Setšhaba se tlo phološwa ke Mophološi
1Lentšu šele le le tletšego Jeremia le etšwa go Morena: 2Morena Modimo wa Isiraele o re: Mantšu ka moka a ke go botšago ona, a ngwale pukung. 3Gobane o tsebe go tlo tla matšatši, o realo Morena, a ke tlogo gomiša mathopša a setšhaba sa ka sa Isiraele le Juda ka ona, o realo Morena, ka ba bušetša mo nageng ye ke e neetšego botatabo, ya ba ya bona.
4Sea mantšu a Morena a a boletšego a era Isiraele le Juda: 5Ruri, Morena o itše: Re kwa mokgoši wo o šiišago; go tšhogilwe; ga go sa ne molao. 6Botšišang, le bone ge go ka ba le monna e a belegago. Go ya kang ge banna ke ba bona ba itshwere noka ka diatla, bjalo ka mosadi e a belegago, difahlogo ka moka di galogile? 7Joo, ke wona mohlamogolo, wo go sego mokawona; ke wona mohla wa mahlomola a Jakobo. Le go ona o tlo namolelwa.
8Se se tlogo dirwa mohla woo, o realo Morena, ke ge ke tlo roba joko ya mo molaleng wa gago, ka kgaola le ditlemo tšago; wa kgaotša go hlankela ba mathoko. 9Ba tlo hlankela Morena Modimo wa bona, le Dafida kgoši ya bona ya go tlo bewa ke nna ya ba buša. 10Ke gona, wene Jakobo, se boife; o mohlanka wa ka! O realo Morena. O se tšhoge, wene Isiraele! Gobane o phološwa ke nna o le moo kgole, le bana ba gago ba le mo nageng ye ba išitšwego mo go yona ge ba thopša. Mme Jakobo o tlo boa; o tlo khutša; o tlo rola pelo, go se e a mo tšhošago. 11Gobane ke nna ke nago le wena! O realo Morena, gore ke go phološe; ke fediše bantle bohle, ba ke go raketšego go bona. Mme wena nka se go fediše. Go otla ke go otla ka molao; nka se go lese wa tšwa o sa solwa.
12Gobane Morena o re: Kgobalo yago ga e fole; ntho ya gago e befile. 13O hloka mooki wa go go tlemelela; le kalafo le sehlare ga o natšo. 14Baratwa ba gago ba go lebetše; ga ba sa go nyaka, ka ge ke go otlile senaba, ke go sotše wa sehlogo, ka baka la bogolo bja makgopo ago, le boati bja dibe tša gago. 15O reng o bokolla wa re o gobetše, wa re ntho ya gago ga e fole? Ke tše ke go dirilego tšona ka baka la bogolo bja makgopo ago, le go ata ga dibe tša gago. 16Bjale gona, ba go go ja ba tlo lewa; ba go go hlakiša ba tlo thopša; ba go go hlakola ke tlo ba lesa ba hlakolwa, le ba ba go hutšego ba hulwa. 17Ke tlogo alafa ka go tlemelela, ka fodiša ntho tša gago; o realo Morena, gobane ba re o molelekwa, ba re Tsione ke mogerulwa.
18Morena o re: Tsebang! Mathopša a mekutwa ya Jakobo ke a a gomiša; ke kwela madulo a bona bohloko; motse o tlo buša o agiwa mo mmotong wa wona; mme nywako ya mošate e tlo dulwa wa mohlamonene. 19Mo go yona go tlo hlaga koša tša tebogo, le legoa la ba ba segago. Ke tlo ba atiša, ba se sa notlega; ke tlo ba godiša, ba se sa nyatšega. 20Bana ba bona ba tlo etša mola kgale; mme phuthego ya bona e tlo tia pele ga ka. Ba ba ba hlohlago ba tlo otlwa ke nna. 21Kgoši ya bona e tlo ba wa gabobona; mmuši wa bona o tlo tšwelela mo gare ga bona; ke tlo ba batametša ba mphihla kgauswi; ke mang a kago mpatamela ka go ipota? O realo Morena. 22Mme lena le tlo ba setšhaba sa ka, nna ka ba Modimo wa lena.
23Tsebang gee! Go tlo tsoga dimo la kgalefo ya Morena, sesesedi se sešoro sa go tlo tšubutla hlogo tša ba ba babe.
24Mollo wa bogale bja Morena ga o time a sešo a dira, a phetha mogopolo wa pelo ya gagwe. O tlo di lemoga ka mehla e tlago.
