Komelelo le tlala le lerumo di tlo tla
1Šele lentšu la Morena le le tletšego Jeremia ka baka la komelelo. 2Juda o a lla, ba dikgorong tša gona ba inametše fase ba fifetšwe; dillo tša Jerusalema di a hlatloga. 3Bakgoma ba gona ba roma balata ba bona go yo ga meetse; ba ya didibeng ba hwetša di gopile; ba boa le meeta e le fela; ba boa le dihlong ba bipile difahlogo ba nyamile. 4Molato ke naga ge e palegile manga, go se pula mo nageng. Balemi ba nyamile ba bipile difahlgo. 5Joo le phala e tswaletše kua nageng, ya tlogela diphalana ka ge go se bjang. 6Le dipitsi tša lešoka di eme mebotong di kgalegile; di fegelwa bjalo ka phukubje, di gohlometše mahlo ka ge go se botala. 7Morena, le ge makgopo a re bega, o ko dire tše di amanago le leina lago, gobane dikarogo tša rena ke tše dintši, mme re go senyeditše. 8Wene Mohlologelwa wa Isiraele, Monamoledi wagwe wa mehleng ya ditlalelo! O reng o itira moeng nageng, moeti molalaafeta. 9O reng o itira monna e a tšhogilego, o etša mogale e a sa kgonego go phološa? Mola o le makgatheng a rena, Morena, re bitšwa ka ina la gago; hle se re tlogele.
10Morena o boletše tšhaba se, a re ba ratile tšona tšeo; ba tia le naga ba sa dule fase; mme Morena ga ba mo kgahle; bjale o gopola molato wa bona, o lata dibe tša bona.
11Mme Morena a bolela le nna a re: Se rapelele tšhaba se wa re a se tlelwe ke tše botse. 12Le ge ba ka ikona dijo, nka se ke ka ba kwa ge ba goeletša; le ge ba ka tliša didimo le dibego, nka se ke ka ba thabela. Ke tlo ba fetša ka lerumo le ka tlala le ka dinkhu.
13Nna ka re: Morena Mong wa ka; hleng baporofeta ba ba boditše ba re: Le ka se bone lerumo; le tlala e ka se ke ya le wela, gobane felo fa ke tlo bea khutšo ya ruri.
14Morena a fetola a re: Baporofeta bao ba porofeta maaka ka leina la ka; ga ba rongwa ke nna; ga ka ba laela selo; ga ke bolele nabo. Ba le porofetela dipono tša maaka, le bonoge; ke dilo tša lefela, le maano a dipelo tša bona. 15Ke gona Morena o re: Bona bao ba go porofeta ka leina la ka ba sa ka ba rongwa ke nna, ba re naga ye e ka se ke ya tlelwa ke lerumo le tlala, ke bona ba tlogo fetšwa ke yona tlala le lerumo. 16Mme setšhaba se, se porofetelwago ke bona bao, se tlo rapalatšwa mekgobeng ya Jerusalema ke tlala le lerumo, gwa tlo hlokwa wa go ba epela. E tlo ba bona le basadi ba bona, le barwa ba bona, le barwedi ba bona; ke tlo tšhollela bobe bja bona godimo ga bona.
17Ba botše lentšu le, o re: Mahlo aka a ela megokgo bošego le mosegare a sa kgaotše, ka gobane ngwanana wa setšhaba sešo o gobetše gabohlokohloko. 18Ka tšwela mašemong, ke hwetša ba bolailwego; ge ke tla mo motseng, ke bona ba felago ka tlala. Mme baporofeta le baperisita ba falalela kua nageng ye ba sa e tsebego.
19A o napile o lahletše Juda ruri! Tsione a go bile go go tenne? O reng o re otla wa go se fole? Re hlologetšwe khutšo, mme go se tle tše botse; re lebeletše go fodišwa, mme go rotoga tše di šiišago. 20Morena, masenyi a rena re a a tseba, le makgopo a botatwešo; re go sentše ruri. 21Se re lahle hle, o tsebe leina la gago, o se nyatšiše sedulo sa gago sa letago; kgwerano ya gago le rena, o se e lebale wa e senya. 22A go ka ba le Monešapula mo go mafelo ao a bantle? A medupe e ka rongwa ke leratadima? A ga se wene Morena Modimo wa rena? Mme rena re botile wene.
