JESAYA 64

₁A mola o ka be o fatola magodimo wa fologa, wa šišinya dithaba pele ga gago, ₂wa etša mollo o fiša mahlaku, mollo go bediša meetse, ge ina lago le tsebišwa manaba a gago, ditšhaba ge di roromela ge o fihla, ₃Ge o dira tše di šiišago, tše re bego re sa kgone go di holofela. O ka be o fologa wa šišinya dithaba pele ga gago. ₄Go tloga kgaleng ga go ešo gwa kwala, ga go ešo gwa kwewa, ga go ihlo le le di bonego, ge modimo o mongwe a diretše ba ba bego ba o holofetše, ge e se wena, Morena. ₅O gahlanetša motho ge a dira toko a thabile, le ba go gopolago ba le ditseleng tša gago. Ge e le bjalo o befetšwe ka gobane re dirile bobe; ke kgale re le mo go tšona, re fela re phološwa. ₆Ka moka ga rena re bjalo ka wa tšhila; mme toko ya rena e bjalo ka aparo se tšhilafetšego. Ka moka ga rena re omile boka matlakala; mme bosenyi bja rena bo re tšea boka phefo. ₇Ga go a bitšago ina lago, a ithapa a itshwarelela ka wena; gobane o utile sefahlogo sago pele ga rena, wa re lesa ra nolega moko ka bosenyi bja rena.

₈Bjale, Morena, o sa le tatawešo; o Mmopi wa rena, mme rena re letsopa; ka moka o re bopile ka atla tša gago. ₉Morena, se befelwe wa go lahla; se dule o sa lebale molato go ya go ile. O ko bone hle, ka moka ga rena re setšhaba sago. ₁₀Metse e mekgethwa ya gago e fetogile naga ya lefela. Motse wa Tsione ke naga ya lefela; Jerusalema ke marope. ₁₁Ntlokgethwa ya rena e botse botse, mo botatawešo ba bego ba go reta, e fišitšwe ke mollo; mme tšohle tše di bego di re kgahla di senyetše. ₁₂Morena, a o ka fo dula o sa šetše, ge go šetše go le bjalo? Wa ikhomolela wa re kokobetša gakaakaa?