BAAHLODI 12

₁Gomme banna ba Efuraimi ba rapša, ba tšwa ba leba thoko ya leboa, ba tla ba rera Jefeta ba re: Ke ka baka lang ge o sa ka wa re bitša mola o tswela go hlabana le Baamoni gore re tšwe nago? Re tlo go tšhumelela ngwakong.

₂Jefeta a fetola a re: Nna le setšhaba sa gešo re be re na le tšhitang e kgolo le Baamoni; ka le hlabela mokgoši, la gana go re namolela diatleng tša bona, ₃Ya re ge go lena ke hlokile monamoledi, nna ka lahla bophelo bja ka, ka tšwa ka lwa le Baamoni; mme Morena a ba gafela diatleng tša ka. Bjale le reng le ntšwela dira? ₄Gomme Jefeta a rapa banna ka moka ba Gileada, ba hlabana le Baefuraimi. Gomme banna ba Gileada ba bolaya Baefuraimi ba re: Le batšhabi ba ga Efuraimi! La Gileada le ka gare ga la Baefuraimi le la Bamanase. ₅Gomme Bagileada ba be ba thibile madibogo a noka ya Jorodane, ba a amoga Baefuraimi. Ya re ge go fihla mophonyokgi wa ga Efuraimi a re ke a sela, banna ba ga Gileada ba mmotšiše ba re: A o wa ga Efuraimi, mme ge a re: Aowa, ₆Ba tsebo re: Anke o re “šibolethe”. Ge a šitwa go bolela gabotse, a re “sibolethe”, gona ba mo swara ba mmolaya gona moo madibogong a Jorodane. Mehleng yeo go bolailwe Baefuraimi ba dikete tše masome a mane le metšo e mebedi.

₇Jefeta o feditše nywaga e selelago a ahlolela Isiraele. Gomme Jefeta monna wa Gileada a hwa, o bolokwa lebitleng mo motseng o mongwe wa metse ya Gileada.

₈Ge a šetše a ile, Baisiraele ba ahlolelwa ke Epsane wa Betlehema. ₉Yena o be a na le barwa ba masome a mararo, le barwedi ba masome a mararo ba a ba tšeišitšego. Barwa ba gagwe a ba tšeela basadi ba masome a mararo. O feditše nywaga e šupago a ahlolela Isiraele. ₁₀Epsane o hwile a bolokwa lebitleng motseng wa Betlehema.

₁₁Ge a ile, Baisiraele ba ahlolelwa ke Elone wa ga Sebulone. Yena o feditše nywaga e lesome a ahlolela Isiraele. ₁₂Elone monna wa ga Sebulone a hwa, mme ba mmoloka motseng wa Ajaloni, mo nageng ya Sebulone.

₁₃Ge a ile, Baisiraele ba ahlolelwa ke Abedoni morwa wa Hillele wa Pirathoni. ₁₄Yena o be a na le barwa ba masome a mane, le barwa ba bona ba masome a mararo. Bona bao ba be ba namela dipokolo tše masome a šupago. Yena o feditše nywaga e seswai a ahlolela Isiraele. ₁₅Gomme Abedoni morwa wa Hillele monna wa ga Pirathoni a hwa a bolokwa motseng wa Pirathoni nageng ya Efuraimi, dithabeng tša Amaleke.