1Jobo a fetola a re: 2Ke therešo; ke tseba ge go le bjalo. Gomme motho a ka seka bjang ditaba le Modimo? 3Ge a ka tšea kgang le yena, a ka šitwa go fetola le e tee go ditaba tše sekete. 4Modimo ke wa pelo e bohlale, ke Mokgonamaatla; o kae e a phedilego a ngangane nae? 5Dithaba o a di šuthiša di sa tsebe; o di ribegetša a befetšwe. 6Lefase o a le šišinya la tloga madulo a lona, gwa tekateka mo le theilwego. 7Modibaletšatši go hlaba, Mophutheladinaledi, 8Mmapalerata a nnoši, Mogatamadutama a lewatle, 9Mmopi wa Dithutlwa le Thutlwana, le wa Magakgale, le wa Selemela, le wa diboka tša dinaledi tša borwa, 10Modiri wa tše kgolo di sa tsebišagalego, wa mehlolo e sa balegego! 11Šo, o sepela fa kgauswi ke sa mmone; o fetile ke sa mo lemoge. 12Šoo, o a amoga; mme o kae e a kago mo iletša, a kago mo rera a re: Naa o dira bjang? 13Modimo ga a gomiše bogale bja gagwe; le bahlabanelamotho ba sehlogo ba a mo lotšha. 14Bjale ke nna mang yo nkago mo fetola? Mantšu a go mo kgona nka a hlaola bjang? 15Le mola nka be ke se ne molato, nka se fetole; nka fo re: Mosekiši wa ka a a nkgaugele. 16Le ge nka mmitša, mme a araba, nna ga ke kgolwe gore a ka theeletša se ke se bolago. 17Yena wa go ka nthobaganya ka ledimo, a ka buša a nkgobatša ke se ne molato. 18A ka se mphe sebaka sa go buša moya; o tlo nkhoriša tše di galakago. 19Maatla a kgonang? -- Hleng yomaatla e le yena! Tsheko e kgonang? -- A a ka se re: Ke begwa ke mang? 20Ge nka re: Ke lokile, molomo wa ka o tlo mpega! Ge nka re: Ke thakgile, yena o tlo re: O a ketša! 21Nna ga ke ipone molato; ga ke sa itseba; ke nyatša phelo bja ka. 22Ke ka baka leo ke bolelago lentšu le le tee fela, ke re: Moloki le yo mobe, bohle ba senywa ke yena. 23Mohla kotlo e bolaya ka go hlaganela, ke yena ge a nyatša kgakanego ya ba se nago molato. 24Lefase le gafelwa diatleng tša ba babe, ke yena a širago mahlo a babuši. Ge e se yena, gona e ka ba mang? 25Matšatši a ka a fetile ka lebelo le šiago mokitimi; a tšhabile a sešo a bona tše di botse. 26A fetile boka magogodi a lehlakanoka, boka nong ge e kgoulogela se e se swarago. 27Ge nka re: A nke ke lebale dillo tša ka, ke phafoge, ke phuthologe, 28e ba gona ke tšhogago mahloko a ka ohle, ka go tseba gore o ka se ke wa ntesa ka tšwa ke se ne molato. 29Ge ke šetše ke thwe ke yo kgopo, ke sa reng ke itapiša ka lefela? 30Le ge nka hlapa ka meetse a leswela, ka ohla atla tša ka ka lešikahlaba, 31o tlo ntahlela lerageng, ka ba ka nyenywa ke dikobo tša ka. 32Gobane yena ga se motho moka nna ra fetolana, yo nkago išana le yena tshekong. 33Le gona ga go monamodi e a kago bea letsogo go yena le go nna. 34A a gomiše lepara lagwe la go mpetha, a lese go ntlaletša ka go šiiša ga gagwe; 35ke mo nkago bolela ke sa mmoife; gobane tše di lego mo go nna ga se tšeo.
