JEREMIA 48

₁Leela Moaba.

Morena wa mašaba Modimo wa Isiraele o re: Joo Nebo! Go thubilwe. Kiryathaima go gobogile go thopilwe, go gobogile go tšhogile, motsekgororo. ₂Moeno wa Moaba ga o sa le gona. Ba go lakane Hesiboni ba re: Eriyeng, re ba fediše, e se hlwe e ba setšhaba. Le wena Mademena, o tlo fedišwa; lerumo le go šala nthago. ₃Kwang mokgoši Horonaima; ba a thubja; ke mašegerepe a magolo. ₄Moaba go pšhatlilwe; dikolomelo di kwagala kua Tsoare. ₅Joo, mokonya wa Luhite ke wa dillo, go rotoga dillo. Joo, motheogeng wa Horonaima ba kwa kgoa ya go thubja. ₆Tšhabang! Tšhabišang bophelo! Le yo etša sehlašana lešokeng. ₇Le wena o tlo thopša, ka gobane o botile tiro tšago le mahumo ago. Kamosi o tlo tloga a thopilwe le bomphamodimo bagwe, le bakgoma bagwe. ₈Go tla Maphušole, o tlela metse yagwe yohle, ga go o tlogo šala; meedi e tlo loba; melala e tlo senywa. Ke tše Morena a di boletšego. ₉Neang Moaba diphofa a fofe a tšhabe, gobane metse yagwe e a thoswa; go ka se be le ba dulago gona.

₁₀Go tlo lahlwa wa go dira tiro ya Morena ka go tšwafa; go tlo lahlwa wa go kuna rumo lagwe madi.

₁₁Moaba, e sa le mola a le ngwana, o dutše boka bjalwa bo na le meroko, bo sa hlotlwe bja tšhelwa pitšeng ye nngwe. Ga a ešo a ka a thopša. Ke gona o sa fela a swere mohlodi wa gagwe; mme monkgo wa gagwe ga o a fetoga.

₁₂Bjalo gee Morena o re: Tsebang, go tlo tla matšatši a ge ke tlo roma batšholodi ba go mo tšholla, ba go thenola dipitša tša gagwe, ba go phuma nkgo tša gagwe. ₁₃Mme Moaba o tlo lewa ke dihlong ka tša Kamosi; boka mola ba leloko la Isiraele ge ba lewa ke dihlong ka tša Bethele, ka tše ba bego ba di holofetše. ₁₄A le sa re le bagale? A le sa re le dioka tlhabanong? ₁₅Mothuba-Moaba o a rotoga, yena mothubametse ya gona; masoganamahlaolwa a gona, a phalaletše go yo hlabja. O realo yena Kgoši mong a ina la Morena wa mašaba. ₁₆Tšhwalalanyo ya Moaba e kgauswi, kotsi e mo tlela ka lebelobelo. ₁₇Mo lleleng, lena bohle ba go fana mellwane le yena, lena bohle le tsebago ina lagwe, le re: Joo, go robegile para le le tiilego, lehlotlo la botšhepi. ₁₈Hee ngwanenyana o dulago Diboni, fologa moo sereneng, o yo dula lenyoreng; o hula dibo tša gago. ₁₉Emang hleng ga tsela, lena ba motse wa Aroere, le lebelele le botšiše ba tšhabago, baphonyokgi, le re: Naa go hloma bjang? ₂₀Moaba o dihlonyeng, o thubilwe; llang le gololeng. Goelelang kua Arinoni le re: Moaba o thubilwe.

₂₁Ke kahlolo e tlelago naga ya molala, le Holoni, le Jaatsa, le Mephathe, ₂₂Diboni le Nebo, le Bethe-Dibilathaima, ₂₃Le Kiryathaima, le Bethe-Gamule, le Bethe-Meone, ₂₄Le Kiriothe, le Bosera, metse yohle ya Moaba ya kgole le kgauswi. ₂₅Lenaka la Moaba le a kgolwa, letsogo lagwe le a robja. O realo Morena.

