba ba bego ba rwele polokelo, ba be ba eme mo gare ga noka ya Jorodane, gwa ba gwa phethwa tšohle tše Joshua a di boditšego setšhaba a laetšwe ke Morena; ya ba go dira tšohle ka mo Moshe a bego a laetše Joshua; gomme setšhaba se se ke sa diega go sela noka.
11Ya re ge se feletše go sela, polokelo ya Morena le yona ya sela, mme baperi sita ba eta setšhaba pele. 12Le ba leloko la Rubeni le la Gada le seripa sa ba Manase, ba sela, ba eta Baisiraele pele ba swere marumo, ka mo Moshe a ba boditšego ka gona. 13E nyakile go ba banna ba dikete tše masome a mane ba ba bego ba itlhametše ntwa; ba eta Morena pele go yo hlabana melaleng ya Jeriko. 14Ke lona tšatši le Morena a godišitšego Joshua ka lona, Baisiraele bohle ba di bona, mme ba mmoifa ka mehla yohle ya bophelo bja gagwe, bjalo ka ge ba be ba boifa Moshe.
15Morena o be a boditše Joshua a re: 16Laela baperisita ba ba rwelego polokelo ya kgwerano ya Morena gore ba tšwe mo nokeng ya Jorodane. 17Joshua a ba laela a re: Tšwang mo nokeng. 18Ya re ge baperisita ba ba rwelego polokelo ya kgwerano ya Morena ba etšwa mo nokeng ya Jorodane maoto a bona ge a gata mo go tiilego, ke mo meetse a Jorodane a boetšego moeleng wa ona, a ela bjalo ka peleng, a aparela maboto thoko tšohle.
19E be e le letšatši la lesome la kgwedi ya pele ge setšhaba se botoga se etšwa nokeng ya Jorodane, mme sa bokana Giligala, ka thoko ya bohlabela bja Jeriko. 20Gomme maswika ala a ba tšwilego nao nokeng ya Jorodane, Joshua o a tsemile Giligala; 21a botša Baisiraele a re: Ka moso ge bana ba lena ba ka botšiša botatabo ba re: Maswika a a reng? 22Gona le tlo ba botša la re: Baisiraele ba setše noka ye ya Jorodane ba gata mo go omilego; 23ka gobane Morena Modimo wa lena o be a gopišitše meetse a noka ye ya Jorodane ge le fihla, la ba la sela; ya ba tše di etšago tša mohla wola, tše Morena Modimo wa lena a di dirilego lewatle la mahlaka, le a le gopišitšego ge re fihla, ra ba ra sela. 24E be e le gore ditšhaba ka moka tša lefase di tsebe seatla sa Morena ge e le se maatla, gore le boife Morena Modimo wa lena ka mehla.
