Bobe bja ba Gibea ba gaBenyamini
1Mehleng yeo ge go se kgoši mo go Isiraele, go be go le monna wa Molefi, e a bego a diiletše kua morago dithabeng tša Efuraimi; yena o be a tšere mosadi wa serethe wa Betlehema nageng ya Juda. 2Mosadi eo a otswa, a tšhaba, a boela lapeng la gabo kua Betlehema nageng ya Juda; gwa fela dikgwedi tše nne a dutše ntshe. 3Monna wa gagwe a ba a tsoga a mo latela, gore a bolele nae ka botho a mo gomiše; a ya a na le mohlankana wa gagwe le dipokolo tše pedi. Mosadi a mo iša lapeng la tatagwe; mme tatago mosadi a mmona a thaba. 4Gomme mogwegadi e wa gagwe, tatago mosadi, a mo phegelela, a dula, gwa fela matšatši a mararo ba eja ba enwa, ba robala moo. 5Ka tšatši la bone ba tsoga e sa le bošego gore ba wele tsela; fela, tatago mosadi a bolela le mokgonyane wa gagwe a re: Thoma go fihlola, le tsebo sepela le ngwathile bogobe.
6Ba dula, ba ja ba nwa ka babedi; tatago mosadi a botša monna eo a re: A nke o se gane go lala fa le bošego bjo, mme iketle.
7Gomme monna eo ge a re ke wela tsela, mogwegadi a mo phegelela a re a dule, a lale gona.
8Ka la bohlano a tsoga e sa le bošego a re ke a sepela a na le mosadi le mohlankana wa gagwe. Mogwegadi a boela a re: A nke o thome go fihlola. Gomme ba diega la ba la rapama ba eja ka babedi.
9Monna eo ge a re ke wela tsela a na le mosadi le mohlankana wa gagwe, mogwegadi a mo rera a re: O ko bone, letšatši le a dikela, e bile ke mantšibaa. Lalang mo; šele, le a rapama; iketle hle; le tlo tsoga le wela tsela la boela gae.
10Fela, monna eo a gana go lala ntshe, a wela tsela, a sepela a na le dipokolo tše pedi tša gagwe di belešitšwe, le mosadi wa gagwe, a tla mo go lebanego le Jebusi, e lego Jerusalema. 11Ge ba feta ka gona moo Jebusi, mme letšatši le šetše le dikela, mohlankana a rera mong wa gagwe a re: A nke re fapogele ka fa motseng wa ba Jebusi, re lale ntshe.
12Mong wa gagwe a fetola a re: Re ka se ke ra fapogela motseng wa batho ba šele e sego Baisiraele; a re feteleng pele re yo fihla Gibea. 13A buša a rera mohlanka wa gagwe a re: Tlaa, re yo fihla motseng o mongwe re yo lala Gibea goba Rama. 14Ba feta, ba sepela, ba dikelelwa ge ba etla Gibea motseng wa Babenyamini. 15Ba fapogela gona gore ba yo lala gona moo Gibea; ba tsena ba dula lepatlelong la motse; gomme gwa hlokwa motho wa go ba iša lapeng la gagwe gore ba robale.
16Gwa ba gwa tla monna wa mokgalabje a etšwa mašemong medirong ya gagwe e le bošego. E be e le monna wa dithabeng tša Efuraimi, e a bego a diiletše gona moo Gibea; ge e le banna ba motse, bona e be e le Babenyamini. 17Ya re mokgalabje a gadia a bona monna eo wa moeti e le mo lepatlelong la motse, a mmotšiša a re: O ya kae? O tšwa kae?
18Yena a re: Rena re tseleng; re tšwa kua Bethlehema nageng ya Juda; re boela gagešo kua morago ga dithaba tša Efuraimi. Ke be ke ile Bethlehema nageng ya Juda; mme bjale ke ya Ngwakong wa Morena; gomme ga go motho e a nkišago lapeng la gagwe. 19Ge e le dijo tša dipokolo tša rena re na natšo, le mefago ya go ja le go nwa. Rena balata ba gago, e lego nna le mosadi yo le lesogana le, ga re hloke selo le se senyane.
20Mokgalabje a re: Bea pelo! Lesa dipabalelo tšeo e be modiro wa ka; gomme o se ke wa lala fa mokgobeng. 21A ba iša lapeng la gagwe; a tšhelela dipokolo dijo; a ba hlapiša maoto, ba kgona go ja le go nwa.
22Ba re ba sa dutše dipelo tša bona di thabile, gwa tla banna ba motse woo, banna ba dihlola, ba dikanetša ngwako, ba itia lemati; mme mokgalabje mong wa lapa ba mo rera ba re: Ntšha monna eo a gorogetšego lapeng la gago, re mo tsebe.
23Mong wa lapa a tšwela go bona a re: Aowa Bagešo! A nke le se ke la dira bobe. Monna e ge a šetše a gorogetše lapeng la ka, le ka se ke la mo dira tša bošilo tšeo. 24Tsebang gore morwedi wa ka wa kgarebe, le mosadi wa gagwe wa serethe, nka le ntšhetša bona, la ba kata la ba dira ka mo le ratago; fela, monna e le ka se ke la mo dira tša bošilo tšeo. 25Banna bao ba gano mo kwa monna yela a ba a tšea mosadi wa gagwe wa serethe, a mo ntšhetša go bona, gomme ba mo tseba, ba itapiša go mo senya bošego ka moka, gwa ba gwa sa. Ge mahuba a hlatloga ya ba gona ba mo lesetšago.
26Ge go esa mosadi eo a tla a phuhlama mojako wa ngwako wa monna eo mong wa gagwe a gorogetšego go wona, a rapalala ntshe, letšatši la ba la hlaba. 27Bjale ge mong wa gagwe a tsogile gosasa, a bula mojako a re ke tšwe ke wele tsela, a hwetša mosadi wa gagwe wa serethe a rapaletše mojako, diatla tša gagwe di le serepoding. 28A mo rera a re: Tsoga re sepele! Gwa hlokwa phetolo. A mo rwala a mmeleša pokolo, a wela tsela, a tla ga gabo. 29A re go fihla a tšea thipa a pomaganya mosadi eo wa gagwe a eya ka ditho, a dira diripa tše lesome le metšo e mebedi, a di romela dileteng ka moka tša Isiraele. 30Gomme mang le mang a re go di bona a re: Tše bjalo ga di ešo tša ka tša dirwa tša bonwa, e sa le mola Baisiraele ba rotoga ba etšwa Egipita go fihla lehono. Akanyang taba ye, le bolele.
