Go babja ga Hiskia le go fola ga gagwe
1Mehleng yeo Hiskia a babja wa go hwa. Jesaya moporofeta morwa wa Amotsi a tla go yena a re: Morena o re: Laela ba geno, gobane o tlo hwa; o ka se ke wa phela.
2Hiskia a phekgoga a lebiša sefahlogo lebotong, a rapela Morena a re: 3Hle Morena, o ko gopole ka mo ke sepetšego pele ga gago ke go botegetše, ke dira ka pelo ka moka, ke dira tše di go kgahlago! Gomme Hiskia a lla gabohloko.
4Ke mo lentšu la Morena le tletšego Jesaya la re: 5Yaa o botše Hiskia o re: Morena Modimo wa Dafida tatago o re: Thapelo ya gago ke e kwele, le megokgo ya gago ke e bone. Bjale ke tlo eketša nywaga ya gago ka nywaga e lesome le metšo e mehlano. 6Le gona ke tlo namolela wene le motse wo seatleng sa kgoši ya Asuri; motse wo ke tlo o šegela.
7Sešupo se se tšwago go Morena, se o tlogo bona ka sona gobane o go kwele, sese: 8O tlo bona ke gomiša moriti wa letlapa la Ahasi la sešupanako, wa boela nthago wa fetša kgato tše lesome, tše o bego o šetše o di ngwathile.
9Sefela se Hiskia kgoši ya Juda a se ngwadilego mehleng yeo ya ge a babilwe mme a fodišwa, sese: 10Ke be ke re ke yo tsena ka dikgoro tša bahung, ke tloga e sa le mosegare wa bophelo bja ka; ka re ke lomelela nywaga e sa ntšhaletšego. 11Ka re, nka se hlwe ke mmona, Morena, yena Morena mo nageng ya ba phelago; nka se hlwe ke bona batho ke le mo go bao ba gorogilego. 12Ka re, ngwako wa ka o a rutlwa, o tlošwa bjalo ka leobo la badiši, phelo bja ka bo felela bjalo ka legogwa ge le menwa. O nkgaola e sa le mosegare; o nkgoroša le sešo la rapama. 13Ke be ke ithabetše e sa le bosasa, a nape a nthokga mašapo ohle boka tau; e sa le mosegare o nkgoroša le sešo la rapama. 14Ka lla bjalo ka lefokotsane, boka kgori, ka lla wa leebarope, mahlo a ka a lapile ka go llala. Morena, ke imetšwe, a ko nthole. 15Ke tla reng? O ntirile tše a mpoditšego tšona. Ke tlo sepela ke ipoetša ka nywaga yohle ya phelo bja ka, ka go hlokoga ga pelo ya ka, 16Mong wa ka, tše ke tšona tše di phedišago motho. Le nna moya wa ka ge o phela, ke ka tšona tšeo fela; o mphodišitše wa mphediša. 17Ka kgonthe, bohloko bjo bo ntiregetše khutšo. Ke wena e o ratilego moya wa ka, wa o ntšha moleteng wa tobo; wa ntebalela dibe tšaka tšohle. 18Gobane kwa bodulabahu ga o lebogwe; lehu ga le go rete; ba ilego moleteng ga ba holofele go sa tlo botegelwa ke wene. 19Ba ba phelago, ke bona ba go lebogago, ba ba phelago bjalo ka nna lehono. Bana ba tlo botšwa ke tatabo ge o le mmotegi. 20Morena o ratile go mphološa. Bjalo re tlo letša letšo tša ka Ngwakong wa Morena mehla yohle ke sa phela.
21Jesaya o be a ba boditše a re: Tšeang mago le bupi, le papatletše sešo ka ona, gore a fole. 22Hiskia o be a boletše a re sešupo ke sefe sa go re ke tlo ba ka rotogela Ngwakong wa Morena.
