JOBO 27

₁Jobo a iša pele, a ntšha diema tša gagwe, a re: ₂Ka Modimo, e a ntahlilego kahlolong, ka Yomaatlaohle, monyamiša pelo ya ka! ₃Gobane ke sa buša moya; mme moya wa Modimo o mo dinkong tša ka. ₄Molomo wa ka o ka se ke wa bua maaka; le leleme la ka ga le na bomenetša. ₅Ke kgole le go le dumela; ke tlo hwa ke sešo ka re: Ke molato. ₆Ke nganga ke latola bosodi; ke tiišitše fao; ga ke ne tšatši leo pelo ya ka e kago le sola. ₇Motho mobe ke yo e lego naba la ka; e a ntsogetšego, a e be yena sesenyi. ₈Gobane mokgelogi o sa holofela eng, ge di kgaotša, Modimo ge a mo amoga moya? ₉A modimo o tlo mo kwa ge a goeletša mola tlalelo e mo tlela? ₁₀A a ka thabela Yomaatlakamoka? A a ka bitša Modimo ka mehla? ₁₁Tša seatla sa Modimo nna nka le ruta; nka se ke ka uta tša Yomaatlaohle. ₁₂Hleng le lena bohle le di bone! Bjale le reng le šilofala wa mašilo? ₁₃Kabelo ye yo mobe a tlogo e newa ke Modimo še. Ke bjona bohwa bjo bašoro ba tlogo bo fiwa ke Yomaatlaohle. ₁₄Ge bana ba bona ba ata, ba atela lerumo; ditlogolo tša bona ga di ke di khora bogobe. ₁₅Mašalela a bona a fihla ka dinkhu; mme ga a llelwe ke bahlologadi. ₁₆Le ge ba kgobela mahumo boka mabu, le ge dikobo di ka ba atela bjalo ka maudi, ₁₇di tlo ata, tša tlo aparwa ke moloki, mme mahumo a tlo abelwa wa sethakga. ₁₈O ikagetše ngwako boka tshwele, o etša mokutwana wa modiši. ₁₉O ya go robala a humile, mme a se boeletše; o phafoga mme a hwetša a se sa na selo. ₂₀Tše di tšhošago di mo wetše bjalo ka mafula; o thopilwe ke ledimo la bošego. ₂₁Phefo ya bohlabatšatši e mo kuka a tloga e mo ubutše mo a bego a agile. ₂₂Mohla a tlogo betšwa ke Modimo a sa setšwe, o tlo tšhaba seatla sa gagwe a se hlwe a ema. ₂₃Batho ba tlo šala ba opa magoswi, ba mo leletša molodi mo a bego a agile.