BAAHLODI 20

₁Gomme Baisiraele ba tšwa ka moka go tloga ka Dani go goma ka Beresaba, le ba nageng ya Gileada, ba kgobela phuthego pele ga Morena e le batee, ba tla motseng wa Mitsipa. ₂Gwa tsoga ba bagolo ba setšhaba ka moka, ba meloko ya Isiraele ka moka, ba tla pitšong ya setšhaba sa Modimo, e le banna ba dikete tše makgolo a mane ba ba tiilego, ba bahlabani.

₃Babenyamini ba kwa go thwe: Baisiraele ba rotogetše Mitsipa. Bjale Baisiraele ba re: Re botšeng se se re hloletšego bobe bjo. ₄Monna ela wa Molefi, mogatša wa mosadi ela e a bolailwego, a ba anegela ditaba a re: Nkile ka tla Gibea kua nageng ya Benyamini ke na le mosadi wa ka wa serethe, ka lala ntshe. ₅Bošego beng ba motse wa Gibea ba ntsogela, ba dikanetša ngwako ka baka la ka, ba re ba mpolaye. Gomme mosadi wa ka wa serethe ba mo katile a ba a hwa. ₆Ke moka ka tšea mosadi eo wa ka ka pomaganya diripa, ka di romela dileteng ka moka tša naga ya Isiraele, ka gobane ba dirile modiro wa makgapha wa bošilo mo go Isiraele. ₇Bjale ge le kgobokane bohle Baisiraele, sekang taba ye le kwane.

₈Ke mo batho ka moka ba nago ba tsoga e le batee ka la go re: Go se ke gwa ba le e a boelago gae le e a kago ya ga gabo. ₉Bjale taba še, ye re yago go e dira motse wa Gibea; re dira ka matengwatengwa. ₁₀Mo melokong ka moka ya Isiraele re ntšhe banna ba lesome go ba lekgolo, e be ba lekgolo go ba sekete, le ba sekete go dikete tše lesome, ba yo tšea mefago ya setšhaba. Mohla ba boago, gona motse wa Gibea wa ga Benyamini re tlo o lefetša bošilo bjoo o bo dirilego go Isiraele. ₁₁Gomme banna ka moka ba phuthegela motse woo ba kwane e le setlemo setee.

₁₂Meloko ya Isiraele ya roma batseta ba ya dileteng tšohle tša Benyamini ba re: Ke bobe bjo bo bjang bjo bo dirilwego go lena? ₁₃Bjale ntšhang banna bao ba dihlola ba Gibea, re ba bolaye, re fediše bobe mo go Isiraele. Fela Babenyamini ba bana go dira se se boletšwego ke bana babo bona ba Isiraele. ₁₄Bona Babenyamini ba rapa, ba tšwa metseng ba tla Gibea, e le gore ba tšwele Baisiraele dira. ₁₅Mohla woo ba etšwa metseng gwa balwa dikete tše masome a mabedi le metšo e selelago tša banna ba ga Benyamini, banna ba bahlabani, go sa balwe ba motse wa Gibea. Bona e be e le banna ba makgolo a šupago, banna ba ba tiilego. ₁₆Mo go batho bao ka moka go be go na le banna ba makgolo a šupago ba ba tiilego ba mampogošo, ba go betša ka diragamabje ba sa foše le bosesanyane bja moriri. ₁₇Baisiraele ka ntle ga Babenyamini ba balwa e le ba dikete tše makgolo a mane tša banna ba marumo, ka moka e le banna ba bahlabani.

₁₈Bona ba tšwa ba rotogela Bethele, ba botšiša Modimo ba re: Ke mang mo go rena e a tlo thoma ntwa le Babenyamini?

Morena a re: A go thome Juda.

₁₉Ka la ka moswana Baisiraele ba tšwa, ba yo bokana ba batametše motse wa Gibea. ₂₀Baisiraele ba hlahlamologa ba re ba hlabane le Babenyamini, ba itlhopha ka dikgao ba leba motse wa Gibea. ₂₁Babenyamini ba hlaga ba etšwa motseng wa Gibea, ba bolaya banna ba Baisiraele ba dikete tše masome a mabedi le metšo e mebedi; ba ba senyetša fase mohla woo. ₂₂Baisiraele ba itiiša ba boela ba itlhopha ka dikgao felo moo e bego e lailwe ka la maabane. ₂₃Ke ge ba bangwe ba bona ba rotogetše go llela Morena la ba la dikela; ba botšiša Morena ba re: A re iše pele go hlabana le bana babo rena ba Benyamini?

Morena a re: Ba tšweleng dira.

