JOBO 7

₁Ruri, motho sa gagwe faseng ke go hlabana. Matšatši a gagwe a etša a mothwalwa. ₂O etša motlengwa modumamoriti; o etša molata mollasenewa. ₃Nna la ka lefa ke kgwedi tša lefela; ke mašego a tapišo a a mpeetšwego. ₄Ge ke lala ke re: Ke tlo tsoga neng? Bošego bo nkgolela ge ke hlobaela gwa ba gwa sa. ₅Nama ya ka e apere dibokwana le dikgogo tša lerole; tlalo la ka ga le fole ka go fela le phera. ₆Matšatši a ka a potlaka wa modiadiane; a feta a nkunne se ke bego ke se holofetše. ₇Eletša, bophelo bja ka bo ka moya fela; mahlo a ka a ka se hlwe a bona tše dibotse. ₈Ihlo la momponabjale le ka se hlwe le mpona. O tlo re o sa mpona, wa tlo hwetša ke se gona. ₉Boka leru, la široga, ya ba go ela ruri; moyabahung a ka se hlwe a boa. ₁₀Ga a sa boela lapeng; madulo a gagwe ga sa mo tseba. ₁₁Mme nna, molomo wa ka nka se o thibele; ge moya wa ka o tlaletšwe, ke tla bua; ke tla bola tše di nkgalakago mo pelong. ₁₂A ke nna lewatle? A ke nna Mamokebe, ge o mpeetše ba ba mpogelago? ₁₃Ge ke sa re, malao a ka a nkhutšiše, marobalo a ka a ntlhatlole tše bohloko. ₁₄E ba gona o ntšhošago ka diloro, o ntlaletša ka dipono; ₁₅pelo ya ka ya ba ya re: Kaone ke go ka tlingwa! Mašapo a ka a -- bokaone ke go kwa! ₁₆Ke tenegile; a nke ke se phele wa go se fele. Ntesetše; matšatši a ka ke lefela. ₁₇Motho ke wang ge o mo godiša, ge pelo yago e mo hlokomela? ₁₈Ke wang ge o fela o mo hlola e sa le bosasa, o sa kgaotše go mo leka? ₁₉O tlo lesa neng go ntšhetša, ka metša mare o ntesitše? ₂₀Ge ke sentše, wena Moletabatho ke go dirileng? O reng o ntira wa maelo, ka ba morwalo o nthobago? ₂₁O reng o sa ntebalele diphapogo? Le molato wa ka o reng o sa o fediše? Gobane bjale ke yo ithobalela leroleng mme o tlo nnyaka wa ntlhoka.