JOELE 1

₁Lentšu la Morena la go tlela Joele morwa wa Phethuele. ₂Kwang, lena bagolo! Theetšang, lena baagi ba lefase lohle! Tše bjalo a di kile tša ba gona mehleng ya lena, le ge e le mehleng ya botataweno? ₃Le di anegeleng bana ba lena; bana ba lena ba di nee bana ba bona; bana ba bona ba di botše ditlogolo tše di sago tla. ₄Tša go šadišwa ke mogokong di lewa ke bojane; tša go šadišwa ke bojane di lewa ke tšie; tša go šadišwa ke tšie di lewa ke phatakalala. ₅Hee lena matagwa, phafogang le lle! Lena banwi ba sedila, gololang, le llele sebela sa go le goma molomong; ₆Gobane naga ya ka e šwahlelwa ke setšhaba se se maatla se se sa balwego, sa meno a ditau, sa mehlagare e kego ke ya tautshadi. ₇Se ladišitše tšhemo ya ka ya merara, se robaganya mego ya ka, sa e golla sa e uša fase, thabe tša šala e le mekhumi. ₈Llang wa mosetsana moaparamankgeretla mollelamongwagagwe a se ne ngwana. ₉Dibego tša dilewa le dinwewa ga di sa ya Ngwakong wa Morena; bomphamodimo ba nyamile le bahlanka ba Morena. ₁₀Go senyegile naga, mašemo a a lla, mabele a lobile, morara o pšhile, mehlware e ponne. ₁₁Balemi ba eme ba šegame, beng ba mašemo ba hlobogile ka baka la mabele le leotša, gobane puno ya mašemo e senyetše. ₁₂Merara e ponne, le mego e omile le merapa le melala le dihlare, le dihlare tšohle tša go lewa. Le dihlare tša lešoka di omile; bana ba batho ba tlogilwe ke lethabo. ₁₃Hee lena baperisita, tšwarang mankgeretla le lle. Lena bahlankelaaletare, gololang. Lena bahlanka ba Modimo wa ka, lalang le apere mankgeretla; gobane Ntlo ya Modimo wa lena e hlokišwa bego tša dilewa le dinwewa. ₁₄Goelelang, le re batho ba ikone, kgobelang phuthego, bothang bagolo le baagi bohle ba naga, le tle Ngwakong wa Morena Modimo wa lena, le tle le mo llele. ₁₅Joo, tšatši joo! Ka kgonthe tšatši la Morena le kgauswi; le tla bjalo ka tšhwallanyo ye e tšwago go Ramaatla. ₁₆Hleng dijo di fedišwa re di bona; mme thabo le tlhalalo di tlogile Ntlo ya Modimo wa rena. ₁₇Dipeu di ometše makokota; le matlolo a thubilwe; le dišego di senyeše; gobane mabele a ile. ₁₈Diruiwa di a felega, dikgomo di šitega ka mehlape, ka ge go se mafulo a tšona; le mehlatswana ya dihuswa e a hlaka. ₁₉Morena, ke llela wena, ka gobane mollo o fišitše naga ya mafula; kgabo e tšhumile mere yohle ya lešoka. ₂₀Le diphoofolo tša lešoka di llela wena; ka gobane dinokana tša meetse di gopile; mollo o feditše phulo mašokeng.