₂₄Ka la ka moso Baisiraele ba tšwela Babenyamini dira. ₂₅Le ka lona letšatši leo Babenyamini ba gahlana nabo ba etšwa Gibea, ba buša ba bolaya ba dikete tše lesome le metšo e seswai ba bahlabani ba Baisiraele, ba ba senyetša fase. ₂₆Ke mo Baisiraele ba rotogilego ka setšhaba ba tla Bethele, ba hlwa ba llela Morena, ba ikona dijo letšatši ka moka, la ba la dikela; ba tliša dihlabelo le dibego pele ga Morena. ₂₇Ba botšiša Morena, ka gobane polokelo ya kgwerano ya Modimo e be e le gona moo lebakeng leo; ₂₈Gomme Modimo o be a hlankelwa ke Pinehase ngwana wa Eleasara morwa wa Arone mehleng yeo. Ba botšiša ba re: A re ka boela re tšwela Babenyamini dira ra hlabana le bona? Goba re ka lesa?

Morena a re: Rotogang, ka gobane ka moswana ke tlo ba gafela diatleng tše lena.

₂₉Bjale Baisiraele ba teta motse wa Gibea ka banna ba ba beilwego sekhung. ₃₀Bjale Baisiraele ge ba etla la boraro go hlabana le Babenyamini, ba hlahlamologa ka mokgwa wola wa maloba ba lebile motse wa Gibea. ₃₁Babenyamini ba tšwa ba hlabana le madira ao, ba tlogelanywa le motse; ba bolaya ba bangwe ba setšhaba bjalo ka maloba ka mo mmileng o rotogelago Bethele, le mo mmileng o tšwago ka mašemong o iša Gibea; ba bolaya ba e ka bago ba masome a mararo. ₃₂Bjale Babenyamini ba re re ba fentše bjalo ka maloba; anthe Baisiraele ba be ba kwane gore ba tlo tšhaba ba ba tlogelanya le motse ba tšwela mebileng. ₃₃Banna ka moka ba Baisiraele ba tloga mo ba bego ba eme, ba yo ema kua Baali-Thamara; ya ba gona go šwahlago Baisiraele bala ba sekhung, ba tšhologa ba etšwa ka sefateng sa Geba. ₃₄Banna ba bagale ba dikete tše lesome ba ba bego ba hlaotšwe go Baisiraele ka moka, ba fihla ba lebile motse wa Gibea. Gomme tlhabano ya ba e thata; mme Babenyamini ba be ba sa tsebe ge e le go welwa ke kotsi. ₃₅Mohla woo Morena a lahla Babenyamini, ba fenywa ke Baisiraele. Baisiraele ba bolaya Babenyamini ba dikete tše masome a mabedi le metšo e mehlano, ba bahlabani ka moka ga bona. ₃₆Babenyamini ba be ba re re fentše, ka gobane Baisiraele ba boela morago e le ka ge ba holofetše bala ba sekhung ba ba bego ba laletše motse wa Gibea.

₃₇Bona bao ba hula motse wa Gibea, ba o fediša ka moka ka bogale bja marumo. ₃₈Gomme banna ba Isiraele ba be ba kwane le ba sekhu gore ge muši wa motse o tupa, e be gona ba ba tšhologelago ka bontši. ₃₉Gwa ba bjalo; ge banna ba Isiraele ba tšhaba mola Babenyamini ba šetše ba thomile go ba bolaya, ba bile ba hlabile banna ba masome a mararo, ba re re fentše bjalo ka maloba. ₄₀Ke ge muši motseng o thoma go tupa. Babenyamini ge ba retologa ba tšhoga ge ba bona mokubego wa mollo wa motse ka moka. ₄₁Ya ba gona go phekgogago Baisiraele. Banna ba Babenyamini ba welwa ke kgakanego ge ba lemoga gobane ba wetšwe ke kotsi. ₄₂Ba tšhaba ba hlomerwe ke banna ba Isiraele ba tšea ka tsela e lebago lešokeng; marumo a ba kwatiša, le ba ba bego ba rapilwe metseng e mengwe ba bolaelwa gona moo le bona. ₄₃Babenyamini ba dikwa, ba rakedišwa, ba lelekwa ge ba re re a khutša, ba gatakelwa ba fularetše motse wa Gibea ba lebile bohlabela. ₄₄Gwa bolawa banna ba dikete tše lesome le metšo e seswai ba Babenyamini; ka moka e be e le banna ba bagale. ₄₅Ba bangwe ba phekgoga ba tšhabela šokeng, lentsweng la Rimoni; mo tseleng gwa šala go fofotšwa matopa a bona a dikete tše tlhano. Ba hlomarwa go fihla Gideoma, gwa bolawa banna ba dikete tše pedi. ₄₆Ba ba bolailwego mohla woo e be e le ba dikete tše masome a mabedi a metšo e mehlano ba Babenyamini; ka moka ga bona e be e le banna ba bagale.

₄₇Kua lentsweng la Rimoni lešokeng go be go tšhabetše banna ba makgolo a selelago; ba fetša kgwedi tše nne ba le mo lentsweng la Rimoni. ₄₈Banna ba Isiraele ba be ba gomile ba tšama ba fediša mašaledi ka bogale bja marumo, le dikgomo le tšohle tše ba di hweditšego. Metse ka moka ye ba e hweditšego ba e tšhumile ka mollo.