JOHANE 16

₁Ditaba šedi tše ke le boditšego tšona, gore le se tlo kgopišwa. ₂Ba tlo le ntšha phuthegong; go tlo ba gwa tla lebaka la ge motho a le bolaya a tlogo re ke gona ge a direla Modimo. ₃Ke tše ba tlogo di dira ka gobane ba sa ka ba tseba Tate, le nna ba sa ntsebe. ₄Ge e le nna ke le boditše ditaba tše, gore mohla lebaka la tšona le tlago, le elelwe gore nna ke le boditše.

Ge go tloga mathomong ke sa ka ka le botša, ke ka gobane ke be ke sa na le lena. ₅Bjale ke ya go e a nthomilego; mme mo go lena ga go e a mpotšišago a re: O ya kae? ₆Fela bjale ge ke le boditše, dipelo tša lena di tletše manyami. ₇Gomme ke le botša therešo ge ke re: Go a le hola ge ke tloga. Gobane ge ke sa tloge, Molwedi a ka se tle go lena. Fela, ge ke ya, ke tlo mo roma a tla go lena. ₈Gomme yena e tlo re ge a tlile, a tlo lemoša lefase se e lego sebe, le toko le kahlolo. ₉O tlo le lemoša ge sebe e le go se ntumele. ₁₀O tlo le lemoša se e lego toko, gobane ke ya go Tate; le ka se hlwe le mpona. ₁₁O tlo le lemoša se e lego kahlolo; gobane mmuši wa lefase leno o ahlotšwe.

₁₂Ke sa na le tše ntši tša go le botša; fela ge e le bjale le ka se kgone go di rwala. ₁₃Mohla go tlile Moya wa therešo, o tlo le sepediša tsela ya therešomoka; gobane a ka se ke a bolela tša gagwe. O tlo bolela se a se kwilego, a tlo le tsebiša tše di tlogo tla. ₁₄Ke yena a tlogo mpha letago; gobane o tlo tšea go tše di lego go Nna, a tsebiša bolena. ₁₅Tšohle tše Tate a nago le tšona ke tša ka; ke ka baka leo ke itšego: o tlo tšea go tše di lego go nna, a le tsebiša.

₁₆Go šetše lebakanyana, le se sa tlo mpona. Gwa tlo buša go feta le bakanyana, la mpona. Gobane nna ke ya go Tate.

₁₇Mo go barutiwa ba gagwe ba bangwe ba botšišana ba re: O rang ge a re: Go šetše lebakanyana le se sa tlo mpona? Ge a re: Go tlo buša go feta labakanyana la mpona? Ge a re: Ke ya go Tate? ₁₈Ba re: O rang ge a re: Go sa šetše lebakanyana? Se a se bolelago ga re se tsebe.

₁₉Jesu a tseba gore ba rata go mmotšiša; a bolela le bona a re: Naa le nyakišana taba ye ke e boletšego ka re: Go šetše lebakanyana le se sa tlo mpona? ₂₀Ruri, ruri, ke a le botša, le tlo lla la golola; mme lefase le tlo thaba, le tlo nyamišwa; fela, manyami a lena a tlo fetoga thabo. ₂₁Mosadi ge a belega o ba le bohloko, ge lebaka la gagwe le tlile. E tlo re ge a belege ngwana, a se hlwe a gopola bohloko ka go thabela motho e a belegwego a tla lefaseng. ₂₂Lena bjale le na le manyami. Fela, ke tlo boela ke le bona, dipelo tša lena tša tlo thaba; gomme lethabo leo la lena le ka se le amogiwe ke motho.

₂₃Mme mohla woo le ka se mpotšiše selo. Ruri, ruri, ke a le botša, tšohle tše le tlogo di kgopela go Tate ka leina laka o tlo le fa. ₂₄Go fihla bjale le be le sešo la kgopela selo ka leina la ka. Kgopelang, gomme le tlo tšea, gore lethabo la lena e be le le tletšego.

₂₅Tše ke di boletšego, ke be ke le botša ka diswantšho. Fela, go tla lebaka, le nka se kego ka hlwa ke bolela le lena ka go swantšha, ka tlo le anegela tša Tate ka tlhathologanyo. ₂₆Mohla woo ke mo le tlogo kgopela ka leina la ka. Gomme ga ke re ke tlo le kgopelela go Tate. ₂₇Gobane Tate yena mong o a le rata, ka gobane le nthatile la dumela gore ke tšwa go Modimo. ₂₈Ke tšwile go Modimo ka tla lefaseng. Ke buša ke tloga lefaseng, mme ke ya go Tate.

₂₉Barutiwa ba gagwe ba re: Šedio ge, bjale o bolela ka tlhatlologanyo, ga o sa bolela ka go swantšha. ₃₀Bjale ke gona ge re tsebile gore o tseba tšohle; gomme ga go a swanela, ge motho a sa go botšiša. Rena ka tšona tše re dumetše ge o tšwa go Modimo.

₃₁Jesu a bolela a re: Bjale le a dumela. ₃₂Tsebang gore go tla lebaka, le bjale e šetše e le lona, leo le tlogo gašanywa, e mongwe le e mongwe a ya mo a yago; nna la tlo ntlogela ke nnoši. Fela, ga ke noši, gobane Tate o na le nna. ₃₃Ditaba tše ke le boditše, gore le be le molao ka nna. Mono lefaseng le tlo ba tlalelong. Fela, betang dipelo, gobane lefase le fentšwe ke nna.