Hanaya o ngangana le Jeremia
1Ka wona ngwaga woo, wa ge Tsedekia kgoši ya Juda a sa thoma go buša, ka kgwedi ya bohlano ya ngwaga wa bone, go tšweletše Hananya morwa wa Atsuri moporofeta wa Gibeoni, a bolela le nna re le Ngwakong wa Morena, baperisita le batho bohle ba re bona, a re: 2Morena wa mašaba Modimo wa Isiraele o re: Joko ya kgoši ya Babele ke a e roba. 3Thoto ka moka ya Ngwako wa Morena, ye Nebukadinetsara kgoši ya Babele a e tšerego felo fa a e iša Babele, ke tlo e bušetša felo fa go sešo gwa feta nywaga e mebedi. 4Le Jekonya morwa wa Joyakima kgoši ya Juda, le mathopša ohle a Bajuda a a išitšwego kua Babele, ke tlo a bušetša felo fa; gobane joko ya kgoši ya Babele ke a e roba. O realo Morena.
5Ke mo moporofeta Jeremia a boletšego le Hananya moporofeta pele ga baperisita le setšhaba ka moka se se bego se le Ngwakong wa Morena. 6Moporofeta Jeremia a re: A go be bjalo! A Morena a dire tšona tšeo, a tšweletše se o se boletšego wa re: Thoto ya Ngwako wa Morena e tlo bušetšwa felo fa, le ba ba thopilwego ba išwa Babele. 7Fela, theetša se nna ke se bolelago ditsebeng tša gago le ditsebeng tša setšhaba ka moka. 8Baporofeta ba kgale, ba mehla yela o sešo wa ba gona, le nna ke sešo ka ba gona, ba porofetile tša ntwa le tša mabošula le tša dinkhu, ba era dinaga tše ntši le mebušo e megolo. 9Moprofeta e a porofetago tša molao, ge e le moporofeta wa makgonthe e a romilwego ke Morena, o tlo tsebagala ge go tšwelela tše a di boletšego.
10Ke ge moporofeta Hananya a tšea joko e bego e le molaleng wa moporofeta Jeremia, a e robaka, 11A bolela, setšhaba ka moka se lebeletše, a re: Morena o re: Joko ya Nebukadinetsara kgoši ya Babele ke tlo e roba ka wona mokgwa wo ya tšwa melaleng ya ditšhaba ka moka, go sešo gwa feta nywaga e mebedi. -- Moporofeta Jeremia a tloga, a ikela mo a yago.
12Tšona tše, tša ge moporofeta Hananya a tšea joko molaleng wa moporofeta Jeremia a e robaka, di latetšwe ke lentšu la Morena, le le tletšego Jeremia la re: 13Yaa o botše Hananya o re: Morena o re: O robile joko tša phata; bakeng sa tšona wa dira tša tshipi. 14Gobane Morena wa mašaba Modimo wa Isiraele o re: Molaleng wa ditšhaba tšeo ka moka ke bea joko ya tshipi, gore di hlankele Nebukadinetsara kgoši ya Babele. Ba tlo mo hlankela; le diphoofolo tša naga ke mo neetše tšona.
15Moporofeta Jeremia a bolela le moporofeta Hananya a re: Theetša gee, wene Hananya! Ga wa rongwa ke Morena; mme o ruta tšhaba se go holofela maaka. 16Molato ke wona woo ge bjale Morena a re: Tseba, o tlo rakwa ke nna mo lefaseng; o tlo hwa e sa le lenyaga, gobane o boletše tša go hlanogela Morena.
17Mme moporofeta Hananya a hwa ka wona ngwaga woo ka kgwedi ya go šupa.
