1Tsoga o bonege, gobane seetša sa gago se etla, mme letago la Morena le hlaba godimo ga gago. 2Gobane šeleo leswiswi le khurumeditše lefase, boso bo thibile ditšhabeng; gomme wena, seetša se go hlabelago ke yena Morena; go bonala letago la gagwe godimo ga gago. 3Bantle ba tlo tla seetšeng sa gago, le dikgoši di tlo tlela etša sa masa a gago. 4Takataketša mahlo o gadie; ka moka ga bona ba a kgobokana, ba tla go wena; barwa ba gago ba tla ba etšwa kgole, barwedi ba gago ba kukilwe ka mabogo. 5Bjale o tlo taga sefahlogo, pelo yago e tlo binabina, e tlo kgarologa ge menono ya lewatle e go tlela, ge mahumo a ditšhaba a etla go wena. 6Makoko a dikamela a tlo go khurumetša, dikamela tša lebelo tša kua Midiane le tša Efa; ka moka ga bona ba tla ba etšwa Saba, ba tliša tshipi e khwibidu le dibano, ba tliša foko le monate la theto ya Morena. 7Mehlape yohle ya Kedara e tlo go phuthegela, dikgapa tša kua Nebayothe di tlo go hlankela, e tlo ba sedimo se se kgahlišago aletareng ya ka; gomme ke tlo thakga Ngwako wa letago la ka. 8Ke bomang bala ba fofago boka maru, bjalo ka maeba ge a kgorogela dihlageng tša ona? 9Ka kgonthe, dihlakehlake di ntebeletše. Maselawatle a kua Tarasisi a etile pele, a tliša bana ba gago ba kgole. Ba tliša tshipitshehla ya bona le tshipi e khwibidu; ba di tlišetša ina la Morena Modimo wa gago, yena Mokgethwa wa Isiraele, gobane o go file letago. 10Merako ya gago e agwa ke bana ba bantle; mme dikgoši tša bona di a go hlankela. Gobane ke go otlile mola ke befetšwe; bjale se ke se ratago ke go go šokelwa. 11Dikgoro tša gago di tlo dula di ahlame; di ka se tswalelwe mosegare le bošego, gore go wena go tlišwe menono ya ditšhaba, le dikgoši tša tšona di orošwe gona. 12Ge go tlo ba le setšhaba le mmušo o tlogo gana go loba wena, o tlo nyatšega; mme dithšaba tše bjalo di tlo fedišetšwa ruri. 13Matsaka a Libanoni a tlo tla go wena, a megobogobo le a merekure le a morokwana; yohle e tlo tla go thakga felo mo go kgethwa ga ka; bogato bja dinao tša ka ke tlo bo tagiša. 14Le bana ba bala ba bego ba go gata, ba tlo tla ba lotšha; mme ba ba bego ba go nyatša ba tlo khunama felo mo o gatilego ka dinao; ba tlo re: O motse wa Morena, Tsione gaMokgethwa wa Isiraele. 15Tšela tša ge o lahlilwe o hloilwe, go sa tle motho go wena, bakeng sa tšona ke go dira wa letago le le sa felego, wa go tlo thabelwa ke ba neng le neng. 16O tlo anywa tswele la ditšhaba, matswele a bahumagadi, wa tlo tseba ge Mophološi wago le Monamoledi wago e le nna Morena Mogale wa Jakobo. 17Bakeng sa mphiri ke tlo tliša tshipi e khwibidu; bakeng sa tshipi ke tlo tliša tshipitshehla; bakeng sa kwata ke tlo tliša mphiri; bakeng sa maswika ke tlo tliša tshipi. Ke tlo bea molao ya ba molaki wa gago; ke tlo bea toko, ya ba mmuši wa gago. 18Mo nageng ya gago go ka se hlwe go kwala tša sehlogo; le tša tšhwalalanyo le go thubja di ka se hlwe di kwala mellwaneng ya gago. Merako ya gago ba tla re ke bophologelo; dikgoro tša gago ba tla re ke tša ditheto. 19Letšatši le ka se hlwe le eba sona seetša sa gago mosegare, le ngwedi e ka se hlwe e eba gona go bonega. E a tlogo ba seedi sa gago sa neng le neng ke yena Morena; yena Modimo wa gago e tlo ba yena letago la gago. 20Letšatši la gago le ka se sa dikela; ngwedi wa gago ga o sa tlo hwa; gobane seetša sa gago sa neng le neng e tlo ba yena Morena; gobane matšatši a dillo tša gago a tlo ba a fetile. 21Ke mo setšhaba sago e tlogo ba sa baloki fela, mme naga e tlo ba ya bona go ya go ile, e le bona dihlare tše nna ke di šemilego, e le bona babopša ba diatla tša ka ba ba nthetišago. 22E monyenyane o tlo tšwa ba sekete; mme mmotlana o tlo tšwa tšhaba se maatla. Ke nna Morena e ke tlogo dira tšeo ka pela lebakeng la gona.
