JOBO 37

₁Ke tšona di tšhošago pelo ya ka, e roromela e se madulong a yona. ₂A nke le kwišiše go gala ga lentšu la gagwe, modumo o tšwago molomong wa gagwe. ₃O o kwatša gohle tlase ga leratadima; mme legadima la gagwe le bonegela le magomo a dinaga. ₄Le latelwa ke go bopa ga modumo, o duma e le lentšu la borena bjagwe; ga a ba khukhunetše ge go gala lentšu lagwe. ₅Ge a dumiša ntšu la gagwe ke mohlolo, o dira tše dikgolo, tše re sa di tsebego. ₆O roma sefako sa gagwe a re: Naa faseng! Le tsheola, le modupi, le pula tša gagwe tše maatla. ₇Ke gona go hunyetša atla tša batho ka moka, gore batho bohle ba lemoge ditiro tšagwe. ₈Phoofolo tša tsena sekhung, tša dula mefomeng ya tšona, ₉ledimo la tla le etšwa ntlong ya lona, phefo ya borwa ya tla le maruru. ₁₀Mohemo wa Modimo o tšweletša tšhwane, meetse a elago a gatsela. ₁₁O rwadiša maru mafula, mme legadima la gagwe le tšholola maru. ₁₂Ona a ya a ralala a bušwa ke yena, a dira ka moka tše yena a a laetšego tšona mo go fela lefaseng. ₁₃Mo gongwe a ba kotlo; mo gongwe o setša lefase la gagwe; mo gongwe o re ba a seme tšhegofatšo. ₁₄Wena Jobo, theetša taba tše, o lemoge matete a Modimo. ₁₅A o tseba mokgwa wo Modimo a a laelago ka wona, ge a phadimiša magadima marung a gagwe? ₁₆A o tseba se se kukilego maru, mohlolo woo wa yena Maitseitse? ₁₇Wena o kwago diaparo go ruthela, ge lefase le ikhomoletše mohla wa phefo ya borwa, ₁₈a o mo thušitše mola a bapa lerata, la tia boka mphaphathi wa tshipi? ₁₉Re anegele se re kago mmotša sona; re šitwa go lakana, e sa le leswiswi. ₂₀Goba ge ke bua, a ka botšwa gwa thwe: Motho yola o re: A nke ke fedišwe? ₂₁Ge e le bjale seedi ga se bonwe, se ela kua godima maru; phefo e tlo feta ya a swiela. ₂₂Thoko ya leboa go rotoga kgadigadi; Modimo o ikagelela ka phadimo e tšhošago. ₂₃Yomaatlaohle re ka se mo fihlele; ke yo mogolo ka maatla le ka kahlolo; Moloki wa paala ga a hlaole motho. ₂₄Ge batho ba mmoifa, ke ka baka leo; o gerula bohle ba ba itshemago ba bohlale.