JESAYA 61

₁Moya wa Morena Mong a bohle o mo go nna, gobane Morena o mpeetše go begela babotlana taba tše dibotse; o nthometše go alafa ba dipelo tše robegilego, gore ba ba thopilwego ke ba goelele khunologo, ke goelele ba ba tlemilwego go gololwa, ₂ke goelele ngwaga wa kgahlego wa Morena, le tšatši la tefetšo ya Modimo wa rena, gore go homotšwe bohle ba ba nyamilego, ₃gore ballela Tsione ke ba anegele gore, bakeng sa molora ba fiwe mphapahlogo, bakeng sa manyami ba fiwe makhura a lethabo, bakeng sa pelo ntsho ba fiwe diaparo tša botšhepi, gore ba tle ba thwe: Le mere ya toko mešengwa ke Morena, ya go mo retiša. ₄Ba tlo tsoša marope a kgale, marako a matala; ba tlo mpshafatša metse ye e phušotšwego, marope a bogologolo. ₅Ba mathoko ba tlo ema mme ba diša mehlape ya lena; ba go le lemela mašemo le dirapa tša merara e tlo ba ba mehuta e šele. ₆Ge e le lena ba tlo re le baperisita ba Morena, bahlanka ba Modimo wa rena. Le tlo ja menono ya bantle; le tlo itumiša ka bokwala bja bona. ₇Tše ba le lešitšego hlong ka tšona, ba tlo di lefa gabedi; mo ba bego ba le goboša, bjalo ba tlo goloka. Dinageng tša bona le tlo fiwa kabelo tše pedi; mme lethabo la lena e tlo ba la neng le neng.

₈Gobane nna Morena ke rata toko; ke gana ge dihlabelong go na le leruo lebe. Batho ke ba nea tše di ba swanetšego ruri; mme kgwerano ye ke e dirago le bona ke ya neng le neng. ₉Mme bana ba bona ba tlo tsebja ditšhabeng, le tlogolo tša bona di tlo tsebja merafong. Bohle ba ba ba bonago ba tlo dumela ba re ke mohuta wa go šegofatšwa ke Morena. ₁₀A nke ke thabele Morena; moya wa ka a o hlalele yena Modimo wa ka. O nkapešitše diaparo tša phološo, o nthweša kobo ya toko, bjalo ka motšei a itlhama boka mphamodimo, bjalo ka motšewa a apere dipheta tša gagwe. ₁₁Gobane Morena Mong a bohle o tlo mediša toko le go retwa pele ga ditšhaba tšohle, boka naga e tšweletša tše melago, boka tšhemo e mediša peu e bjetšwego mo go yona.