JOSHUA 13

₁E itše ge Joshua a šetše a tšofetše, a atetšwe ke matšatši, Morena a mo rera a re: O tšofetše, o atetšwe ke matšatši; gomme go sa šetše naga e kgolokgolo e sešego ya tšewa. ₂Naga e šetšego ke dilete ka moka tša Bafilisita le tša Bagesuri ka moka, ₃go tloga ka nokeng ya Sihori e rarelago le la Egipita, go fihla mollwaneng wa Ekironi thoko ya leboa e balelwago go Bakanana, dikgošana tše tlhano tša Bafilisita, e lego ya Gasa, le ya Asidodo, le ya Asikaloni, le ya Gathi, le ya Ekironi, le yona naga yela ya Baafi ka thoko ya borwa. ₄Go šetše le naga ka moka ya Bakanana, le Meara e lego ya Basidoni, go fihla Afeke, go fihla ka mellwane ya Baamoro, ₅le naga ya Bagibili, le lehlakore la Libanoni la thoko ya bohlabela go tloga ka Baali-Gada ka tlase ga thaba ya Herimone, go fihla kua go tlago la Hamathi. ₆Ka moka ba ba agilego dithabeng go tloga Libanoni go iša Misirefothe Majima, Basidoni ka moka, nna ke tlo ba raka ge Baisiraele ba fihla. O fele o le abele Baisiraele ka tengwa, ka mo ke go laetšego ka gona. ₇Ba abele naga ye e sa le bjale, e be ya meloko e senyane le ya seripa sa Bamanase.

₈Bao ba bangwe ba bona ba filwego magae a bona le Barubeni le Bagada, a Moshe a ba neilego ona kua mošola wa Jorodane thoko ya bohlabela. Yena Moshe mohlanka wa Morena o ba neile, ₉go tloga ka Aroere lebotong la noka ya Arioni, le metse e lego moeding woo, le molala ka moka o tlogago Medeba wa goma ka Diboni, ₁₀le metse ka moka ya Sihoni kgoši ya Baamoro e bego e buša Hesiboni go fihla mellwaneng ya Baamoni, ₁₁le la Gileada, le la Bagesuri, le la Bamaakati, le thaba ka moka tša Herimone, le la Basani ka moka go goma ka Salika, ₁₂le mmušo ka moka wa Ogo wa Basani e a bego a buša Asetarothe le Ederei, e le e a šaletšego wa mašalela a ba megwanggwang. Bona bao Moshe o ba fentše a ba raka. ₁₃Fela, Baisiraele ba lesitše go raka Bagesuri, le Bamaakati, gomme Bagesuri le Bamaakati le bjale ba sa agile le Baisiraele.

₁₄Ge e le leloko la Balefi, lona ga a ka a le neela karolo e ka bago ya bona, ka gobane karolo ya bona ke mello ya Morena Modimo wa Isiraele, ka mo a ba boditšego ka gona.

₁₅Ba leloko la Rubeni Moshe o ba neile magae ka dilete tša bona. ₁₆Mollwane wa bona o be o tloga Aroere lebotong la noka ya Arinoni, le metse e lego moeding woo, le molala ka moka wa Medeba, ₁₇le Hesiboni, le metse ya gona ka moka e lego molaleng, e lego Diboni, le Bamothebaali, le Bethe-Baali-Meone, ₁₈le Jatsa, le Kedemothe, le Mephate, ₁₉le Kiyathaima, le Sinima, le Tserethe-Sahari mo thabeng ya legoleng, ₂₀le Bethe-Peoro, le Asidodo-Pisiga, le Bethe-Jesimothe, ₂₁le metse ka moka e lego nageng ya molala, le mmušo ka moka wa Sihoni kgoši ya Baamori e e bego e buša Hesiboni, yo Moshe a mo fentšego le dikgoši tša Midiani, e lego Efi, le Rekema, le Tsuri, le Huri, le Reba, balata ba Sihoni ba ba bego ba agile nageng yeo. ₂₂Le Bileama morwa wa Beoro senoge sela Baisiraele ba mmolaile ka lerumo gotee le ba ba bolailwego. ₂₃Mollwane wa Barubeni e be e le noka ya Jorodane; e be e le wona mollwane wa naga ya ba gabo Rubeni ka dilete le ka metse le metsana ya bona.

₂₄Ba leloko la Gada, bona Bagada, Moshe o ba neile naga ka dilete tša bona. ₂₅Mollwane wa bona e be e le Jasere le metse ka moka ya Gileada, le seripa sa naga ya Baamoni go fihla Aroere, thoko ya bohlabela ya Raba, ₂₆le go tloga Mahanaime go fihla Ramathe-Mitsipa, le Betonima, le go tloga Mahanaime go fihla mollwaneng wa Debiri. ₂₇Mo molaleng ke motse wa Bethe-Harama, le wa Bethe-Nimira, le wa Sukothe, le wa Tsafone o šadišitšwego go mmušo wa Sihoni kgoši ya Hesiboni, le noka ya Jorodane le lehwiti la yona, go fihla magomong a lewatle la Genetsareta, ka mošola wa Jorodane thoko ya Bohlabela. ₂₈Ke yona naga ya Bagada ka dilete tša bona le metse le metsana ya bona.

₂₉Ba seripa sa leloko la Manase Moshe o ba neile naga ya bona bao ba seripa sa leloko la Bamanase ka dilete tša bona. ₃₀Naga ya bona ke ya Mahanaime, le ya Basani ka moka, mmušo ka moka wa Ogo kgoši ya Basani, le metsana ya Jairi, e lego mo nageng ya Basani, metsana e masome a selelago, ₃₁le seripa sa naga ya Gileada, le Asetarothe, le Ederei, le metse ya mmušo wa Ogo e neetšwe Bamakiri morwa wa Manase, seripa sa bonabao bana ba Makiri ka dilete tša bona.

₃₂Ke gona moo Moshe a ba agišitšego molaleng wa Moaba mošola wa Jorodane kua thoko ya bohlabela. ₃₃Ge e le ba leloko la Lefi Moshe ga a ka a ba nea kabelo. Ya bona kabelo ke Morena Modimo wa Isiraele, ka mo a ba boditšego ka gona.