JOBO 13

₁Tšona tšeo mahlo a ka a di bone, mme tsebe tša ka di di kwile tša di hlaloganya. ₂Le nna ke di tseba boka lena; mme lena ga le mphete. ₃Ge e le nna, ke rato bua le Yomaatlaohle; ke llo sekišana le Modimo. ₄Ge e le lena, le babatamaaka, le dingaka tša lefela bohle. ₅Ge le ka be le homola, le ka be le thwe le na le bohlale. ₆A nke le theetše ke iphetolela, le kwišiše kgang ya molomo wa ka. ₇A le re le lwela Modimo ka go bua tše di sa lokago? A le mo hlatsela ka maaka? ₈A le re le ka mmeba sefahlogo? A le re Modimo a a namolelwe? ₉A le re go tlo letla mohla a sekiša lena? Goba le re a ka forwa boka motho ge a forwa? ₁₀Ba ba tlogo solwa wa go solwa ke bolena, gobane le hlaola ka bomenetša. ₁₁A le ka se gakanege le bona bogolo bja gagwe? Le tlo welwa ke go tšhoga yena. ₁₂Dikeletšo tša lena ke mereromeetšamorora; merako ya lena ke merako ya makoloboto. ₁₃Homolang, go bolele nna, le ge nka tlelwa ke se se ntlelago. ₁₄Nama ya ka ke e rwalelang ka meno? Ke reng ke swara phelo bja ka ka diatla? ₁₅A ka se lese go mpolaya; ga ke sa holofela. Fela, tsela tša ka tšona ke tlo di emela pele ga gagwe. ₁₆Le tšona tšeo di tlo ntwela, ka ge pele ga gagwe go sa batamele wa moikaketši. ₁₇Theetšang gabotse se ke se buago, mme tlhathollo ya ka e le tsene ditsebeng. ₁₈Se taba ya ka, nna ke e adile; ke tseba ge ke tlo tšwa ke lokile. ₁₉Ke mang a kago sekišana le nna; gobane ge bjalo nka homola, nka fo felela. ₂₀Fela, tše ke rego o se ntire tšona ke tše pedi; ke mo ke sa tlogo boba pela gago. ₂₁Ke re: Gomiša seatla sa gago sa go ntshwara, mme o lese go ntlaletša ka go ntšhoša. ₂₂O tsebo mpitša, ke kgone go araba; mme o ntese ke bolele, o fetole. ₂₃Melato ya ka le dibe tša ka naa ke tše kae? Mpotše dikarogo tša ka le dibe tša ka. ₂₄O reng o nkgerula? O reng o ntshema lenaba la gago? ₂₅A o hloya letlakala le le tlogago le phefo? A o hwarihla rite se se omilego? ₂₆Gobane nna o nkahloletše tše bohloko; o nthwadiša dibe tša ka tša mola ke sa le e mofsa. ₂₇Nao tša ka o di tlemelela mo phateng; o latiša tsela tša ka tšohle; nao tša ka o di beetše mellwane, ₂₈mola ke kumagana ka go bola, ke etša kobo ge e llwe ke tshwele.