₂₆Mo nošeng a tagwe, o ikgodišitše a lwa le Morena. Moaba a a wele mahlatšeng a gagwe, le yena e be wa go kwerwa. ₂₇A e be e se wena wa go sega Isiraele? A Isiraele o be a swerwe a na le mahodu mola o fela o mo kwera o re: Kgone!

₂₈Khudugang metseng lena ba ga Moaba, le yo dula maribeng, le etše leeba le age maweng a mefoma. ₂₉Re di kwele tša ge Moaba a ikgogomoša kudukudu, a bata letšeke, a ne makoko, a ipotile, e le wa pelo ya boikgodišo. ₃₀Morena o re: Nna mahlahlu a gagwe ke a a tseba; o itheta ka mafela, mme o dira tša lefela. ₃₁Bjale ke lla ka baka la Moaba, ke hlaba sello sa Moaba ka moka; batho ba Kiri-Herese ba hlokofaletšwe. ₃₂Wene morara wa Sebima, ke go llela ka fetiša ba llela Jasere; makala a gago a be a namile a sela lewatle, a goma ka lewatle la Jasere; bjale dikenyo tša gago di šwahletšwe ke mosenyi. ₃₃Mme mašemo a Moaba le naga ya gona, tša tlogwa ke tlhalalo. Ke feditše dibela bofotlelong; ba ka se hlwe ba fotla thara ka dikoša. Koša ya gona e ka se hlwe e eba koša.

₃₄Mokgoši o hlagile Hesiboni, wa yo fihla Eleale le Jahatse; o hlagile kua Tsoare wa yo fihla Horonaima, Egilathe Selisia; gobane le matšha a Nimirimi a tlogetšwe. ₃₅Moaba ke mo khutšišitše go namela mmoto le go fiša diorelo tša medimo yagwe.

₃₆Ke ka baka leo pelo ya ka e llelago Moaba boka naka; ke ka baka leo pelo ya ka e llelago batho ba Kiriherese boka naka, ka ge ba senyegetšwe ke leruo le ba bego ba humile ka lona. ₃₇Gobane hlogo tšohle di dututšwe, le maledu ohle a bootšwe, le matsogo ohle a arilwe; go aperwe mankgeretla mathekeng. ₃₈Dillo di kwala malapeng ka moka a Moaba, le mekgobeng ka moka; gobane Moaba ke mo pšhatlile wa sebjana se se lahlilwego. O realo Morena. ₃₉Joo, o phumegile! Gololang! Moaba o dula a fularetše batho ka dihlong. Moaba ke wa dikwero, ke setšhošo sa ba fanago mellwane nae.

₄₀Gobane Morena o itše: Soolee! O fofa bjalo ka lenong; o phurolla diphego godimo ga Moaba. ₄₁Metse e thopilwe; dibo di thubilwe; mohla woo pelo tša bagale ba Moaba di tlo etša tša basadi pelegong. ₄₂Moaba o a senywa; ga e hlwe e sa le setšhaba; ka gobane o ikgodišitše a lwa le Morena. ₄₃Tša ba gaMoaba ke motšhabo, le moreo, le molaba. O realo Morena. ₄₄Wa go tlo phonyokga motšhabong, o tlo gohlomela moreong; wa go tlo feta moreo, o tlo tanywa ke molaba. Ke tše ke tlogo tlela Moaba ka tšona ka ngwaga wa go mo otla. O realo Morena. ₄₅Bafaladi ba eme moriting kua Hesiboni, mme ba lapile, gobane mollo o tšwa Hesiboni, kgabo e hlaga gara motse wa Sihoni; e fiša dihlakore tša Moaba, le tlopo tša bana ba meferefere. (Num. 21:28). ₄₆Hee Moaba, o yo madimabe; go senyega tšhaba sa Kamosi; barwa ba gago ba thopilwe; banenyana bago ba išwa bothopša.

₄₇Fela, mathopša a Mošaba ke tlo a buša mabakeng a tlago. O realo Morena. Tša kahlolo ya Moaba di fela gona fa.