Simisone o hlakiša Bafilisita
1Ka mohla o mongwe wa ge go bunwa mabele, Simisone a gapa putšana a tla go bona mosadi wa gagwe. Ge a re ke tsena ka ngwakong wa mosadi, a thibelwa ke tatago mosadi.
2A re: Ke be ke re o mo nyaditše, ka mo neela lekgetle la gago. A ga ke re monnagwe o mo phala ka botse; a yena e be wa gago bakeng sa yola.
3Simisone a re: Bjale gona Bafilisita ba se ke ba re, ntwa e thomilwe ke nna, ge ke ba dira bošula. 4A ya a swara diphukubje tše makgolo a mararo, a tšea diša, a tlemaganya mosela le mosela, a hlomela seša gare ga mesela, 5A tšhuma, diša tšeo a lesa diphukubje tša yo tšhuma mabele a sa lego hlakeng le a diboeng; gwa swa le dirapa tša merara le mehlware. 6Bafilisita ba re: Di dirwa ke mang? Ba re: Ke Simisone mokgonyana wa ba kwa Thimina, ka gobane ba mo amogile mosadi ba mo tšeiša lekgetle la gagwe. Ka gona Bafilisita ba rotoga ba tšhuma mosadi le tatagwe ka mollo.
7Simisone bjale a re: Ge le dirile ka mokgwa wo, gona nka se ke ka lesa ke sešo ka itefeletša. 8A ba robaganya dikgopo le dikgwele, ya ba polao e kgolo; a tsebo fologa a yo dula leweng la Ethama.
9Ke mo Bafilisita ba rotogilego ba hloma mešaša nageng ya Juda, ba bokana Lehi. 10Banna ba Juda ba re: Molato ke eng ge le rotogetše mono ga gešo?
Bona ba re: Re rotogetše go tlema Simisone, gore re mo dire se a re dirilego sona. 11Banna ba Juda ba dikete tše tharo ba fologela leweng la lentswe la Ethama, ba bolela le Simisone ba re: A ga o tsebe gobane re bušwa ke Bafilista? Ke dilo mang tše o re direlago tšona?
Yena a re: Ke ba dirile se ba ntirilego sona.
12Bona ba re: Re tlile go go tlema, gore re go gafele diatleng tša Bafilisita.
Simisone a re: Gona nkeneleng gore le ka se ke la mpolaya e le lena.
13Bona ba re: Aowaa; re fo rata go go tlema, re go gafele diatleng tša bona; go go bolaya, aowa, re ka se ke ra go bolaya. Ba mo tlema ka thapo tše pedi tše mpsha, ba tšwa leweng ba na nae.
14Ge ba fihla Lehi, Bafilisita ba tšhela legoa, ba mo gahlanetša. Ya ba gona a tlelwago ke moya wa Morena; manti a mo matsogong a gagwe a ba bjalo ka hlale tša leokodi ge di hlabotšwe ke mollo; ditlemo tša gagwe tša kumagana matsogong a gagwe. 15A bona lešapo le leswa la mohlagare wa pokolo, a le topa, a bolaya banna ba sekete ka lona. 16A reta a re: Ka šapo la pokolo ke šapile lešaba; ka šapo la pokolo ke bolaile sekete sa banna. 17A realo a lahla lešapo la mohlagare le a bego a le swere, mme a rea felo fao leina, a re Ramathe-Lehi. 18O be a swerwe ke lenyora gagolo, a rapela Morena a re: Ke wena o dirilego phološo e kgolo ye ka seatla sa mohlanka wa gago; mme bjale ke hwa ka lenyora; ke wela diatleng tša mašoboro a. 19Fela Morena o be a fatotše sekgese sa gona moo Lehi; se etšwa meetse; a nwa, mme moya wa gagwe wa boela go yena, a lapologa. Felo fao a go rea leina, a re ke “Sediba sa Morereledi”; le bjale se sa le gona moo Lehi.
20O feditše nywaga e masome a mabedi a ahlolela Isiraele mehla yeo ya Bafilisita.
