JOBO 35

₁Elihu a iša pele a re: ₂A o re go swanetše ge o re: Ke lokile, e a sa lokago ke Modimo? ₃Ge o re: Go loka go nthušang? Wa re: Ga go na bokaone bjo nkago bo bona ka go ila dibe. ₄Ke tla go fetola ka se ke se botšago wena le bagwera ba ba gago. ₅Llalela godimong o lebeleše, o bone maru godimo ga gago. ₆Ge o dira dibe, yena o mo dirang? Le ge o ka atiša dikarogo, o mo dirang? ₇Ge o loka, o mo fang? O tšwa le eng seatleng sa gago? ₈Dibe o di direla motho mokawena; go loka ga gago go hola ngwanamotho. ₉Batho ba hlaba mokgoši ge ba goletšwe ke ditlaitšego; ba lla ka baka la matsogo a ba maatla. ₁₀Go hlokwa e a rego: Modimo Mmopi wa ka o kae? Mola e le yena a neago batho koša tša bošego, ₁₁e a re rutago ra feta phoofolo tša lefase, a re fa bohlale ra feta dinonyana tša godimo. ₁₂Sebao, ba a goeletša mme ga a arabe, ka gobane ba ikgantšha ka bobe bja bona. ₁₃Ka kgonthe Modimo ga a kwe tša lefela; Yomaatlaohle ga di šetše. ₁₄Gagolo ge o re: Ga ke mmone, o tsebe gore taba e pele ga gagwe. Dula o mo letele. ₁₅Gomme bjale, ge bogale bja gagwe bo sešo bja otla, o se ke wa re dikarogo ga di tsebišiše. ₁₆Jobo yena o ahlame a bolela tša lefela, a atiša dipolelo a sa tsebe selo.