JESAYA 56

₁Morena o re: Lotolang moahlolelo, le ye ka toko, gobane go phološa ga ka go a batamela, toko ya ka e tla tloga e bonala. ₂Motho wa lehlogonolo ke e a di dirago, ngwanamotho e a di swarago, a lota Sabatha a se e goboše, a iletša atla sagwe bobe bjohle.

₃Monna wa lethoko wa go diilela ga Morena, a se ke a re: Nna Morena ga a mpale le ba setšhaba sagwe!

Le wa bogope a ka se ke a re: Nna ke sehlare se se omilego! ₄Gobane Morena o re: Ba bogope ba ba tlogo lota disabatha tša ka, ba ithlaolela tše di nkgahlišago, mme kgwerano ya ka ba e gomarela, ₅bona bao ntlong ya ka le mo morakong wa ka ke tlo ba nea bodulo le ina le le botse le le tlogo feta la barwa le la barwedi; ke tlo ba nea ina le sa hwego, le sa phumolwego.

₆Mme ba mathoko ba go diilela ga Morena, mme ba mo direla, ba rata ina la Morena, mme ya ba balata ba Morena, bohle balotasabatha ba se e goboše, kgwerano ya ka ba e gomarela, ₇ke tlo ba tliša fa thabeng e kgethwa ya ka, ka ba thabiša Ntlong ya ka ya thapelo; dihlabelo tša bona le didimo tša bona ke tlo di thabela di etla aletareng ya ka; gobane ina la Ntlo ya ka e tlo ba le: Ngwako wa thapelo wa ditšhaba tšohle.

₈Sele lentšu la Morena Mmothabafaladi ba Isiraele, o re: Ke sa tlo ba bothela ba bangwe, go ate mabotho a bona!

₉Hee lena dibata tša naga! Tlang le jeng! Le lena dibata ka moka tša dikgwa. ₁₀Badiši ka moka ba bona ke difofu, ga ba tsebe selo. Ka moka ga bona ke dimpša tša dimuma di sa kgonego go bogola; ke balori, barobadi, ke dirokoroko; ₁₁mme dimpša di bata lejo, ga di hore. Ge e le badiši bona ga ba tsebe tlhaologanyo; bohle ba ya mo ba yago, mang le mang o nyaka leruo la gagwe. ₁₂Ba re: Tlang! Ke hweditše sebela; a re nwe tše bogale. Le la ka moswana le tlo etša la lehono; le tlo ba la le phala.