JOHANE 2

₁Ka tšatši la boraro go be go na le monyanya wa lenyalo motsaneng wa Kana wa Galilea. Le mmago Jesu o be a le moo. ₂Jesu le yena a biletšwa monyanyeng, le barutiwa ba gagwe. ₃Gomme ge beine e hlaela, mmago Jesu a mmotša a re: Ga ba na beine.

₄Jesu a fetola a re: A ke tša ka le tša gago, wena Mosadi? Nna nako ya ka ga e ešo ya tla.

₅Mmagwe a botša bahlanka a re: Se a tlogo le botša le se dire.

₆Mme lapeng leo go be go beilwe dinkgo tše seletšego tša mabje, e le go ya ka mokgwa wa Bajuda wa go hlapa; nkgo e bjalo e be e tlala ka meetse a meeta e mebedi le ge e le e meraro. ₇Jesu a botša bahlanka a re: Tlatšang dinkgo tšeo meetse. Ba di tlatša ba gomiša ka melomo. ₈A ba laela a re: Bjalo gang le iše go makgetla. Bona ba iša. ₉Makgetla ge a lekile meetse ao a fetogilego beine, a sa tsebe mo e tšwago gona, go tseba bahlanka fela ba go ga meetse, a bitša monyadi. ₁₀A bolela le yena a re: Batho ka moka ba thoma go tliša beine e botse, e botšwa ba e tliše ge batho ba kgotšwe. Ge e le wena, beine e botse o e boloketše bjalo.

₁₁Mohlolo wo wa pele Jesu o o dirile motseng wa Kana wa Galilea, a bonagatša letago la gagwe; mme barutiwa ba gagwe ba mo dumela.

₁₂Ka moso Jesu a fologela motseng wa Kaperenaume a na le mmagwe le bana babo le barutiwa ba gagwe; ba dula gona matšatši a sego makae.

₁₃Paseka ya Bajuda e be e le kgauswi; mme Jesu a rotogela Jerusalema. ₁₄A hwetša Ntlongkgethwa go dutše babapatši ba dikgomo le ba dinku le ba maeba, le ba ba rekanyago ditšhelete. ₁₅Jesu a dira tshelane ka dithala, a ba raka Ntlongkgethwa ka moka ga bona, le dinku le dikgomo, a tšholla ditšhelete tša barekanyi ba tšona, a uša dithalana tša bona. ₁₆Babapatši ba maeba a ba laela a re: Tlošang dilo tše. Ngwako wa Tate le se ke la o dira borekelo. ₁₇Barutiwa ba gagwe ba elelwa ge go ngwadilwe gwa thwe: Ke llwe ke lehufa ka baka la Ngwako wa gago.

₁₈Bajuda ba tla ba mmotšiša ba re: Bohlatse bja go re o ka dira tše bjalo o ka re bontšha ka mohlolo ofe?

₁₉Jesu a fetola a re: Phušolang Ntlokgethwa ye, ke buše ke e tsoše ka matšatši a mararo.

₂₀Ke mo Bajuda ba itšego: Ntlokgethwa ye, ba feditše nywaga e masome a mane e metšo e selelago ba e aga, mme wena o re o tlo e tsoša ka matšatši a mararo?

₂₁Gomme Jesu o be a era Ntlokgethwa ya mmele wa gagwe. ₂₂Mehleng ya ge a tsogile bahung, ke mo barutiwa ba gagwe ba eletšwego taba ye a e boletšego ye, ba dumela mangwalo le lentšu le Jesu a le boletšego.

₂₃Mehleng yeo ya monyanya wa Paseka, a le motseng wa Jerusalema, ba bantši ba dumela leina la gagwe, ge ba bona mehlolo ye a bego a e dira. ₂₄Ge e le Jesu ga a ka a ikholofetša ka bona, ka gore a tseba bohle. ₂₅Gobane Jesu e be e se wa go lemoga motho ka go kwa bohlatse bja e mongwe, gobane a hlatha se se lego mothong.